Historie van Reynaert die vos

[Cap. XLIV.] Hoe die coninc reynaert alle saken vergaf ende maecten seuereyn ende ouerste van alle sine landen.

REynaert ghi sijt mijn man van uwen leen daerom soe si di dat alle weghe sculdich te doen Oec soe wil ic dat ghi vroe ende laet wesen wilt tot minen rechte ende tot minen gheloefliken raede Siet dat ghi v voer misdoen wacht Ic sette v weder in alle uwe macht alsoe ghij hier te voeren gheweest sijt Ende wilt alle saken te rechte ende ten besten keren ende brenghen Als ghi uwen raet ter doghet settet Soe en mach dat hof uwes raedes

[fol. 107v]

niet ontberen. want hier en is nyemant die v verhoghen mach van scarpen raede ende van nauwen vonden Oec mede van langer gedenckenisse Ende denct om dit exempel dat gy mi gheseit hebt. ende siet dat ghi alle gerechticheyt hantiert ende weset mi trouwe Ic wil voort aen tot alre tijt bi uwen raede wercken ende doen ende laten Hi en leeft niet die v misdede Ic en soude dat scerpeliken op hem wreken Ghi sult ouer al mine woorde houden Ende ouer al mijn lant soe suldi van allen ghewelde mijn seueryn ende baeliu wesen Dese officie die gheue ic v ghi moechtse met groter eren hebben. ende vueren Alle reynaerts magen die daer bi stonden die dancten den coninc hoochlike. die coninc die sprac Ic soude meer om uwen wille doen dan ghi meent Ick bidde v allen dat ghi hem vermaent dat hij ymmer getrouwe si Vrouwe rukenauwe die sprack. zeker heer coninck here dat so sal ymmer wesen Ende en bedenct v des anders niet daer van Ende dede hi oeck anders So en waer hi van onsen geslachte niet. ende ick woude dan ewelic sijns missaken Ende ic woude hem /7601-7639/ krencken met alle mijnre macht ten ewighen daghen Reynaert die dancte den coninc hier of mit hoes\schen

[fol. 108r]

schoenen woerden Ende seide lieue here. Ic en ben der eren niet waert die ghy mi doet Ic sal daer omme dencken ende v getrouwe wesen alle mijn leuen Ende ic sal v also voersienlijcken raeden. als uwer eren wael betameliken si Hier mede weynde hi omme met sinen magen vanden coninc Nv hoert hoet mit ysegrym verghinck Bruijn Tybaert ende eerswijnde Ende sijn kinder met alle sinen magen ende mit horen gesinne gemeenlijck die haelden hem met clagen wten cride ende droegen hem op een leytier van hoey. ende si leyden hem warm Ende si besagen sine wonden wel xxv Ende daer quamen wise meesters diese verbonden ende wyecten Hi was so cranck van groter siecten dat hi dat gheuoelen verloren hadde Mer si wreuen hem cruyt voer sine oeghen alsoe dat hi vander onmachten ontspranck Ende gaf enen krijsch alsoe groot dat si alle veruaerden die daer by waren ende stonden Si meenden dat hi verwoet geweest waer

MEr die meesters die gauen hem dranck in dat hem sijn crancke herte stercte Ende si deden hem rusten Si troosten dye vrouwe ende seyden hoor. hem en soude aenden lyue

[fol. 108v]

niet letten Doe scheide dat hof ende elc schickede hem te huuswert sijns weghes des si gecomen waren