Trotwaer. Jaargang 1

[p. 96]

Tryng-Wang Hoe / In ûnbikende keat.

It hat de Eale Redakteuren fan it tydskrift Trotwaer hage de ûnweardige persoan Tryng-Wang Hoe út to noegjen om inkelde neatsizzende wurden to wijen oan de oersetting troch de dichter Marten Sikkema fan in rige fersen út syn memmetael, dy't de Achte Lêzer fine kin yn in ôfsûnderlike útjefte fan it tydskrift De Strikel. Tryng-Wang Hoe tanket foar de eare him hjirmei oandien.

Hy merkt mei greate biskiedenheit op dat er foar de fersen fan de dichter Sikkema greate biwûndering hat. Mar, hoe't de neatwittende persoan Tryng-Wang Hoe der ek tsjinoan skytskoarret om it steile wurd út to sprekken, him tinkt dat der tusken de treflike fersen fan de dichter Sikkema en de fersen fan K'ung Fu Tsé, Ly T'ei Po en oaren net in foldwaende forbân en oerienkomst is.

De dichter Sikkema ken de memmetael fan K'ung Fu Tsé en Tryng-Wang Hoe net, skriuwt er. Hy hat de fersen út oare talen oerset. Hokker talen? ûnderwynt Tryng-Wang Hoe him to freegjen. Hat de dichter Sikkema tige frij oerset of hat syn ûnbikende boarne tige frij oerset? Tryng-Wang Hoe is de lêste dy't it wit. Mar hy seit: ien fan twaën.

Hy lêst bygelyks by de dichter Sikkema yn it fers Minskelot de rigels:

Fan maitiids bloeisel sparret simmer neat,
koel komt de hjerst en dan yn wite klean
de winter...

Mar K'ung Fu Tsé hat skreaun:

Dat is yn 't Frysk oerbrocht:

Ik fei de appelblossem fan dyn jak,
myn hân rêst effen op de titten.
Sa stjert bigearte...

[p. 97]

Fan Tsjang Woe-Kjen hat Sikkema ek in fers opnommen en der de titel Tryst Paviljoen oan jown. De lêste rigels binne:

Lykwols, de linen, lutsen fan myn hân,
bringe in núvre likenis ta stân:
blinkende wêzens, sûzerich en swier
forsille oer in glêdde moarmerflier.

Tsjang Woe-Kjen hat lykwols skreaun:

Dat is oerset yn it Frysk:

't Pinsiel falt út myn hân.
Wurch sjoch ik: drippen, fegen
op 't moarmer. Dan, kjel, ûntdien:
gesichten, foarmen, wêzens, hwa en hwat?

De lytse persoan Tryng-Wang Hoe mient mei dizze twa foarbylden oantoand to hawwen dat der in to greate distânsje is tusken de - wiswier: treflike - fersen fan de dichter Sikkema en de originele Sjineeske fersen. Oft him dat oan de dichter Sikkema of oan syn netneamde boarnen leit, dat wit Tryng-Wang Hoe net.

Neiskrift:

De hear Tryng-Wang Hoe is in Sjineesk studint dy't foar it regime fan Mau Tsé Tung nei it westen flechte is. Hy wennet nou twa jier yn Nederlân en de lêste acht moanne dêrfan yn Fryslân. De hear Tryng-Wang Hoe wurket as kelner yn in Sjineesk ythûs to Ljouwert en is troud mei in Frysk fanke.

Redaksje.