Historie van Reynaert die vos

[Cap. XVIII.] Hoe ysegrim ende bruyn geuangen worden ouermits toedoen van reynaert

ISegrym die quam geweldelic opten velde voer den coninc Ende hi dancte der coninghinnen ende sprac met enen fellen sinne quade woorde op reynaer Also dattie coninc toernich wert ende dede ysegrim ende bruyn ter stont vangen ende binden Ghi en saget nye verwoeden honden meer scanden doen dan men dede Men bantse alle beyde so vast ende so sere dat si binnen alle dier nacht hande noch voete rueren en mochten Sy en mochten nauwelic een lit verroeren Nv hoert

[fol. 37v]

doch toe hoe dat hem reynaer voert dede Alsoe hi dese seer leet had So verwerf hi ander coninginnen dat men bruijn wt sijn rugge sneet van sinen velle enen voet lanc ende enen voet breet datmen hem teenre scerpe gaf Nv waer reynaer al rede had hi vier stercke scoen Nv hoert hoe hi hier in dede dat hi die scoen gewan Hi sprac totter coninghinnen Vrouwe ic ben v pellegrym Hier is /2850-2897/ mijn oem heer ysegrim die heeft vier vaste scoen die goet waren voer mi woude hi mi der twee of doen Ic woude opten wege uwer sielen naersteliken gedencken. want dat recht is dat een yeghelic pellegrim opten wege in sinen gebede gedencken sal alles goedes dat hem gedaen is Aldus so moechdi v siele schoeyen of ghi wilt Ende wildi vrouwe eerswijn mijnre moyen oic twee scoen doen geuen van horen scoenen Si mach dat wel met eren doen Si blijft doch alle wege in huus in gemake Doe sprac die coninghinne Reynaer ghi en moechter niet ontberen ghij en hebt dustanige scoen daer ghi ynne verwaert sijt uwe voeten gans te bliuen mede te gaen ouer die menichuoudige scerpe berghe struyken ende steenroodsen Ghi en moghet gheen schoene die beter sijn daer toe vinden soe starck ende soe goet als ysegrym ende sijn wijf draghen Al soude dat hem an hoer lijf gaen so moeten v elc\ke

[fol. 38r]

twee schoen gheuen. uwe hoge bedeuaert mede te doen