Dit is die tafel vanden Groten Lancfranck

[XXXI] Dat IIII Capittel is van sculsen ende scellen ende pusten diemen hetet saphati

Saphati sijn clene puusten de wassen int hovet ende int aensichte der kinderen ende meest van wiven ende van mannen de sijn van verscher natuur ende daer loept uut diverse ettere. Ende si roven somwilen ende daer to is guet de medicin van Galieen voerseit ende de medicien van leme ende vander asche van caworden° voerseit.

Caworden sijn vleisken de van hem self wassen et puto per Sint Ciretvite. Kinderen werden cureert up dat de voester haer wachten van souten scherpen spise ende van sterken wine ende oec motet kijnt baden in watere der blomen van camomillen in sijn saden ende rosen ende fenigreet° ende men sal de stede salven mit olie van camomillen. Scellen dat sijn furfures wassende in die huut vanden hovede

[fol. 69r]

van verbernde humoren de welke uut vallen alsmen se vaste clouwet mitten nagelen. De welke sijn somwijl licht ende luttel ende men gheneest se mit datmen dat haer vanden hovede scheret ende mit de salven ende olien ende was te gadere ghesmouten ende mit de dwane alse mit warmen watere. Ende ist dat dit niet en helpet, dan salmen maken dese salve: nemet mele van ciceren° ende vanden sade van bismalve° getempert mit azine. Ende ist dat dit niet en helpet, dan salmen maken dese salve: nemet mele van ciceren° onsen III, mele van fenigreet°, sulphur, mirre, suffraen, sennep° elx dragmen IIII ende dese salmen conficieren mit azijn ende watere.