Historie van Reynaert die vos

[Cap. XLII.] Hoe ysegrym van reynaert verwonnen wort ende hoe den camp op ghenomen wort na dien dat hi verwonnen was ende reynaert bleue in die ere ende hielt die ouerhant

/7347-7387/

NOch so deerde hem dat veel meer dan hem sijn oghe dede dat also seer bloede Also dat hi al verdroefde. want hem dat bloet so wten hoefde liep Ende hi stortede neder in onmachten Reynaer die liep tot hem an mit al sine cracht ende hi heeften al vast bi den kuwen geuat ende hi sleepte hem after dat krijt daer sijt alle sagen ende stacken ende sloegen zeer Des worden ysegryms vriende zere bedroeft ende ghinghen al screyende tot horen here den coninc ende baden hem zere dat hij den camp op nemen wilde. die coninc sei dattet hem lief waer Doe ghinghen beyde die crijtwaerders die loessem ende die lupaert in dat krijt ende seiden Onsen here den coninck die wil v spreken Ende hij wil desen strijt nv breken tusschen v beyden ende hij wil desen camp op nemen. hij biddet v dat ghij hem den strijt op gheuen wilt. want waert dat sake dat hier een van v beyde doot bleue in desen strijt dat waer groot scande an elcke side Want ghij hebt

[fol. 104r]

doch die ere vanden camp op dese tijt die ghij daer of hebben moghet Alle die beesten dye gheuen v den prijs daer van diet ghesien hebben Reynaer sprac des moeten si danc hebben wes dat mijn here ghebiet des en willick niet weder segghen Ic en gheers doch niet schoenre dan ghewonnen Laet mine magen die hier sijn comen tot mij Ic wil mi met hem bespreken Soe wes hem goet dunckt Si seiden dat docht hem beyden goet dats redene datmen den vrienden grote machtighe zaken te kennen gheue ende hoers raeds daer in pleghet Metdiens soe quam vrouwe sloppecade ende grymbaert die dasse hoer man Ende vrouwe rukenauwe met horen twee susteren /7388-7432/ Met biteluys ende vuylromp hoer twee soenen ende hatenete hoor dochter. die vledermuys ende die wezel Ende daer quammer meer dan twintich die daer niet gecomen en souden hebben haddet sake gheweest dat reynaert die camp verloren hadde So wien dat wel gaet die crighet lof ende ere Mer wyen dattet misualt daer en wil nyemant gheerne by wesen dye beuer ende den otter. pantecrote ende ordegale hoerre beyder wyue ende dye ostrole Dye maerter. ende die bunsinck. dat fret . dat hermel ende den eghel. dat ghenet ende dye muys\hont

[fol. 104v]

mitten eeckhoern. die voergingen quamen allegader. ende hoerre noch veel meer tot hem Om dat hi den kamp gewonnen hadde. ya die sulcke die eerstwerf grote claghe op hem deden die waren nv sijn naeste mage geworden Ende si toenden hem zeer vriendelike gonsten ende daer toe goet ghelaet Aldus is noch der werelde loep diet al wel gaet die criget vele magen die hem die weelde helpen dragen Mer wie dat noot oft liden heeft die vint luttel magen die hem toe tiden Ende men scuwet hem alle wege den wech Men dreef daer grote feeste Si peepen daer mit scalmeyen ende bombarden si bliesen die trompetten Si seiden al gemeyne Lieue neue reynaert die vos god si des gheloeft dat v aldus wel vergaen is. wi waren in so groten anxt doe wij v onder sagen leggen Reynaert die dancte hem vriendelic alle sine maghen ghemeyn Ende hi ontfincse vriendelic met groter waerdigher vroechden Doe vragheden hi wat si rieden Of hi den coninc den camp geuen woude. vrou slopecade die sprack Ia ghi neue ghi moecht v des met eren belouen Doe ghinghen si samelic metten crijtwaerders totten coninck ende reynaert die ginc voer hem allen Men trompte daer. men peep daer men dreef daer grote vrogede Reynaert die viel den coninck te voeten

[fol. 105r]

die coninc die dede /7432-7474/ hem weder opstaen ende sprac Reynaert ghi sijt nv blide ghi hebt uwen dach eerliken bewaert Ic laet v vry quijt Ende dit gescheel tusschen v tween dat houde ic an mi Ende dat wil ic redelike neder leggen Ende ick wil daer of doen bi raede van minen edelen mannen wes man sculdich is te doen Ende wanneer dat ysegrym ghenesen is Soe sal ic v ontbieden bi mi te comen Ende dan soe sal ic daer een wtsprake of god wil of doen