Dit is die tafel vanden Groten Lancfranck

Dat derde capittel is vander spondelen (dats dat rugghe been) ende alset rugghe ⁶⁹³ uter steden is

Die spondelen uut hare stede is zeer anxtelijc. Ende der ierster jucture tusschen den hoefde ende der ierster spondele des halses ende die jucture tusschen der sovender ende der VIIIter gaen lichtelike uut hare stede dan die ander jucture. Ende als si sijn uut hare proper stede dat is zeer anxtelijc. Ende als die ierste jucture uut hare stede sin die mensche stervet varinghe omme dat die spondele inwert is gheduwet die belettet ende hindert den ademe. Ende als die jucture tusschen die sovende ende die VIIIde spondele uut hare stede sin, dan is den wech vander spise ende den dranc bestoppet ende oec den wech vander lucht. Ende sin daer enich vanden achtender spondelen neder wert sin gheduwet, so verliesen sy ewelike dat ghevoelen ende beroren van wien dat beroren was ghebrocht vanden zenen comende vanden morghe. ¶Ist

693 Voor en na ‘rugghe’ is ‘hem’ in zwarte inkt tussengevoegd.

[fol. 186v]

also dat die ierste jucture staphans nyet en woert weder ghebrocht in haer stede, die zieke stervet to hant. ¶Ende ist dat die meister daer is, so neme hi den zieken biden hare ende duwen mytten voeten op sin scouder ende trecken op wert biden hare, het sal weder keren in sin stede. ¶Mer als die jucture tusschen de VIIde spondele ende de VIIIde is uten lede, het mach een luttel meer ontbeiden dat die zieke so haste nyet en stervet. Ende ist dattet zeer in wert gaet, soe stervet die zieke varinghe ende selden machment cureren. Ende ist datment solde cureren, men solde den hals op wert trecken ende neder duwen mitten scouder als voerseit is. Ende als die spondelen uut wert bulghet (dat selden is), men salt nederwert duwen mitten handen ende oec die scouder ende trecken op wert mitten handen Ende so wat spondele dat in wert gaet vanden VIIIde nederwert, men en machet nyet cureren. ¶Ist dat die spondele uut wert bulghen ende si sin nyet varinghe ghecurert, sy bliven onghenesen ende ewelikke bulghende. Men sal die spondele neder wert duwen mitten handen off myt een slecht houten bort daer op binden ende proper helende medicinen. Ende is aldus dat die jucturen stijf bliven in dat beroren, dan salmen doen die selve leringhe dat gheseit wert inden Antidotario int capittel van morwende medicinen.