Den Redenrijke constliefhebbers stichtelicke recreatie

[fol. T4v]

Haerlem de Ionge Camer, den Wijngaert Ranck Liedeken.

Op een Musijcksche wijse: Plentgen van Brusel heeft op gheset.

Liedeken.

MARS wreet // heeft fel, breet // ons aenghetast,
Ons leet // hy bereet // als onweert Gast,
Rontsom hy deet // luyt schellen,
Alarm, Alarm, Alarme,, Alarm, Alarm, Alarme,
Tout A la standaert,, Tout A la standaert,
Fan fariratiran,, Fan farirariran,
Die hem ten crijch wil stellen,
Den Boeren slaet // ter Hoeren baet,
Den Boeren slaet // der Hoeren baet,
Wilt den Lanci fel, vellen,
Bataviers hebben verstaen,
Dat MARS fel quaem trecken ter baen,
Sy waren oock niet sonder vresen // door desen,
Maer keerden hem of,
Begingen groot Lof,
Bouen Romeynen ghepresen,

Refereyn.

VAnden Romeynen, door Wapenen, ongeoefent Volc verslegen,
Oft teghenstaende heur Vyanden swacken macht,
Een gheduyrighe Lof, der daden onverswegen,
Door dies ten Oorlogh, hoochmoedich ghenegen,
Maer niet minder die Bataviers moeten zijn gheacht,
Die so veel als sy, vrymoedich Crijchs-handeling plegen,
Hoe wel na gheen Werltsche Eer, en wert ghetracht,
Maer heur defenderen om niet te werden overcracht,
Door t'ghewelt MARTIS twelck hem wreet verclaerden,
Ouer Mannen, Wijf, en Kinderen, handelende onsacht,
Gheen teghen stant doende die Stadt van Naerden,
Waer deur den Batavier, als twreet seyt heur vervaerden,
Daer tegen willen defenderen den cleynen,
In als seer wel queeten heur als den vermaerden,
Alsulcke Bataviers overtreffen d'oude Romeynen.

Liedeken.

t'Ancoom // terstont Vroom // teghenstonden,

On loom // groot den stroom // haest ontbonden,
Tot Haerlem toom // aendeden,
Alarm, Alarm, Alarme,, Alarm, Alarm, Alarme,

[fol. U1r]

 

Tout a la standaert,, Tout a la standaert,

 

Fan fariratiran,, fan farirariran,

 

Haer wert die Stadt bestreden,

 

Vyt Rotterdam,, Delft Leyden quam,

 

Vyt Rotterdam,, Delft Leyden quam,

 

Menich vroom man aenghetreeden,

 

Noorthollanders wel ghemoet,

 

Te Scheep snel // hebben op den vloet,

 

Haest veriaecht van zee // zijn Armaden,, gestaden,

 

Den Admirael groot,

 

Veel quamen in noot,

 

Zijn t'gheen Romeynsche groot daden.

Refereyn.

Men s'Vyants aencoomst gheweldich vernam op Sparendam,

Maer het ijs was haer brugghe en deden ons vluchten,
En mettet gheweldicht leger voor Haerlem aenquam,
Ghegeuen tot plonder op dien weesende gram,
Onmogelick om wederstaen liepen die gheruchten,
Maer Gecorragieert door Nassouwe hooch loflicke,
Tersont den wapenen aen die daer saten en suchten,
Dat sy gheensins souden wederstaen men gheduchten,
Maer Vailliant hebben vrymoedich spits afghebeten,
Metter tijt vyandelick, rontsom beset, aen alle ghehuchten,
Gheraeckten in honghers noot, en hadden niet meer om eten,
Vuyt Suythollant tot ontset de ghetrouwen gheseten,
Deerlick verslagen waerdich cransen der Rosemereynen,
De Stadt overghegeuen, die vroomen ghedoot met niet vergeten,
Alsulcke Bataviers overtreffen d'oude Romeynen.

Liedeken.

t'Aalckmaer, Kasbroots Boer // rontsom beset,

Aenuoer // ghetrou roer // werden belet,
Doen menich haer storm saghen,
Alarm, Alarm, Alarme,, Alarm, Alarm, Alarme,
Tout a la standaert,, Tout a la standaert,
Fan,, farirarian,, fan farirarian,
Den Vyant afgheslaghen,
Vertrock seer haest // zijnde verbaest,
Vertrock seer haest // zijnde verbaest,
Al wast hem tot mis haghen,
Een Calf uytter handt bevrijt,
Wel versien afweerden den strijt,
Men conden dat vel niet ghenaecken // gheraecken,
Veel hielden daer stant,
Voor het Vaders Lant,
Wie can dat Romeynsch missaecken.

Refereyn.

Den Vyant waenden te hebben een voet int Lant,

Maer vont de Waert huys tAlckmaer voor de Stadt,
Dien hy belegerden, beschoot bestormden, weerenderhant,
Werden afgheslaghen en bleef steecken in schant,
Hoe wel hy daer gheduerich stormen wilden maecken mat,
Veel der omleggende Dorpen, gheheel afghebrant,
Ten laetsten op braken, int sant veel metten Neus plat,
En driewerf belegerden Leyden heur weynich tot voordeel dat,
Hoe wel menich duysent van hongher binnen t'Stadt sturuen,
Tot Stads ontset veel Seeusche Bootsghesellen rat,
Groot Eer en danck door ghetrouwicheyt verwuruen,
Hoe wel duer sprinckvloet, Dijcken en Damme verduruen,
Sy deeden den Vyant vluchten, en cregen uyt die Stadt seynen,
Den vluchtende met slachswaerden den staert af kuruen,
Alsulcke Bataviers overtreffen d'oude Romeynen.

Liedeken.

Leyden,, verbeyden // t'sVyants gewelt,

Weyden // verscheyden // met Schansen telt,
Haer bereyden te vechten,
Alarm, Alarm, Alarme,, Alarm, Alarm, Alarme,
Tout a la standaert,, tout a la standaert,
Fan,, farirariran,, fan farirariran,
Hoe wel swack van Lansknechten,
Die Burgher al // deden uytval,
Die Burgher al // deden uytval,
Menich Feyt sy uytrechten,
Den Zeewen quamen tot baet,
Dees Stadt, al was in soberen staet,
Gheen Dijcken hilden meer den vloeden // behoeden,
Op datmen hier sou,
Dese Stadt ghetrou,
Meer dan Romeynsch te vermaerden.

Refereyn.

Prince.

Hoe wel veel vrome stoutmoedighen alhier zijn verslaghen,

Nochtans Lofwaerdich blijuen opgheset t'Leuen,
Heur deerlick overval Oudewater mach beclaghen,
Inwoonders Bestormt Vermoort ten ongheluckighen daghen,
Als vroome Capiteynen nochtans te verheuen,
Door teghenspoet den Vyant crijghen wel nederlaghen,
Schoohoven duer Vyanden gheleuert is te vergeuen,
Die cloeckmoedicheyt der Gouuernants ghenoech beschreuen,
Die van Woerden haer niet min cleynmoedich betrouden,

[fol. U2r]

 

Mars aensiende den cloeckmoedighsten haer altoos beneuen,

 

Die hy by beyde Partijen met een ghedencken Loonden,

 

Boysot Dong meer anderen met Gouden Cransen Croonden,

 

Heur Naem gheregistreert als die uytneemenster greynen,

 

By den Historij Schrijuers dies onder den Bataviers woonden,

 

Alsulcke Bataviers overteffen d'oude Romeynen.

Liedeken.

Prince.

Lijf, Bloet,, wel ghemoet // hebben ghewaecht,

Heur goet // teghenspoet // Oude Water claecht,
Deur t'Vyants, woet overval,
Alarm, Alarm, Alarme,, Alarm, Alarm, Alarme,
Tout a la standaert,, tout a la standaert,
Fan,, farirariran,, fan farirariran,
De Brant deet haer vluchten al,
In d'aschen geheel // Stads meestendeel,
In d'aschen geheel // Stads meestendeel,
Lof niet te min wesen sal,
Dees leet nieuwe maer niet verschrickt,
Die vander Gou,, noch werden swickt,
Veel Vyanden sy meer velden
Met Varre Iaghers,
Veel der Spietsen Draghers,
Bouen Romeynsch men sulcx stelden.

Lieft bouen al.