Dit is die tafel vanden Groten Lancfranck

[XXXVII] Dat XIX capittel is van brande van vuer ofte van water ofte van oly of dieer ghelike

Als een lit is verbernt van viere jof water jof olie, men salse cureren in II maneren. Deen is in begin eer de stede begint to bladeren ende dan moetmen orberen medicinen ²⁷⁰ de wel coel zijn. Tander is als de stede gebladert is, dan moetmen orberen medicien coel ende versk ende zeer dragende ende niet cnagende. Item, simpel medicien in die eersten saken zijn azijn ende alle maneer van eerden ende meerbaer ende alle sandalen°, nachtscaden°, roes water ende water van cawoerden° ende water van wilde caerden° ende alle dese coude cruden sijn der to gued. Item, een guede salve der to is olie rosaet° mit dodere van eieren. Item, lentilen° scheschelt mit olirosaet° ende mit doderen van eieren. Item, bolus armenicum° mit azijn: dese salmen cout der up leggen ende somwijl vernien eer dat de stede to heet wert. Medicinen behorende

270 Hiervoor een (doorgestreepte) ‘o’.

[fol. 81r]

in de ander sake sijn salven dus ghemaect van calke: nemet levendich calc ende dwatere mit couden water tote dat sijn sterchede al mindert is ende maec der of salve mit oli rosaet° ende mit een luttel was jof andersins, alse Rasis bewijst: nemet levendich calc ende leggetten in couden watere een wel lange wile ende laten sincken. Daer na doet dat water of ende tempert dat calc mit oli rosaet° ende maect salve. Item, de witten salve van Rasis van ceruse° in dat Antidotario is guet in begin eert gebladert is ende uut te broken ende oec der na als hit uut ghebroken is; etcetera.