Historie van Reynaert die vos

[Cap. XXV.] Hoe hem die coninc seer verstoert

[fol. 48r]

Van deser claghen

NObel die coninc wert sere onstelt doe hi vanden conijn ende vanden roeke dese daghen ghehoert hadde Hi wert so gruweliken gryseliken an te sien sijn oghen die glimmeden als een vuyer. hi brijschede alsoe lude als een stier also dat alle dat hof van veruaernisse verstoerde Ten lesten sprac hi roepende. bi mijnre cronen ende bider trouwe die ic mijnre vrouwen gheloeft hebbe Ic sal dese misdaden alsoe hoghe wreken datmen daer langhe of te segghen sal weten. dat mijn gheleyde ende mijn ghebot aldus ghebroken is Ic was ouersot dat ic den scalck so lichtelic gheloefde die mi aldus versottet heeft. mit sijnre valscher gheueynsder spraken Hi seide mi. hi woude te roemen. ende van daen voert ouer tmeer Ic gaf hem palster ende male. ende maecte daer een pelgrym of. ende meende al waers Och wat can hi al valscher loser treken Hoe maecte hi die mouwe mit ons vol mit vlocken. mer dit dede mijn huysvrouwe altemael bi horen rade ist ghesciet Doch ick en ben des alleen niet die bider vrouwen rade bedrogen is. daer oec menige grote scade bi gheleden is. Ick bidde ende /3646-3701/ ghebiede. alle die ghene die mijn vrientscap ende mijn hulde begheren. sijn si hier of waer si sijn Dat si mit raede

[fol. 48v]

ende mit wercken mi wel helpen wreken dese grote ouerdaet. so dat ic in eeren bliue ende ons dese scalck in spotte onser heerliker eeren niet meer en beroue Ic wil selue mitten liue al dat ic vermach al ter stont daer toe helpen

ISegrym ende bruyn die belacheden des conincs woerden wel. ende verhoepten hem te samen op reynert noch een deel te wreken. mer si en dorsten een woert niet spreken Die coninc die was so seer gestoert. also dat daer nyemant wel spreken en dorst Ten lesten sprack die coninghinne Syre pour dieu ne croes mye thoutechoses que on vous die et ne iures pas legierement Gheen man van eren en sal te licht ghelouen noch hoghe sweren eer hi die sake al wel claer weet Ende men sal oec die wederwoerden horen Die menighe claghet ende doet opten anderen waer hi daer bi hi soude des lichte wel verdraghen Audi alteram partem Die menighe claghet hi misdoet selue meest Ic hebbe seker reynert voer goet ghehouden Ende op dat hi ymmer gheen loesheyt en dochte. daer om halp ic hem al dat ic mocht. mer hoe dattet coemt of gaet. is hi quaet of is hi goet. om uwer eeren wille soude mi verduncken dat ghi v hier yet in op hem verhaesten soudet. dat soude v sere

[fol. 49r]

mistaen. want hi en mach v doch niet ontvlyen Ghi en moecht hem vanghen of ontvlyen Ende hi moet v oerdel ende uwen toernighen wille doch wachten Doe sprac fyrapel die lupaert Here coninc mijn vrouwe die seit v waer doet wel ende volghet hoer ende neemt raet mit uwen wisen rade Ende vintmen hem inder misdaet sculdich also hier nv gheclaghet is. soe latet ons hoechelick op hem wreken Coemt hi niet eer dat hof sceidet ende /3702-3754/ doet sijn onscout hier of. alsoe hi van rechts schuldich is te doene. soe doet dan dat ghi te rade wert mer al waer hi noch so quaet so en woude ic daer niet toe raden datmen hem bouen recht yet dede Isegrym die sprac heer fyrapel. des volghen wi alle gader men can des niet verbeteren Op dattet minen here den coninc alsoe te wille si. mer al waer reynaert te hants hier. ende dat hi hem deser twyer claghe al ontsculdichde. so soude ic nochtans voert brenghen daer hi sijn lijf an verbuert heeft. mer ick wil nv swighen om dat hi hier niet teghenwoerdich en is Ende nochtans heeft hi bouen al dat den coninck enen schat ghewijst ligghende in hulsterloe bi cryekenput nye en wart meerre loeghen gheloghen Daer mede heeft hi ons allen bedroghen. ende hi heeft mi ende bruynen seer gheschent Ick dar daer mijn lijf bi hem setten dat

[fol. 49v]

hi niet een woert waers en seide Nv roeft hi ende moert mede op die heyde allent dat voerbi sinen huse hene gaet Niet daer bi heer fyrapeel soe wat den coninck ende v goet duncket dat is moghelick dat dat alsoe gheschiet. mer hadde hi hier willen comen. hi heeft die maer bi des conincs bode al vernomen Die coninck sprac. wi en willen hem anders oeck niet ontbieden hier te comen. mer ick ghebiede alle den ghenen die mijn eere gheerne saghen dat si hem reyden teynden desen ses daghen. ende hem wel te versien omme te oerloghen Alle die ghene die ghescut of boghen hebben. donrebossen of bombaerdsen. te paerde ende te voetganghen al totten besitte van malperduys. ic sal reynert te niet maken ben ic anders een coninc Ghi heren wat segdi hier toe ghi wilt dat al gheerne doen. ende si riepen alle ghemeenlic ia wi heer coninc wanneer dat ghi wilt so willen wi alle mit v varen