Dit is die tafel vanden Groten Lancfranck

[LI] Dat viertiende capittel is vanden kanker die nyet uut gebroken en is. Nota

Vanden cancker die niet uut te broken is, seyt Rasis ³⁷⁸ (ende alsoe ic dicwilen hebbe gheseen) dat soe wie enen cancker wondet mit wapene of mit corrosiven, si ne winnen anders niet dan si maken enen openen cancker

378 Rasis rood onderstreept.

[fol. 102v]

ende den sieken corten sijn leven. Of die kanker en weer tot sulker stede ende so cleyne datment mochte uut doen mit al sinen wortelen ende dan mocht ment uut doen mit snydende wapenen ende de stede cauterizeren ende doen al die selve cure die voerseit is in den opene kankere. Mer ist dat die cancker is vul wassen ende groet, soene salment niet wonden mit wapene noch mit corrosiven. Mer men sal den sieken wel achter waren ende dicwile purgieren melancolie mit gheytene weye ende mit epithimo° ende somwile bloet laten ende salven die stede mitter salven van chutie (gheseit in die cure der openre canckeren) ende bewindet in colen bladen ende altoes bewachtent dattet niet en merret of dattet niet en corrumpere ende vervuullende. Bedi ic sach vele meisters die namen hadden in cirurgien die vonden een kancker in somen deel ghecorrumpeert ende vervuult ende niet uut to breken ende die zieke mochter langhe mede hebben gheleeft na minre leringhe. Ende si vermeten hem to ghenesen dat wel mit snydende jegen myne castume ende si snedent ende waenden etter daer in hebben ghevonden ende sine vonden anders niet dan vul vervullet vleisk sonder etter, spongeachtich alswaer die lippen stonken ende die stede. Ende om den stanc wert den gheest ghecorrumpeert (dats vervulet) als waer by die sieke starf varinge de lange tijt mochte hebben ghelevet mitten canckere ende niet uut te broken.