|
| |
| |
| |
- XX - [Ghy, menschen, die naeckt ter weirelt geboren // sydt]
Ghy, menschen, die naeckt ter weirelt geboren // sydt,
armer dan tkicxken dat wt den doren // splydt,
& nu gierich vol hooverdyen swelt;
ghy, groote hansen, die met vergulde sporen // rydt,
& u contooren // wydt // vervult hebt met gelt,
overdinckt wat tegen u schriftuere vertelt,
Lucae, int eerste, tis sonder gecken:
den machtigen heeft Godt wt den stoel geveldt,
den rycken verlaten en ydel gestelt.
Noch vindy beschreven, op ander plecken:
men sou eer een kemel duer een naelde trecken,
eer de rycke inden hemel soude swermen.
Neemt exempel aenden rycken vrecken;
laet u verwecken // om ws naesten ontfermen:
doet u charitate den ermen huysermen.
| |
| |
Ghy, menschen, die van uwen buyck uwen Godt // maeckt
pasteyen, pertrysen & hutspot // smaeckt,
die noch rispende wt der kelen stincken,
ghy, fortse dronckaerts, die schalen & noot // craeckt,
& Godts gebodt // laeckt //, wilt u broeders gedincken.
Hy sterft van honger, hy en heeft wat drincken,
hem en mach nu sat, water & broots gebueren;
ghy ryckaers, gebont, gefluweelt, in sweirels blincken,
ghy laet de motten u cleeren mincken,
& u broeder gaet naeckt voerby u dueren.
Och! hoe swaerlyc salmen u noch controlueren
u rekeninge, als comt den dach van wachermen!
Betert u, wilt met Martino, sonder trueren,
uwen mantel schueren // om slichaems verwermen:
doet u charitate den ermen huysermen.
Ghy, wellustige, diet mutsken int loeren // weeft,
u goet coppelersen, boeven en hoeren // gheeft,
die honden, peerden & vogelen onderhout;
ghy, die opt sweet & bloet vande boeren // leeft,
en int beroeren // sneeft // ws broeders erm en cout;
ghy, die groote sloten & palleysen bout
| |
| |
& dlant metter mylen coopt in veel contreyen,
bisdommen, prelatueren, menichfout,
eeldommen, dingniteyten met silver en gout,
comt & aenhoort ws naesten bitter schreyen;
wilt compassie in u herte spreyen,
eer u de doot bestoot met hueren allermen;
gheeft; mildelyc eer ghy van hier moet scheyen;
tsal u bereyen // een eeuwich ontfermen:
doet u charitate den ermen huysermen.
Doet u charitate, sy maeckt u van sonden // vry;
gheeft aelmoessen, daer is salicheyt bevonden // by;
aelmoessen is een voerbidtster voer Godt almachtich,
aelmoessen schuert den hemel, hoe hy gebonden // sy,
aelmoessen orconden // wy // boven duechden crachtich,
aelmoessen is den grooten aflaet warachtich,
aelmoessen verlost u vander helscher pynen,
aelmoessen maeckt u Godts lyden deelachtich,
aelmoessen is u naerder doot gedachtich,
als vrinden, magen, gelt & goet verdwynen.
Godt is de heere, gheeft hem vanden synen,
& u broeder is doch u vlees, u bloet, u dermen;
| |
| |
deylt mildelyc, u sal te meer verschynen,
tallen termynen //, tsy Hans, Claes oft Hermen:
doet u charitate den ermen huysermen.
Alle menschen // die wenschen // nae deeuwich verblyen;
bemint Godt //, dats meeste gebodt; // mer nae dyen,
weest uwen broeder // een behoeder // met sinnen;
deelt hem ter noot // u broot // en dranck by tyen,
wilt aensien syn lyen // wt rechter minnen.
Den pelgrim huyst//, syn onreyn cuyst//: ghy sult meer winnen;
den siecken laeft, // den dooden graeft//: Godt salt bekinnen;
den bedruckten helpt, // syn lyden stelpt //, geeft hem raet;
den jongen leert //, den sondaer bekeert // van syn misdaet;
vergeeft, // soo lange ghy leeft //, hoort de erme kermen;
doet elcken goet //, want soo ghy doet //, tsy goet oft quaet,
tis soo jaet //, dat wordt u saet //, ten baet geen schermen:
doet u charitate den ermen huysermen.
Ghy siet voncxkens wt herde steenen springen,
ghy siet iser & stael metter vier bedwingen,
| |
| |
& noch blyffdy verherdt in u gierich leven.
Siet Jesum die de Joden aent cruyse hingen,
die alle dingen // soo mildelyc heeft gegeven:
syn lyff, syn bloet, syn siel boven schreven,
en was u Godt, u schepper, u meester & heere;
vermorwet u doch int heete bloet Christy verheven,
gheeft secretelyc, schout des weirels eere,
gheeft vanden besten, gheeft mildelyc & seere;
soo moechdy hooren: comt myns vaders beminde,
besidt dat rycke dat u tot allen keere,
naer myn leere //, bereedt is sonder inde:
doet u charitate & blust ws naesten allinde.
|
|
Auteursrechtvrij