Dit is die tafel vanden Groten Lancfranck

[LV] Dat neghende capittel is van hermofroydes dats van kinderen die gheboren werden man ende wijf in een persoen. Nota

Voer is seit dat de moder vanden wive hevet een zenuwigen hals, de so vaste gaer luket als si hevet ontfangen dat kijnt, dater die punte van een naelde niet in en soude mogen comen. De uterste buuc der modere hevet een ander mont, datmen vulva heet, alse waerbi men mach wel een wijf bruden alsi draget kijnt dattet die innerste mont niet en sal biletten. Dese monde sijn somwijl besloten bider deleringe der naturen in voel maneren. Want somwijl hanget een dunne hudekijn buten voer vulva dat gheen gat en hevet sonder daer doer dat het mach pissen. Dese cure is licht: men sal dat hudekijn sniden overlanx de conte mit een sceerse ende steken daer in weken van stoppen, ghesmeert mit spec, up dat die huut niet weer en heelt. Ist dat de huut is braedachtich ende hert, men salt cureren, als voerseit is.

Ist dat vulva is buten sonder misquame ende die mont der moder is bestopt, so dattet saet niet in die moder mach comen, dan salmen haer bijnden alsoet is gheseit vanden snidene vanden stene ende men sal vulvam buten ondoen tot datmen seet den mont vanden moder ende dan salmen af sniden doen al die overvloienthede mit wapenen, ende altoes wachten dat men

[fol. 112r]

den moder niet en quetse. Want het waer beter datmen die overvloienthede der an lete, dan men die moeder quetse. Ende daer na salmen daer in doen een dicke forme maket van lode ende smeert mit oli van lelien ende stekent in vulva tot in den mont der moder ende latent daer tote de stede heel is. Dan salse hanteren mannis selscap eerst de stede gesmeert mit smoute van gansen of hoenren. Ist dattet dinc datter bestopt is, is dicke datment vander steden niet en mach verscheiden dan salment also laten, want hets al verloren gepijnt.

Hermofroditus is beide man ende wijf want hi mach doen ende gedogen ende men hefter gevonden ende se en hebben niet fulcomelike, mer si hebben inden mont der conten een overvloientheit van ⁴⁰⁷ vleiske dat is sacht ende moru ende cranc ende somwijl ist sterc ende zenuachtich. Dat vleischich salmen licht of doen mit snidenden wapenen ende mit lichten cauterien, mer altoes wachten datmen niet berne dat natuurlic vleisk. Of men macht bijnden mit een drade ende elkis dagis den draet dwingen tot dat het al of is. Ist dat het is sterc ende hert ende zenuwich, so dattet is lijc een vede ende ist dat het wert staende als hy een wijf tastet, dan salmen niet daer an comen om te cureren. ⁴⁰⁸

Het sijn somme manne die achter die cullen hebben een holhede lijc een conte van een wive twelke heft ⁴⁰⁹ een gatkijn daer de urijn uut gaet ende dat en salmen niet bestaen te cureren. Ende ist dat in die holhede geen gaetken

407 Hiervoor een (doorgestreepte) letter ‘d’.

408 Hiervoor (doorgestreept) ‘zuveren’.

409 Emendatie: het woord ‘heft’ is ten onrechte rood doorgestreept.

[fol. 112v]

en is, so salmen dat overvloiende vleisk bi luttel al lencken mit een cauterie of doen ende dan botere daer up leggen tot dat die brant uut is ende daer na salmen die stede helen lijc een ander wonde.

Het ghevallet in ⁴¹⁰ sommen wiven dattet bradich hudekijn, wesende in den bodem der conte, is so seer gemeret dat het uut wert hanget to te verre buten ende dat salmen of sniden ende cautirezeren mit een gulden wapen tot dat het weder comt in sijn natuurlike forme etcetera.

410 Hiervoor (doorgestreept) ‘sijn’.