Historie van Reynaert die vos

[Cap. XLIII.] Doe reynaert ysegrym verwonnen hadde ende die coninc die camp op ghenomen had soe vertelde hi den coninc dit exempel

LIeue heer coninc sprac reynaer daer ghenoecht mi wel mede Mer doe ic eerst in uwen houe quam doe waren daer vele die seer fel ende nidich op mi waren die nye scade of verdriet van mi ghehadt of gheleden en hebben Mer hem docht dat si best ouer mi mochten Ende si riepen alle mede met minen vianden Ende si hadden mi gaerne mede belast Alsoe hem docht dat ysegrym bat met v ghesien was dan ick arme knecht Anders en wisten si gheen sake waer om Si en dochten niet als die wysen pleghen wat ende soe hoe daer of gheschyen mocht Here dese gheliken ende slachten te samen enen groten hoop honden die ic eens sach

[fol. 105v]

staen tot eens heren houe op eenre misten daer si onthouden waren Si wachten als die ghene die gaerne eten souden of men hem wat brocht Doe saghen si enen hont wter koken comen lopen ende had met hem ghenomen een grote ribbe met vleysche eermen hem die gaf Ende hij pijnde hem gheringhe daer mede wech te comen Mer die cock die hadde dat vernomen eer hij wech quam Ende hi nam een scotel met siedende water. daer begoet hi hem mede op sijn lenden Als dat /7474-7516/ hi den cock daer niet of en bedancte Want hi verbarnde hem also dat hem dat haer al after vter leynden viel. ende dat vel was hem al doer ende doer versoden Nochtans soe ontquam hi ende behielt dat hi gewonnen ende genomen had Ende doe hi bi desen anderen honden quam Ende si hem dit been mede saghen brenghen. doe riepen si alle hoe wel kundi v bedragen Hoe goet vrient is v die kock dat hi v aldus goeden been ghegheuen heeft daer aldus vele vleyschs aen is Dye hont die sprack. ghi en weet daer niet af ghy priset mi alsoe ghi mi metten been van voor aen siet Mer noch en saechdi mi after niet Besiet mi eerst after op mijn lenden ende pryset mi daer of ics verdient hebbe

ENde doe si hem after wel besaghen hoe

[fol. 106r]

hem sijn vel ende sijn vleysch al raeuwe doerzoden was doe gruwelde hem allen voer dat siedende water dat si niet te koolen wert en wouden ende si en wouden oeck sijns gheselscaps niet ende liepen alle van hem Ende si lieten hem bewerden hoe dat hi mochte Siet heer coninc dit gherecht dat hebben noch die lose ghieren als si heren sijn ende hoer begeert vercrigen Ende si dan mede ontsien ende machtich werden Soe scatten si desen Soe eten si dien recht oft een verhongert hont ware Dese die dragent been in horen monde Nyemant en dar teghen hem te doen hebben Ende men prijst hem al dat si bedriuen Noch en seyt men hem anders niet dan si gaerne horen Op dat si van desen oubescoren moghen bliuen Ende die sommighe om dat si mede vanden aese lecken moegen. die helpen hem mede hore ongherechtighe ondaden huden ende mede bedecken ende oeck onsculdighen Ende si starckense aldus in horen quaden leuen ende in horen quaden wercken Och lieue here dye des aldus pleghen. hoe luttel sien si achter /7516-7561/ ten sterte wert dat is nae dat eynde Ende of dit gode verdrieten wilde Ende tot hoerre regnancie die auentuer niet langher dueren en wilde So vallen si vanden hoghen neder in groten scaden ende scanden ende so werden hoer wercken

[fol. 106v]

dan openbaer ende nyemant en verdriet dan hoers lidens noch hoers ongeuals. ya eermen hem anders niet gedoen en kan. die ene die vloeckse die ander spreect hem smeliken ende schympet Die menige die wort besculdicht ende beschoren Alsoe dat hi goet noch ere en behout dat haer dat valt hem wt aen beiden siden dat sijn die vrienden die hem ontgliden die hem hoer boesheit ende ondaden hebben helpen verhuden Rechte als haer die huyt bedecket Soe hebben sise bedect ende onsculdicht Ende als si dan hoir oude ondaden moeten becopen. soe trect een yegelic die hande van hem Recht als die honde gingen lopen. vanden hont dien si soe mitten siedenden water versoden sagen Aldus so laetmen dese ende deser gelike alle wege in horen noden

LIeue here dit exempel wilt van mi onthouden Ten sal uwer wijsheit niet tegengaen. wat waendi hoe mennighe vintmen dustanighe quade scalcken noch Iae vele quader dan enen hont die sulcken been in sinen mont draeghet In steden ende in groten heren houe Die met groten onrechte der gemeynten recht ende vryheiden vercoopen ende ouer gheuen Om dat si daer bate ende ghenot of meynden te hebben God die moetse allegader scaeden ende

[fol. 107r]

scheynden soe wie dat si sijn Mer god danck sprac reynaert men sal mi noch minen geslachte dat niet verwyten des wil ic mi alle quiten Ende comen daer of in die lucht Ic en heb voor nyemant anxt die aen mi bedriuen can Reynaert die en sal reynaert bliuen Al haddent gesworen alle sine viande heer coninc mijn herte dat heeft v mit ganser minnen bouen allen heren wtuercoren Ende nye en woude ic om nyemans wille van v keren Al is vele anders /7561-7601/ an ghebracht Ic heb nochtans altoes dat beste ghedaen ende dat wil ic voert doen alle mijn daghe waer dat ic can of mach