Historie van Reynaert die vos

[Cap. XXIV.] Hoe corbant die roeck ouer reynert claecht vander doot van sinen wiue

/3557-3606/

REcht doe die woerden ghesproken waren. doe quam daer corbant die roec gheuloghen inden ghedinghe voer den coninc ende sprack. Lieue heer. hoert mi. ic brenghe hier een maer van iammerliken claghen Ic ghinc huden morghen mit scerpenebbe minen wiue spelen daer lach reynert die vos op die heyde neder gelijc enen doden keytiue Sijn oghen staerden hem ende sijn tonghe die hinck hem verre wt sinen monde. recht als een hont die doot ware. ende sijn kele die was wide op gheloken. wi bedreuen beyde vele rouwen om sinen doot. wi tasten hem aen sinen buyck. mer wi en vonden daer gheen lijf noch leuen Doe ghinck mijn wijf staen luusteren voer sinen mont of hi enighen adem in hadde dat hoer seer misuiel. want die valsche felle reynert die wachte wel vlytelic sinen slach ende doe hise sach sonder hoede staen. also na an sinen mont sloech hi sinen tanden mit groten nyde te samen ende beet hoer dat hoeft of Doe was ic billics seer bedroeft. ende ic riep lude O wi o wach wat gesciet daer Doe stont hi haestelic op ende snaude oec so ghyerliken na mi

[fol. 47v]

dat ic des doots anxte beuede ende vloech op enen boem ende sach van verre hoe dat dese valsche keytijf stont ende at soe ghierliken mijn leytuer drijf hi en liet daer vleysch noch been. anders dan een luttel vederen die cleyne plumen slant hi mede Hi was so hongherich hi hadder noch wel twee behoeft Doe sloep hi sijnre straten Doe vloech ick of mit groten rouwe ende misbare. ende las die vederen op om dat icse hier woude toenen Ic en woude noch in sulcken anxte niet staen als ic daer leet om dusentich marck des fijnsten goudes dat wt arabien ye ghequam: Here. heer coninc. hier siet dit ontfermelijcke werck Dit sijn die pennen van /3607-3646/ scarpenebbe mijnre lieuer vrouwen Here wildi macht of eer hebben. soe doet hier alsulcke dapperlicke wrake van. ende rechtinghe datmen van v houde. ende dat hem een yeghelijck dusdanigher saken hoede: want laet di aldus v gheleyde breken. ghi en selt ten lesten selue niet veylich wesen op uwer straten. want wat heren die ouer die quaden niet en rechten die sijn voer gode mede sculdich alle hoer misdaet Ende een yeghelijck die wil dan oec selue here wesen Lieue heer coninc wilt v hier voer hoeden