Dit is die tafel vanden Groten Lancfranck

[LXV] Dat ander capittel is van brekinghe der benre int aensicht

Somwilen is die noes tho broken ende somwilen dael gheduwet. Ist datment varinge helpet het sal wel ghenesen jof het moet ewelic also bliven. Du sulte in dat nese gat steken dinen mynnesten vingher jof die eerste vinger totter ghebroken stede ende mitter hant suldi van buten up duwen

[fol. 138v]

op die ghebroke ende upwert lichten mitten vinger tot dattet been is in sijn proper stede. Dan salmen steken in die nose een lange weke, smeret mit was der pulver van mastic ende wiroc in is soden ghemenget lijc een keerse Ende dat salmen in steken totte broken stede ende van buten salmen leggen een helende plaester ende boven der nosen int voerhovet salmen salven mit bolo armenico° ende oli van rosen. Ende die noes salmen bijnden mit cussinelen alst voerseit in wonden der nosen. Ist datmen die vinger int nose gat niet en mach doen, dan salmen maken een tente van houte ende stekent in die noes mit ouden lijnwade wonden ende mit oli rosaet° ⁵³² gesmeert ende werken der mede alst voerseit is vanden vinger. Item, van spisen, van bloet to laten, van ventosen, van clisteren jof suppositoria salmen hem waren na dattet guet duncket.

Item, ist dattet halsbeen is to broken ende ist dat luchter kale been, dan suldi in den mont steken ju II eerste vingeren vander rechter hant ende vogense to gader alst voerseit is. Ende dit suldi weten als die canten der ghequetster kalebeen mogen sijn ghevoget mit de canten der ghesonder kalebenen. Ende dan salmen mit enen sterken ghewassen drade bijnden die ghesonde tanden mitten ghequetsten tanden ende menichsins vlechten den draet. Ende daer na salmen daer up leggen een vanden helenden plaesteren ende bijndent so dat die bijnzelen gaen achter an dat hovet ende daer salment vaste maken. Ende het sal weder comen totten voerhovede ende daer na totten

532 Emendatie: het handschrift heeft ‘rasaet’.

[fol. 139r]

halse bi den hovede ende dan weder comen totter ghequetster caken so dat die bijnselen de ander der up onthouden mach, tote dat de caken al is ghenesen. Ende die sieke sal nemen dunne spize die hi mach supen ende niet cauwen. Ende die beenren in dat aensichte to broken ghenesen wel in XX daghen.