Trotwaer. Jaargang 7

[p. 7]

Steven de Jong
Fjouwer fersen

Fan 't fryske lan

haww' jim wol west op de heechste étage
fan 'e serviceflat ‘âldlânstate’
en de rounwei sjoen
dy't syn suvere ring goun
de tsjerke koe wol wurde
- folmakke - de toer fan beton
de flats yn 't bûtlân
transistorkes allyk
en haww' jim heard
de rûzjende starfighters fan 'e troelstrawe[i]
dy't fryslân tsjin hollân fordigenje moatte?
yn huzum bin jim kundich
mar ha jim ek sjoen it
van harinxsma-kanael fol plastic boatsjes
wiid om jim hinne?

dat alles is fryslân

kinn' jim de wei nei trynwâlden?
haww' jim makke op 'e geast fan gytsjerk
oer it asfalt fan 'e singel
friezene pylgertocht?
en metten jimme dêr de ponny's en de paechden
mei forinzenbern?
faeks binne jimme tein by burgum lâns
om de deakiste to sjen fan végé en
algemene bank nederland
dy't it âlddoarp fan 'e wrâld ôfslút
en ha jim it briedende fleis rûkt
fan 'e N.T.F.

dat alles is fryslân

yn hollân hoege jim net west to hawwen
hwant ek amsterdam heart by fryslân
en hawwe jim wolris west
- sa moat ik noch freegje
yn 'e frieslandhal
kearn fan 'e klaei en de wâlden
kenn' jim de rotonde fan 't fean
it drachtster plein
de toer fan spannenboarch
en de P.E.B.-sintrale fan noardermar
yn hiel har birin?
en de autobanen, de platte, slein troch
it âldste gea
en hawwe jimme stien op 'e kop
ja
fan 'e ôfslútdyk
en de âlden dêr wrotten sjoen
foar lân en foar libben
it tilt hjir fan libben

dat alles is fryslân

(tige frij nei o postma)

[p. 8]

Manifest

'k ha balen fan 'e nije romantyk
mei dzjiizushier en progressyf antyk
fan beppe tiden haw ik skjin myn nocht
ek fan dyn iepen hurd mei bearenburch by kearsljocht

yn plat towâlde gêrs tusken de hynsteblommen
sjoch ik dy ta dysels en ta my kommen
mar strûp dan beppe jûpe fan it gat
de bleate wierheit is tominsten hwat

oars

[p. 9]

Petear

- ik bin god
sei er
- en ik leau net yn dyn bistean

mar astû echt bistiest

bistû like iensum as ik

- ik twifelje net oan ús bistean
sei ik
- mar wol oan dat jo god binne

- 't sil je bern mar wêze
sei er

[p. 10]

De lytse semearmin

doe't ik yn kopenhagen
sjen woe
it lok
dêr't wy alles foar oer hiene
hûs en hiem
de sounens fan ús jonge lea
ja sels ús sprake
moast ik oerside bûgje
om it leed to sjen
om it forlern gean fan dat lok
in brânnende leafde
wjerspegele
yn 'e ranende eagen
fan 'e lytse sémearmin
dy't stoarret
oer de sont...

nei de dea

en doe't ik al it fortriet fan 'e minsken
yn dy eagen seach
d.w.s.
sahwat seach
hwant ik koe krekt net fier genôch komme
hearde ik de klik fan in fototastel
en in frânsman
spriek de forneatigjende wurden:
mechsý mesjéu