Renout van Montalbaen
(ca. 1340-1360)–Anoniem Renout van Montalbaen–
Auteursrechtvrij
[Folio 1ra]
| |
1[regelnummer]
Na die bisscoppen saten hertogen
die rike waren ende vele mogen
Na die hertogen saten grauen
die rike waren van hauen.
5[regelnummer]
daerna saten ic wilt bedieden
vorste ridders van maisnieden
die houesch waren ende milde
daerna die ridders van .i. scilde
Ic wane nieman dienen sach.
10[regelnummer]
bet dat men daer diende vpden dach.
Si saten alle na haer geuouch
Entie scinkere gaf hem genouch
vordie tafle stont renoudijn.
ende diende den rechten. fijn
15[regelnummer]
Ende adelaert die ridder snel
diende vtermaten wel.
Entie gebroedren altemale
vordie heren inde zale
Ic late bliuen vanden gerichten
20[regelnummer]
Enmochte geen man gedichten.
Ne geseggen ooc waer of
Ende elc men daer te pointe gaf
Nv latic vanden etene bliuen
Ende sal v vort an bescriuen
25[regelnummer]
doe damelaken vp waren gedaen
brochtmen water ende ginc dwaen
Ende dwougen daer alreest
die rijcst waren ende meest
daer was bliscap sonder scouwe
30[regelnummer]
Elc hadde inde hant ene vrouwe
die bagel was ende scone
Ic seggu bi gode vanden trone
althof mochtmen beset scouwen
met vrouwen ende joncfrouwen
35[regelnummer]
doeder water was genomen.
Es die boutelgier metten wine comen
hi gaf hem genouch ende renoudijn.
dede daer ouervloeyen den wijn.
doetochden haer spel dieder waren.
40[regelnummer]
alle diegoede vedelaren.
Elkerlijc van sinen spele
wel te maten ende niet vele
Lodewijcs vader ginc slapen.
met hem rudders ende cnapen
45[regelnummer]
wel .cccc. bi getalle
wel geachemeirt alle
Lodewijc sprac lude ende stille
Nv volge mi die goet hebben wille
Ende helpt mi met ter vaert
50[regelnummer]
In gonen sconen boongaert
| |
[Folio 1rb]
| |
Si holpen hem ter seluer stede
Ende si volgeden hem alle mede
doe ginc hi geuen scone gauen.
Coningen hertogen ende grauen.
55[regelnummer]
So dedi ooc ic wilt bedieden
vorsten ridders van maisnieden
die houesch waren ende milde
daerna rudders van .i. scilde
alle vergiftise ginder
60[regelnummer]
Sonder sgrauen aymijns kinder
biden here van nazarene
hem ne gaf hi groot no clene
doe gingen de broeders allegader.
Ende seident aymijn haren vader.
65[regelnummer]
als hi verstont die wort
Sal hijt den keyser clagen vort
Ende ginc ter camere daer hi lach
als hine met ogen sach
her keyser seiti nv sijn alleginder.
70[regelnummer]
vergift sonder alle minne kinder.
Die keyser sprac ic sal minnen neuen
harde grote giften geuen.
Ic wilse goeden also eerlike
alse enige sijn in dit rike
75[regelnummer]
doe ginc aymijn om sine kinder
Ende brochtse vorden keyser ginder
Siquamen ten bedde daer hi lach
Ende seiden here god geue v goeden dach
hi andworde sijt willecomen neuen.
80[regelnummer]
Ic wille v scone giften geuen
ritsaert ghi sijt bi getalle
doutste vanden broedren alle
het was mi wel geseit tevoren
want ghi wart eerst geboren
85[regelnummer]
Ic sal v geuen scat ende haue
Ende maken v in spaingen graue
adelaert wel coene wigant
Ic geue v poelien dat rike lant
Te wesene graue ende here
90[regelnummer]
Tuwen liue emmermere
ridsaert ic geue v seuen scilde met trouwen
Tusscen parijs ende lauwen
Ende moniu des berges voet
bigode dits .i. scone goet
95[regelnummer]
Enten .vi. penninc hebt mede
Renout riepi ter seluer stede
Ende seide lieue neue mijn
Ghi moet wel gegift sijn.
v geuic tlant van artoys.
100[regelnummer]
Ende van angiers ende van bloys.
| |
[Folio 1va]
| |
Ende dat goede lant van blatoene
daertoe geuic v rudder coene
.I. busant van roden goude
mettien boot hine renoude
105[regelnummer]
Nemt hier neue renout
dits recht ebreuchs gout
In weet v wat senden mee
god senden mi vter wilder zee
Coper met broot ende wijn
110[regelnummer]
Nauens wert de penninc dijn.
Ic seggu met waerheden dat
hijs beter dan al mijn scat
hi weicht wel.vijftien pont
Renout namene tier stont
115[regelnummer]
Ende warpene tien tiden
In .i. aelmoeseniere van ziden.
doe knielden die heilden goet
Ende custen skeysers voet
Ende ontfingen haer goet te lene
120[regelnummer]
haymijns kinder alle gemene
Ende namen orlof ter vaert
Ende streken inden boongaert
dit cam lodewijc te voren
des haddi toren
125[regelnummer]
dat sal hi wel ondervinden
Nv comt aymijn met sinen kinden
Ende sprac verbolgenlike
vorden coninc lodewike
Doe sprac lodewijc die coninc
130[regelnummer]
mijn here heift v gegeuen scone dinc
Ende vwen kinder sonder spanen.
maer in waens niet ombaren
wel die .ij. deel van minen rike
Ic salt v nemen sekerlike
135[regelnummer]
Icwilse ooc sien of sire toe dogen.
dat si wapen dragen mogen
Si moeten prouuen hare cracht gemene
In dat werpen metten stene
die hier leit inden boongaert
140[regelnummer]
Lodewijc spranc vp ter vaert
Ende riep ic vermete mi
dat ic die starste si
entie beste die leift.
entie de welert binnen heift
145[regelnummer]
van sconeiden van crachten
Ende niemen si van meerder geslachte
Ene werf seidi sinen wille
Entie ridders zwegen stille
Ende hi seit anderwerf boude
150[regelnummer]
doe balch hem aymijn die oude
| |
[Folio 1vb]
| |
Ende sprac lodewijc wi kennen wel
dat gi dapper sijt ende snel
maer laet staen v hoge wort
Sidi goethet comt wel vort
155[regelnummer]
hier es sulc van .xv. iaren
wildi sine cracht baren
hi worpe also verre metten stene
dat nes logene gene
dats ware te doene talre stont
160[regelnummer]
hi sprac god sat hebdi grijs hont
Ende ooc v grise wangen
Ende al dat gi hebt beuangen
moete varen inder waert
v houde hooft v grise baert
165[regelnummer]
Ne lietict niet dor mine ere
Ic soude v so hertelike sere
met minen vusten slaen
dat v dogen souden vergaen
Nv willic dat hier kinder begene
170[regelnummer]
haer cracht prouuen metten stene
Neder mantel ende surcoot
hi wart verbolgen ende erre
Ende warpene .xij. voete verre
175[regelnummer]
den zwaren steen die gonder lach
daer menich man toe sach.
daerna worpene aestelike
die beste van kerstinrike
beede meerre ende minder
180[regelnummer]
Sonder sgrauen aymijns kinder.
daer was niemen so starc no so goet
Lodewijc nontwarpene .i. voet
dordat lodewijc waren int lant
Lieten si hem de vorderhant
185[regelnummer]
alshi ontworpen hadde hem allen
riepi mi es grote ere gauallen
her grise w[aer] sijn v kinder.
Twine gadi selue werpen ginder.
hier es niemen also goet
190[regelnummer]
In verwerpene enen voet
gaet wech aelt renoude
giseit dat hi mi ontwerpen soude
Ic wanic v also harde
Trecken sal bi vwen baerde
195[regelnummer]
dat v selen in corter stonde
die tande vliegen vten monde
Doe balch aymijn van dordoene
Ende sprac gine wert niet so coene
Ic moete varen inder waert
200[regelnummer]
Quame v hant an minnen baert
| |
[Folio 2ra]
| |
Hare vader hadder dat was waer
onthouden geweist ouer .vij. jaer
hi verkende de rudders milde
Biden wapinen biden scilde
205[regelnummer]
hi seide ic sie wel dat ginder
Comen gereiden aymijns kinder
Ic kense wel bi apoline
Ghersi der herberge minne
dor de lieue van haren vader
210[regelnummer]
Salicse onthouden alle gader
hebsi haers vaders moet
Ende si manlijc sijn ende goet
Si sullen minne viande
alle driuen vten lande
215[regelnummer]
Doe ginc hi te dale waert
die borch brugge metter vaert
die rudders beetten van beyarde
Neder vp die erde
Ende gingen ten coninc daer sine sagen
220[regelnummer]
die daer quam met sinen magen
Si groeten met worden scone
die coninc sprac god moets v lonen
doe vragede die coninc milde
wat si begerden ende wilden
225[regelnummer]
doe seide renout openbare
dathi gerne onthouden ware
Ende sine broedren also wel
die starc waren ende snel.
doe andworde saforet
230[regelnummer]
wildi gelouen an onse wet
an mamette an boudewine
Ende anden voget apoline
Nenic sprac renout wete god
dadic dat so waric sod
235[regelnummer]
Ic wille gelouen an gode
Ende altoos staen tsinen gebode
Ende ant helige gods gewerke
an papen ende an clerke
Entie wet entie sede
240[regelnummer]
dies men pliet in kerstinede
Ende dienen v dagelijcs omme sout
dit sprac mijn here renout
Saforet sprac met sconre tale
bi apoline ic jans v wale
245[regelnummer]
helpt mi dwingen mine ommezaten
In sal v niet gebreken laten.
voert rudders goet van prise
Ten castele dien ic v wise
die ouer die porte staet gewracht
250[regelnummer]
vp den mur bider gracht
| |
[Folio 2rb]
| |
Die herberghe lenic v
geift mi vwen scat ic salne v nv
houden wel met eren
als ghi wilt van mi keren
255[regelnummer]
Ic salne v geuen met groten loue
wildi bliuen met mi te houe
also lange alsic sal leuen
So salic v genouch doen geuen
Renout sprac ic bems vro
260[regelnummer]
dat mi comen es also
Sigauen hem ic seggu dat
te bestadene haren scat
Saforet die coene degen
dedene biden sinen dregen.
265[regelnummer]
Renout ende sine broedre
Sijns vaders kinder ende sine moedre
reden ten castele diemen hem wijst
die so hoge was geprijst
Si vonder vp wat si begerden
270[regelnummer]
van dies wast bouen der herden
Si bleuen metten coninc daer
dat seget men ons ouer waer
Ende dienden sowaer hi wilde
beede met spere ende met scilde
275[regelnummer]
orlogeden si dach ende nacht
manlike met hare cracht
hare cleder quamen selden uut
Si moesten roten an de huut
Si waren wel sciere versleten
280[regelnummer]
dat yser hadse dor eten
dus dienden si den coninc daer.
.I. lettel min dan .iij. jaer
dathi hem gene ere nedede
No geretiere houescede
285[regelnummer]
mijn here renout die graue
bat dat men sinen scat gaue
men seide datmen hem geuen soude
Ende dagede dicken renoude
hi onthilden hem nochtan.
290[regelnummer]
doe balch renout die edele man
arde vtermaten sere.
Ende seide bi gode onsen here
gheift hi ons onsen scat niet
hem es euele gesciet
295[regelnummer]
Ic voersene inder gelike
alsic dede lodewike
wat segdi sprac adelaert
Biden here die gecruust waert
Slouchdi desen coninc renout
300[regelnummer]
Sone wisten wi niewaer geen onthout
| |
[Folio 2va]
| |
Her renout sprac nochtan
wi sijn ongeuallige man.
alhadden wi seluer of gout root
het werde coper ofte loot.
305[regelnummer]
ganc wech sprac hi te sinen garsoene
Tote saforette den coninc coene
of hi ons cleder wille geuen an.
willehi ons niet geuen dan.
Seght hem ooc al dat
310[regelnummer]
dathi ons geue onsen scat
doet hijs niet bi mire trouwen
het wert hem arde wel berouwen
verstant wel wattie coninc seit.
Ende segt mi aldie waerheit
315[regelnummer]
die garsoen dorst laten niet
hi dede dat hem sijn meester hiet.
Ic seggu eist v bequame.
windalin es sine name
diegaersoen liep wech te hant
320[regelnummer]
daer hi gonen coninc vant
Hi groetene wel houescelike
daerna seidi coninc rike
mine heren bidden v sere
dat ghi doet vwes selues ere
325[regelnummer]
Entie ruddren vercleden doet
Ende ghi hem geuet hare goet
haren scat die si hier brochten
doe si v herbergen sochten.
Hi seide gaet och garsoen
330[regelnummer]
quaden ende moeti doen
Entie incomelinge v heren
waer waert si hem bekeren.
mi mochte lichte ic soudse vangen
Ende bi hare kelen hangen
335[regelnummer]
here seiti ghi daet ommate
doe wincti sinen drussate
In sarsasinoys sprac hi zaen
dathiden garsoen soude slaen.
hi was scinkere ende drussate mede
340[regelnummer]
Nv mogedi horen wat hi dede
Sine hant hi verdrouch
vor de mont hine slouch.
dathem neise ende lippe brac
metten voete hine stac
345[regelnummer]
Ende trakene dor tfier mede
die garsoen liep wech ter stede
Talreest hi vernam
dat hi vor sinen here quam.
hem liep tbloet tier stonde
350[regelnummer]
Ouer nese enten monde
| |
[Folio 2vb]
| |
Alsen renout bloeden sach.
mogedi horen wies hi plach.
hi sprac ter seluer stede
Sech mi garsoen wiet di dede
355[regelnummer]
Saforets scinkere heift mi te blouwen
datseggic v in goeder trouwen
hi es scinkere ende drussate
Renout sprachi dede ommate
waeromme slouch hi di dus sere
360[regelnummer]
In weets niet bi onsen here.
Renout sprac bi gode
hi es sot die enen bode
aldus sere soude slaen
Enten here mach begaen
365[regelnummer]
hi mire wet bi mire trouwen
dat hi di slouch sal hem rouwen.
waest. seide renout omme dat
dat wi hiesten onsen scat
onse gout ende onse haue
370[regelnummer]
hi seide dat hi ons niet negauen.
No weder cleder nochte paert
hi seide gine warets niet waert
No weder gout nochte scat
Ia seide renout seiti dat
375[regelnummer]
Ia hi here waerlike dinc
Ende hi scalt .v incomelinc.
Ende wincte den drussate daer hi stoet
ende dede mi slaen vorde mont
hi seide gi daet alst felle diet.
380[regelnummer]
Iudaes die gode verriet
hi seide gi sloucht vwen here
daer renout balch hem sere
hiseide waer bestu ridsaert
Leet beyarde uut ter vaert
385[regelnummer]
doe tors verdecken wale
Ende hore na mine tale
v ende writsarde
So beuelic beyarde
wapent v ende ledet uut
390[regelnummer]
Stillekine sonder geluut
Seide renout die rudder vri
adelaert gi moet gaen met mi
wi sullen ons wapenen ter vaert
Ende dragen met ons onse zwaert
395[regelnummer]
Ende nemen onse mantele groene
Si nemen waren die ruddren coene
geacement ende gereit
Nv hort wat renout seit.
met goeder trouwen seidi dat
400[regelnummer]
onthout ons de coninc onsen scat
|
|