Historie van Reynaert die vos

[Cap. XX.] Hoe kywaert die hase ghedoot wort van reynaert

ALs reynaer voer die poerte quam sprac hij tot bellijn den ram neue ghi selt hier buten staende bliuen Ic ende kywaert sellen ingaen des wilt kywaert mede bidden op dat hi ermelijn mijn vrou wil helpen troesten ende helpen mi aen hoer ende an hoere kindere ende die mijn oerlof nemen Bellijn sprac. ic bidde hem dat hise met v wel troeste Mit dustanighen smekenden flatterenden woerden. so leyde hi kywaert ter quader vren met hem in sijn hol Daer vonden si vrou ermeline op die aerde leggen mit horen iongen die so sere gesorget hadden mit so groten anxte voer reynaer doot Mer doe si hem also in sach comen so was si also vol van blijscappen Ende doe si die male ende die palster ende die schonen vernam dat docht hoer wat vreemde wesen ende si sprac. lieue reyner hoe is v die reyse vergaen Hi sprac Ic was int hof geuangen Mer die coninc liet mi gaen Ick moet pellegrym werden Bruyn ende ysegrym die sijn

[fol. 41r]

ghesellen voer mi geworden Danc heb die coninc hi heeft ons kywert tot rechter soenen gegeuen onsen wil daer mede te doen Die coninc liede dat selue dat kywert die eerste was die ons tegen hem vryet Ende bider trouwen die ic v sculdich bin. ic werde rechte gram op kywert Als kywert dese woerde hoerde wort hi seer veruaert ende woude vlien. mer hi en mocht niet. want reynaer die had hem die poerte ondergaen Ende hi greep hem moerdeliken bider kelen. doe riep hi seer vreselic help bellijn. help waer si di Dese pelgrimme doot mi. mer dat roepen dat was cort ghedaen. want reynaer die hadde hem ter stont die kele ontween gebeten: doe sprac hi. nv gae wi /3126-3180/ eten desen goeden vetten hase die ionghe welpen quamen mede Aldus ghingen si te samen eten. ende hielden grote feeste. want kywert die had enen zere vetten lichaem. ermelijn reynaers wijf si at dat vleysch ende si dranc dat bloet. si bat gode dicke den coninc te dancken dat hi hoer so wel verhoecht had Reynaer die sprac Eet so vele als ghijs moeget hi begeert genoech voer ons te betalen willen wijt selue halen

HI sprac Reynaer ic geloue dat ghi mi spottet Segt mi doch die waerheit hoe ghi van daen gecomen sijt Vrouwe ic hebbe den coninck ende die coninghinne also ghehuuft Also dat ic gelo\ue

[fol. 41v]

dat die vrientscappen tusschen hem ende ons te hant zeer dunne is Ende als hi noch van alle dat waer verneemt so sel hi des noch cranc werden Ende hi sal mi haesteliken volgen Ende hij sal mi bi mijnre kelen hangen willen Daer om willen wi ons van hier stelen in een ander schoen foreest daer wi sonder vrese wesen moghen Ende daermen ons in seuen iaren noch in meer niet vinden en sal connen. daer is planteit van goeder spisen ende snyppen van partrysen ende van veel andere wilden vogelen Vrouwe op dat ghy mit mi wilt wi willen derwaert daer sijn soete fonteynen ende schoen claer loopende beeken Here god wat soeter lucht is daer wy mogen daer vrede ende ghemac hebben ende leuen in groter weelden Want die coninc heeft mi op dat laten gaen dat ick hem enen schat wijsde op kryekenput Mer hij en sal daer niet vijnden. al socht hij ewelick Dit sal hem alte seer toernen als hij vint dat hij aldus bedroeghen is Wat meendi hoe menighe schone logen moest ick voertbrenghen eer ick ontghinck Het was so nauwe dat ic niet ghehangen en wort Ick en quam nye in meerre noot ende in groter anxte mijnre doot Als ick daer voer minen oghen sach Het gae voert an met mi hoet wille Ic en laet my nymmermeer daer toe brenghen dat ick

[fol. 42r]

meer in des /3180-3240/ conincs genade come Ic hebbe te hant minen duym wt sinen monde gecregen des dancke ic minen subtilen vonden

VRouwe ermelijn sprac reynaer. ic en rade ons niet in een ander woestine te varen daerwi vreemde ende elendich wesen souden wi hebben hier al ons begheren Ende ghi sijt hier ons buerhere Waerom willen wi dat goede ouer gheuen ende auenturent in een quaet te comen wi mogen hier seker ghenoch wesen Al woude die coninc ons enen ouerlast doen ende woude ons besitten. hier sijn soe vele sidelgaten. also dat wi veel te tyde ontrumen wi en moghen ons mitten bliuen niet versumen. wi weten doch die wiken hier ouer alle. eer hi ons met crachten vangen sal. daer sal vele toe horen Mer dat ghi hem gesworen hebt dat ghi ouer meer varen selt ende daer bliuen. dat is daer ic mi meest an stoete Neen vrouwe stoet v daer niet an. hoe meer ghesworen. hoe meer verloren Ic beriet mi eens met enen goeden man. die seide mi bedwonghen eede die en doden niet Al dede ic dese reise ten soude mi niet een cattenstart baten Ic wil hier bliuen nv ghijt mi raet Ic mocht dat een anderen weghe quader vijnden wil my dye coninc in verdriet brenghen des soe wil ic wel wachten Al is hy mi te machtich Noch\tans

[fol. 42v]

so meende ic hem mit listicheit te vercloeken Ic wil minen sac ontbinden wil hijt quaet soeken hi salt quaet vinden

NV wort bellijn die ram toernich dat kywaert sijn geselle also lange merrede in dat hol Ende riep lude Coemt hier wt kywaert In des duuels name hoe lange sal v reynaer daer houden. haest uwer ende coemt wt laet ons reysen Als reyner dat hoerde ginc hi wt ende sprac al stille tot bellijn. ende seide. lieue bellijn waer om toerndi v. kywaert sprect teghen sijnre lieuer moeyen. dat en soude v moegelike niet verdrieten. kywaert die seide mi. gy moecht wel saftelike voer gaen hi moet hier noch een weynich toeuen bi sijnre moeyen ende bi hoer iongen /3241-3292/ die soe sere screyen ende misberen dat ick hem ontuaren sal Bellijn sprac Reynar segt mi. wat dede kiwert hoerde ic dat te degen Soe riep hi lude help mi Reynar sprac wat segdi bellijn Meendi dat hem quaet gheschien soude Nv hoert wat wi doe deden doe ic inden huse quam ende ermeline vernam an mi dat ic ouer meer varen woude Doe wort hoer herte also wee dat si lange bezwijmt lach Ende als kywaert van sijnre moyen dit sach doe riep hi bellijn vrij heelt coemt hier ende helpt mi mijnre moeyen lauen si is in onmachte. dit soe riep hij met naersten sinnen

[fol. 43r]

Doe sprac bellijn die ram Trouwen ic verstont wale dat kywaert groot misbaer dreef Ick meende of hem anders yet gheweest waer Reynaer sprac trouwen neent Eer kywaert minen neue tot minen huse yet anders dan goet wedervoere Ic had lieuer dat minen wiue ende minen kinderen veel leids gheschiede