Dit is die tafel vanden Groten Lancfranck

Dat vijftiende capitel is van wratten ende cloven van handen ende van voeten ende van vervroren hielen

Porri sin sachte wratten ende wit comende van dicker fluma. ¶Veruce ⁶⁷⁴ sin herde wratten ende zwert myt vele wortelen ende comen van dicker melancolien. ¶Ende cloven comen altoes van verbernder melancolien. ¶Mulen dat sin verrotte hielen of versene ende comen van een dicker melancolien.

¶Porri salmen purgeren ⁶⁷⁵ myt purgacien inden lichame myt trocissen van turbich° ende wriven die stede myt droghende medicinen als myt gheites stront ghetempert mitter scorsse van oker noten (dat sap dat buten om die note is). Oec salment wryven myt blade van grove gaghele° ende mitten blade van capparu° ende myt ene gheproefde medicine dats mitten sade van enen wyve als sy bij enen man hevet ghewest.

¶Verruce

674 Emendatie:het handschrift heeft ‘Vruce’.

675 Emendatie:het handschrift heeft ‘prugeren’.

[fol. 183r]

salmen cureren myt purgacien der lichame myt epithimo° ende myt gheyten weye. ¶Off myt een ander medicine die melancolie purgert alse van buten myt ruptorien off myt zem van anacardi° off myt een ander corrosijf off dat beter is: men salt binden myt enen drade om die wortelen al vaste ende dan trecket sy uut mitten drade. Ende daer na salmen die stede cauterizeren.

¶Cloven die comen in die handen ende in die voeten, salmen purgeren myt purgacien des lichames van verbernden humoren ende myt baden in zueten water ende myt versche spise die guet bloet maken. Ende dan daer na salmen dwaen die gheclovede lede myt water daer in is ghesoden bismalve° wortelen myt oly. Ende daer na salmen salven myt deser salven: Recipe oly rosaet° ende was, terbentine, ende enden smout, ysope° sap ende die limichede van sade van citonien ⁶⁷⁶ , amidi°, dragaganti°, van allen dese even vele ende salve ghemaket. ¶Dits een sunderlinghe guede salve to cloven alse ic hebbe dicke gheprovet.

¶Mulen salmen cureren myt wermer salven ende myt wermer olyen. Al waert so dat hi heet waer, nochtan salmen cureren myt wermen medicinen. Men sal de stede salven myt oly van lelyen om die zweringhe to sachten Ende darna salmen die stede smieren myt een werme zuverende medicine alse myt mirren ende daer na to helen. Ende eert uut breket, salmen daer op legghen medicine van bolo ar° ghemorwet in wine, want het verscheidet die verssche aposteme. Ende ist datmen wil wachten vanden mulen of lycdoern, men sal ghene nauwe scoen draghen. Ende men sal smeren die voeten ende die hielen myt deser salven die belettet mulen ende verwachtet de lede van wintersche coude: Recipe oly van lelyen VI ons ende een half ons, harse II ons, armoniac I ⁶⁷⁷ ons, meel van venigric° een half ons, wieroc° mastic° elkes II dragmen ⁶⁷⁸ ende maket salve ende dese salve is zeer guet daerop.

676 Emendatie: het handschrift heeft ‘ciconien’.

677 Emendatie: hier voor stond overbodig ‘ende’.

678 Hiervoor een doorgekrast teken.