Dit is een suuerlijc boecxken
(1957)–Anoniem Suuerlijc boecxken, Dit is een–
Auteursrechtelijk beschermd¶ Dit liedeken gaet op dye wijse. Het was een lodderlijc pape24.1.
GOd gruet v suuer bloeme
maria maghet fijn
mi helpt dat ic v noeme
lof moet v altoos sijn
| |
[pagina 80]
| |
en waerdi niet gheboren
o reyne maghet fijn
wi waren al verloren
och ic beuele mi die
24.2.
¶ Dat was om adams sonden
mer god die ghi hebt ontfaen
die heeft den bant ontbonden
wi hebben ghenade ontfaen
al in vijfdusent iare
en was hem niemant waerdich dan ghi
te draghen maghet clare
och ic beuele mi di
24.3.
¶ Met recht sidi verheuen
al bouen der enghelen schaer
al ben ic hier ghebleuen
mijn hert is bi v daer.
och wilt mi doch gheleyden.
werwaert dat ic si
en wilt van mi niet scheyden
och ic beuele mi di
24.4.
¶ O rose sonder doren
| |
[pagina 81]
| |
fiolette van roke soet
o bloem die staet int coren
neemt mi in v behoet.
vol minnen ende ghcstadicheit [ghestadecheyt]
oetmoedich so sijt ghi.
och sijt mi doch ghenadich
och ic beuele mi di
24.5.
¶ Maria lelye reyne.
mijn troost ende toeuerlaet
ghelijc dat een fonteyne
die nemmermeer stille en staet
also deylt ghi uwe ghenade
v dienaers staet ghi bi
staet mi dan in stade
och ic beuele mi di
24.6.
¶ Mijn alder liefste vrouwe
o maghet ghebenedijt
in v dat ick betrouwe.
want ghi mijn weertste sijt
o suuer maghet schone
bidt uwen sone dat hi
| |
[pagina 82]
| |
mi hemelrijc gheue te loone
och ic beuele mi di
24.7.
¶ O boete van alder qualen
ontfaet die siele mijn
als ic moet betalen
dat wi al schuldich sijn
o minnelike aenschouwen
slaet dan v oghen op mi.
maect dat ic werde behouden
och ic beuele mi di
24.8.
¶ Noch so bidde ic eenen bede
dat ghi mijn herte verlicht
ende oec die siele mede
van die dit heeft ghedicht
o gheminde gods vriendinne
v ghenade begheeren wi
des hemels coninghinne
och ic beuele mi di
|
|