Historie van Reynaert die vos

[Cap. XXXII.] Van reynaerts maghen wie si sijn dye hem bestaen

[fol. 69v]

DAt eerste kint hiet biteluys dat heb ic altoes lief gehadt. want men vant nye geen also cloec om een vuyl out hemde of een broeck die nadich is mit vele knopen

/51145165/ datte ouerlopen ende te besien. ende te suueren vanden gaudinen die cockinen boeuen ende rybauden die hebbenen zere wtuercoren Si gheuen hem vette telgueren ende appelen die si ter goeder luden huyse crighen Soe gaet dan biteluys hoer ghereten plaggen weder besueken also si die besweet ende ongedwogen lieten liggen sonder wasschen tot verrotten toe daer die ghene in groeyen die si te bitene pleghen. ende die verstoten si alsoe mitten naghelen ende si wriuen alsoe die cledere tsamen al stuckelinen Hier can hem mijn lief soen alsoe wel in regieren also dat si sijns alte noede ontberen Si brenghen hem mere teten dan hi mach vulromp sijn broeder die criget daer grote bate van. want hi is soe plomp van sinnen ende also slecht Soe dat hi nauwelijcken wit voor groen en kent hij soude dick gebrec lijden Mer byteluys vult hem den mont met sijnre spisen die hem ghegheuen wort Doch so heeft vulromp een grote doghet ouer hem Hi is oeck soe vrienthout ende stout van herten dat hij wael bij sinen vrient doet bleue eer hij hem ter noot of ghinghe Hier omme

[fol. 70r]

heb icken zere lief Mijn derde kijnt dat is een dochter die ic zere lief hebbe. ende heit hatenete ende si is cluftich ende sere neerachtich op hoefden diemen noede doet scheren onghedwogen mit langhen haer. die dienstmaghede die gaerne langhe inder nacht dansen. ende des morgens dan lange slapen ende seer vuydich sijn dat si hoer hoeft niet en dwaen noch hoer haer niet en kemmen ende laten verwerren Soe groeyt dat vol neten. die hem dat hoeft doerwroeten ende doervreten Soe gaen si cnouwen ende wriuen Mer si en laten bitens niet of Mer si biten dan veel te onsachter. soe comen si dan te hatenete mynre dochter ende doen dien couel ende die huyue of. soe kan si hem die beste bate doen. want si is snel in die grepe Hier om soe pleghen sise sere wel met broede mit appelen met peeren ende noten vele mere dan sijs behoeft te presen\teren /5167-5210/ Ende dat deylt si vuylromp hoeren broeder mede. soe ick die moeder ben soe sie ick dit gheerne dat si malcanderen aldus trouwe sijn Doe riepse rukenauwe tot hoor ende si quamen bi hoor staen Sy waren alsoe lelick als barrabas ende so groot als die moeder Willecome sprack vrouwe rukenauwe mijn lieue schoene kindere coemt ende staet hier by reynaer uwen lieuen neue Doe sprac

[fol. 70v]

si voert Coemt allegader die mi ende reynaer bestaen Laet ons den coninc bidden dat hi reynaer recht vanden lande doe Doe quam daer menich dier gerade Inden eersten die das mit sinen wiue vrouwe slopecade dat eechorn. ende die muushont dat fluwijn. ende die marter. die beuer mit sinen wiue ordegale. die genette ende die ostrole die bonssinc. ende dat foret Dese laetste twe die waren reynaer sijn eerste lede. want si eten oec gheerne hoenre Den otter dies soudic noede vergheten. ende pantecroet sijn wijf Nochtant soe waren si mitten beuer te voeren reynaer viande Mer si en dorsten vrouwe rukennauwe niet verhoren. want si ontsagense zere Oec soe was si dat hoeft van horen maghen wijs van raede ende sere ontsien Daer quamender noch mere dan twintich hoer te lieue bi reynaer staende Als vrouwe atrote quante ende slieue hoer twe susteren die quamen mede. die wesel dat hermel ende den egel. die vledermuijs. die biteluys ende sijn moye vrouwe altrote die ontfingen dese seer guettelijck. want dat waren hoer speleghenoeten. die waterrotte ende dat waterhoen. dat feries ende lossen. ende nochtans wel viertich andere dieren die ic al niet ghenomen en can die sijn tsamen by reynaer ghecomen

/5211-5260/

[fol. 71r]

RVkenauwe heer coninc siet hier of reynaer enige mage heuet Here ghi moget ons node veriagen. wi sijn v trouwe ondersaten die hoer lijf ende hoer goet bi v laten souden haddijs te doen Al si di koen sterc ende machtich Onse willige vrientscappe en can v nochtans niet gescaden Laet hem reynaer wel beraden op dese sake die ghi hem tijt ende en can hi hem niet ontsculdigen So doet hem recht wi en gheren niet bet Ende dit en soude men billicx nyemant weygheren. die coninghinne die sprac Dit seide ic hem ghisteren Mer hi was so felle dat hi daer niet nae horen en woude Die lupaert fyrapeel die seide oeck mede. heer coninc ghi en moget niet vorder rechten dan v manne en wysen Want woudi met ghewelt voert gaen inden rechten dat waer uwer cronen zeer oneerliken Hoert die woerde ende wederwoerde Ende daer beraet v wel nae hoe dat ghi nae den besten bescheyde dat beste recht gheschien sult laten Die coninck sprack dit is al waer Mer ic was soe rechte zere gestoert doe my van kywaerts hoefde ende sijn doot te monde quam dat dede my soe heet ende soe haestich daer inne wesen Doch ic wille reynaer. spreken hoeren Can hij die ondaden veranwoerden diemen seit dat hij gedaen heeft ic laten gaerne quijt gaen

[fol. 71v]

Ende mede om beden wille van sinen goeden maghen Reynaer behaechde dese woerden zere wel Hij docht god ere mine moeye Sy heuet rijs weder begonnen doen bloeyen Si heuet zere wel aen mijn karre gecroeyen ic heb nv enen goeden voet op te dansen Ick wille nv wt minen oeghen sien Ende brengen dye schoenste loeghene voert die ye man gehoorde of ic brenghe my seluen wt deser noot