Dit is die tafel vanden Groten Lancfranck

Dat elfte capitel is van opene zeren inden vede ende uut treckinghe ende canker ende fico inden vede

Die fighe is een overvloedichede inden vede wassende opt thovet ende som wilen opden caproen vanden vede dat dicwilen is moruwe ende dan ist van eenre materia van fluma. Ende somwilen ist heert ende dan ist van melancolye. ¶Ende ist dattet vervulet, so werttet een canker ende den canker comt inden vede ghelijc in anderen leden. ¶Ende opene zeren comen dicwil inden vede van heten pusten die uut breken, off comende van scarpen humoren die de huud wonden, off van myt quaden vrouwen to wesen die van enen anderen man was ghemijnt die ghebrec hadde als voerseit is, off dattet wijf nyet en was als sy van rechte soude wesen. Ende ist dat de vighe is van fluma, men salt binden myt enen drade so vaste ende elkes daghes dwinghen

[fol. 177v]

den draet tot dattet af vallet. Ende salt dan helen ghelijc ander zeren. ¶Ist van melancolyen soe is die cure vreseliker. Ende men salt cureren eer dattet vervulet myt ghetemperden, morwende medicinen also et voer gheseghet is van herde apostemen. Ende alset is ghemorwet dan saltment uut doen mitter wortelen. Mer het is sekere dat ment bernet myt eenre cauterien. Ende na dat bernen salmen daer boter op legghen tot dat die brant uut is. Ende daer na salmen weder ⁶⁵³ bernen ende aldus allenke tot dattet verteert is.

¶Den canker en machmen nyet cureren off men doetten af mitten lede datter vervulet is, ende daer to en is gheen dinck beter dan een barnende cauterie. Ende daer na salmen daer op legghen een suverende plaster, gheseghet in Antidotario. Ende dan salment helen myt scarpen, droghende medicinen. Ende op dat ghesonde deel salmen altoes legghen medicinen van bolo ar° ende tarra sigilata°, want het verwachtet dattet ghesonde deel nyet en vulet.

¶Ende opene zeren salmen cureren myt starken, droghen medicinen. ¶Item die vellekine vanden caproen des veden verdicken som tiden dattet schynet off het wratten sin alse war by men en mach se nyet cureren die dichede en sy ierst ghemijnret ende daer toe is guet dese medicinen: Recipe I deel wijt wijns ende schiltverwe° I dragme, operment II dragmen. ¶Dese II salmen clene pulveren ende doen si inden wijn voerseit ende roerent dicwile to gader ende hoet ouder is, hoet beter is. ¶In desen wijn salmen netten I ouden, lynnen doeck ende legghen op die zeer stede, want het droghet ende het heelt ende het dodet den canker. Ende isser zwellinghe off op blasinghe sonder quessinghe, so salmen besmeren myt witter zalven. ¶Off ment salt dwaen in wermen rosewater ende daer na wel droghen ende dan salmen daer op legghen I out, dunnen, lynnen cleet. ¶Item pulver ghemaket van droghe caworden° ende van aloes° dat doet wel helen ende droghen. Ende wortelen van verberis° is oec al droghe daer guet

653 Hiervoor (doorgestreept) ‘E’.

[fol. 178r]

op gheleit. Item so wye duchtet van enighen misquame als hi myt wyven to doen hevet ghehad, hi sal hem dwaen myt couden water ende myt azine.