Dit is die tafel vanden Groten Lancfranck

[LXXX] Dat achtende capittel is van saken die belette dat wonden zeren nyet en helen

Si dat sake dat die sieke hevet twater binnen, so suldijt cureren ende en moechdijs niet, dan versueket enen phisicijn diet doet. Ende ghy en sult den sieken niet pynen noch

[fol. 162r]

mit medicinen corrosiven noch mit snidene noch mit groten wyken daer in te steken, mer legghet opt seer lichte walrukende plaesteren die dat seer suver houden dattet nyet en stinket. Ende alst quade wesen des lichaems is cureert dan salmen keren weder ter principalre curen des seers. Ende aldus salmen doen als die lever of die milte sijn onghetempert, want ist dat dese twe niet en sijn in haer natuurlike wesen, so en machmen die ulceren niet wel cureren.

Ende ist dat vele bloets belettet dat seer te helen, dat machmen bykennen bi dat alle die aderen sijn vol van blode ende dat aengesicht roet is, die sieke jonc ende van complexien heet ende versk dat hy eet goet vleisk ende goeden wijn, ende men sal bloet laten in die aderen die voetsel brenghet ten ghequetsten leden. Ist dat bloet te heet, men sal hem dan een luttel bloets laten ende cureren mit spise coel ende droghe. In allen anderen siecten suldi doen als voerseit is in dat proper capitel van openen seren.

Oec sijnder somme medicinen mit welken dat men mach suveren ende droghen opene seren dat si wal helen openen seren die quaet sijn tho ghenesen als vilinge van coper ende van yser, scilt verwe ⁵⁹² ghebernt, aterment° ghebernt. Alle scerpe corrosiven, ist dat sy sijn ghebarnt, si hebben te meere macht to helen ende hare felheit is ghemynret. Ende dit is hijr to een goede salve: neemt salt verwe vilinghe van copere elcs I unce cathunya

592 Emendatie: het handschrift heeft herhaaldelijk ‘salt verwe’waar ‘scilt verwe’ bedoeld wordt.

[fol. 162v]

argenti° litergirum° van goude elcs VIII dragmen, noten van cipressen IIII dragmen, falgenine° II dragmen, aristologie° ghebernet clene wiroeck elcs V ons, was ende oly van gagel dats ghenoegh sy.

Pulver ⁵⁹³ : ¶pulver constrictijf ten brokenen benen mact men aldus: meel van bonen of van ghersten een half pond, mastic° draganti° gummi arabia° ana een half ons, mumme° bolus armenicus ana I ons. Si werden ghepulvert, ghetempert ende to samen ghemenget myt wit vanden eye alse dat harde wit ende een syden doec dubbel ghenet in olie rosaet ende salve van populeon° ende up die broke gheleit. Ende daer up dit constrictijf windelen ghenet in wit vanden ey ende daer up enen vilt ende daer up drie spaculen te foren gheset ende gheleit in enen sconen lade.

593 ‘Pulver’ in rubriek..