Historie van Reynaert die vos

[Cap. XXII.] Hoe bellijn den ram ende al sijn geslachte ghegheuen wort in handen van ysegrim ende bruyn ende van hem ghedoot wort

DIe coninc sprac Dit wil ic gaerne doen Fyrapeel die lupaert die ghinck totten geuangenen Ten eersten. doe ontbant hyse. daer na sprac hi: ghi heren Ic breng v enen vasten vrede ende mede mijns heren hulde ende vrientscappe. hem is leet dat hi tegen v ye ghesproken of misdaen heeft Ende daer voer soe suldi ene schoen soene ende een schoen beteringhe hebben Hy sal v geuen bellijn den ram. ende daer toe al sine magen van nv tot doemsdaghe toe soe waer dat ghise vint Ist in velde of in woude dat ghi se vrylic moecht verbiten ende eten sonder broeken Ende oic so gheuet v die coninc dat ghij

[fol. 45v]

Reynaer ende alle sijn magen waer ghise beiagen cont eweliken quaet ende verdriet doen moget sonder misdoen Dese scone grote vriheden die wil v die coninc gheuen ewelic van hem te houden ende hier bi so wil die coninc /3461-3508/ dat ghi sijn hulde sweren sult ende hi en wil oec bi sinen sculden nymmermeer tegen v misdoen. doe dit ic rade v dat want ghi moecht dat mit groter eren doen Aldus soe wort dese soene bi fyrapeel den lupaert vriendelic verdinghet ende wel ghemaect Mer dat moste bellart den ram sinen tabbart ende sijn leuen costen Ende mede soe houden ysegryms magen dese vriheiden vanden coninc Ende dese veede ende nijt op alle bellijns geslachte si verbiten si seer waer si comen Dese veede die wert op een quade vre begonnen. want men conde se nye sint gesoenen Die coninc dede ter stont sijn hof xij. dage verlangen om bruyn ende ysegrym daer mede lof ende ere te doen Soe blide was hi der soenen die daer ghedingt ende ghemaket was