Historie van Reynaert die vos

[Cap. XIX.] Hoe ysegrym ende sijn vrou eerswijn hem mosten laten ontscoeyen Ende hoe reynaert dye schoen an toech om daer mede te romen te gaen

ALdus soe heeft dese valsche pellegrim geworuen van ysegrim twee scoen van sinen voeten diemen hem mitten claeuwen ten zenen toe af dede Ghi en saget nie vogel diemen braude also stille. ysegrym en was also stille doemen hem dese scoen also oneffen wt dede dat hi niet een lit en verruerde die voeten bloeden hem te male zeer Doe ysegrym aldus ontscoeyt was doe most vrou eerswijn sijn wijf legghen gaen in dat gras met enen droeuen sinne ende si liet horen aftersten voeten die scoen of doen Nv verblide hem reynaer sere ende seide tot sijnre moeyen in schympe Mijn lieue moeye in hoe menich verdriet hebdi /2897-2952/ om minen wille geweest dat mi al leet is sonder dit. dit is mi lief. want ghij sijt mi gheloeflike die liefste van al minen magen Daer om soe draghe ic gheerne uwe schoen Ghi sult mede vanden paerdoen deelachtich wesen dat ic mit uwen scoenen ouer tmeer halen sal ende verdienen Vrouwe eerswyne die was so wee dat si nauwe gespreken en conde Noch\tans

[fol. 38v]

seide si Ay reynaer dat ghi uwen wille aldus wale siet dat wil god noch wreken: ysegrim ende sijn geselle bruyn die swegen al stille Hem was seer swaer te moede. want si waren ghebonden ende sere gewont had tybert die cater tot dier tijt daer geweest hi soude hem oec wel een voetwater gewermt hebben Also dat hi daer niet sonder scade of scande van gescheiden soude hebben

DEs anderen dages doe die sonne op ghinc doe dede reynaer sijn scoen smeren die ysegrym ende vrouwe eerswijn te voeren toe behoirde ende hi dede si vast om sijn voeten binden Ende hi ghinc daer hi den coninc ende die coninghinne vant ende sprac mit bliden sinne Ghenadige here ende vrouwe god gheue v goeden dach Ende met groten rechte gheue ic v prijs lieue vrouwe Nv doet reynaer uwen trouwen knecht gheuen palster ende mael dat ic gaen mach Doe dede die coninck ter stont vraghen omme den paep bellijn den ram Ende doe hi voer den coninc quam doe seide die coninc heer bellijn ghi selt reynaer misse doen hi sal reysen ende gheuen hem mael ende staf Bellijn antwoerde den coninck lieue here Ic en dar des niet doen. want hi seyt dat hi is in des paeus banne Die coninc sprac wat ist dan Meester gelijs die seit ons Al had een man also vele sonden ghedaen als alle dye

[fol. 39r]

werelt Ende woude hi die sonden begeuen ende laten ende te biechten gaen ende penitencie daer af ontfaen ende bi des priesters rade voldoen God die sal hem ghe\nadich /2952-3011/ wesen Nv wil reynaer ouer tmeer varen daer mach hi hem van sinen sonden claren Bellijn die sprac weder totten coninc. ic en doe reynaer recht noch crom. ghi en hout mi vanden gheesteliken rechte quijt ende scadeloes voer den bisscop prendeloir ende voerden prouisoere heer loesvont ende van heer rapiamus sinen deeken. die coninc wort in hem seluen toernich ende seide Ic en bidde v dus vele in enen haluen iaer. ic had lieuer dat ic v hinge bi uwer kelen eer dat ic v op een ander tijt alsoe vele bade Doe bellijn hoerde dat die coninc op hem toernich wert doe wert hi alsoe zeer veruaert dat hi van groten anxte beuede Ende ghinc totten outaer waert in sinen boeken singhen ende lesen dat selue dat hem goet dochte wesen ouer reynaer die daer luttel achtede dan dat hi die edel ere gaerne hadde

DOe bellijn die cappellaen sinen dienst ende die ghetide vanden daghe oetmoedelijc had ghedaen. doe hinc hi reynaer an den hals ene maele scarpe van bruynen velle Ende een cleyn palsterkijn daer bi Doe was reynaer

[fol. 39v]

bereyt tot sijnre vaert Doe sach hij totten coninc wert ende liet beueynsde tranen vallen ouer sine roede granen Recht dus oft hem in sijn herte iammerde Mer had hi enigen rou in sijn herte dat was daer om dat hi alle die anderen die hij daer liet alsulcke pine niet beraden en mochte Als hi ysegrim ende heer brunen gedaen had Nochtans stont hi ende bat hem allen dat si voor hem bidden souden also getrouwelic als si wouden dat hi voer hem bade Reynaer bedocht hem dat hi riue langhe merrede. want hi was als die gene die hem seluen sculdich kent Die coninc sprac Reynaer dat is my leet dat ghi aldus haestich sijt Neen heer coninck dat is groot tijt Men sal gheen weldaet sparen O lieue here geuet my oerlof ic moet doer Die coninc sprac hebt goods oerlof. ende hi geboet ouer al dat hof dat si allegader met reynaer wt gaen wouden sonder ysegrim ende bruyn die daer gheuanghen lagen die /3012-3067/ waren soe seer ghewont dat si wensten om den doot Nyemant en moest daer rouwich of droeuich wesen hy en hadde reynaer desen pellegrym ghesien hoe persoenliken hi doe ghinc ende hoe hem sijn mael ende palster om sinen hals hinc Ende sijn schoen aen sijn voeten hi en had hier om moeten lachen hy hielt hem van buten wijsselic Mer hi lachede in sijn herte dat si alle

[fol. 40r]

mit so groter versaminge mit hem ghinghen die hem cortelic alsoe wreet gheweest hadden Ende hi den coninc die hem oec so leet hadde. so wel tot enen dwase hadde gebrocht Het was doch een pellegrym van doys aes

HEer coninc sprac hi nv keert weder Ic en wille doer hoech of doer leech dat ghij vorder gaet Ic duchte v mochte daer quaet of schien Ghi hebt daer twee moerdenaers gheuangen geuielt dat si ontgingen Ghi sout v mere wachten moeten dan ghi ye te voeren gedeet Lieue here blijft gesont ende laet mi gaen Mit desen woerden ghinc hi op sijn afterste voet staen ende vermaende die dieren groot ende cleyn wouden si van sijnre weldaet deelachtich werden dat si voir hem beden Si seiden alle dat si sijnre in horen ghebeden naersteliken gedencken souden Nv schiet Reynaer van den coninc mit soe droefliken schine dattet den sommen iammerde Ende hi sprac tot kywert den hase ende tot bellijn den ram karmelike ende seide lieue vriende sullen wi nv scheyden Ghi sult oft god wil onder v beiden mi veer gheleiden ghi twee en maecten mij nye toornich ghi sijt ghenoechlic mede te wanderen ghi sijt goedertieren omberoepen ende ombeclaget van allen dieren Ghi sijt van goeden seden ende mede gheestelic van leuen. ghi leuet beide als ic dede

[fol. 40v]

doe ic een clusenaer was Hebdi loueren ende gras ghi sijt te vreden ghi en geuet om broede om vleysche noch om enigerhande /3067-3126/ spyse Met dustanigen schoenen woerden So heeft reynaer dese twee versot dat si voert met hem gingen tot dat si quamen voer sijn huus tot malperduys