Den Redenrijke constliefhebbers stichtelicke recreatie

[fol. U2v]

Gouda int particulier.

LIet tot eer CapIteIInen ghegheVen,
Daer Inne zIIn VerhaeLt sonder sCheLden,
De trIVmphen onLangs bedreVen,
bII WIlt ghepresen bataVIersChe heLden.

Liedeken op de wijse: Alst begint.

Liedeken.

GHy Bataviersche Helden,
Capiteynen eerbaer,
Die t'leven publick stelden,
Tot Meurs, en Berck, voorwaer,
Zijt ghy waerdich te croonen,
Met Laurieren playsant,
Die soo veel machts gaet thoonen,
Voor volck int Vaders Lant.

Refereyn.

ALs Dvc d' ALBA begheerden met wreeden Regeur,
Wt dees Nederlanden door booser Allectie,
Van alle goeden, als oft hy hadde gheweest Posseseur,
Den Thiende penningh, op de correctie,
En so hier niemant dorst staen, onder zijn Subiectie,
Heeft de Ghemeente sulcx niet willen Consenteeren,
Socht ten eersten t'verderf, met quade Affectie,
T'welck u wel is indachtich, doort Resiteeren,
Die MET MINNEN VERSAEMT, en nu Prospereeren,
De Edele des Landts alle inwoonders daer beneven,
Oock de Heeren vander Oort, vrymoedich Accordeeren,
Voor haer Privilegien, en Domeynen, te stellen t'leuen,
Teghen desen Tyrand, waer in sy zijn ghebleven,
Tot noch toe volhardich, dus blijckt, dat sonder vercleynen,
Alsulcke Bataviers overtreffen d'oude Romeynen.

Liedeken.

Enscheden moet verhalen,

V wercken, gheeft nu Prijs,
Oldezeel zonder falen,
Oock Alpen seer Propijs,
Hoe ghy cloeck als Romeynen,
Blijft ten strijt Triumphant,
Aen Berghen, op Fonteynen,
Voort volck, int Vaders Lant.

[fol. U3r]

Refereyn.

Elck sterckt zijn Stadt, de Borhgers nae haer vermoghen,

Voeghen hun int gheweer, om te doen Defentie,
Maer ghy Haerlem vernaemt eerst Dom Fredricx Oorloghen,
Dertich duysent man hy verloren heeft in elcx Presentie,
Stormende vreselick door Violentie,
Ghy hebbet al wederstaen hoe grooten ghewelt,
Den Vyant versaecht, Wijf en Kint dede Diligentie,
Met uytvallen, ghy haer Schut, vernagelt hebt, en onstelt,
Ten nootdruft van Hongher zijnde ghequelt,
Paerde vleesch ghenut, Ghesouten huyen tot een versaden,
Catten, en Honden, noch argher, soo de Cronijck vermelt,
Schorsschen der Boomen ende Wijgaerts bladen,
Hebt Mijnen ghedolven versierde vrome daden,
Om dijn Stede te Salueren, dies noch in alle pleynen,
Alsulcke Bataviers overtreffen d'oude Romeynen.

Liedeken.

Inheel Asia crachtich,

Wert uwen Lof verbreyt,
Die Linghen wont eendrachtich,
Noch door menich vroom Feyt,
Otmarsen, Breuoort mede,
Dijn Eer is Abundant,
Als die ten camp staet reden,
Voort volck int Vaders Lant.

Refereyn.

Tot den ontset werden Apraet, noch Aidres ghespaert,

d'Omlegghende Steden quamen daer toe wt minnen,
Maer t'was anders voorsien d'Alckmaerders, noch onueruaert,
Soo Mans, Vrouwen, Ionghers, en Kindren int beginnen,
Wederstonden soo heftich drie Stormen van binnen,
Dat de Vyanden, den vierden wel naer lieten,
Op Schorel, en Crabbendam mochtense niet winnen,
Door der vromer Soldaten ende Huysluyden schieten,
O Leyden t'mocht Baldeus, wel verdrieten,
Als u inwoonders gheen Broot smaeckten in seuen weken,
Dat hy de Stadt in gheenderwijs conde ghenieten,
Iae noch seyden eerse souden van Apointement spreken,
D'een Handt lieuer t'eeten, met d'ander t'leet te wreken,
T'Waren Bouluyden, Borghers oft Capiteynen,
Al sulcke Bataviers overtreffen d'oude Romeynen.

[fol. U3v]

Liedeken.

Door America goedich

En Africa nu streckt,
De Fame overvloedich,
Vwer daden perfeckt,
Binnen Europa fijne,
Weet elck hoe ghy verwant,
Goer ende Groll met pijne,
Voort volck int Vaderslant.

Refereyn.

Prince.

d'Inlanders willen met malcander leuen en steruen,

Corrumperen dijcken, laten dwater ouer t'Lant loopen,
Aensien Hauen, Huysen, Hofsteden, noch Eruen,
Ghy dies t'Oudewater ginckt met de doot becoopen,
Dijn saken overleydet vondet gheen open,
Ontsteeckt de Stadt met vyer die gantschelijck verbrant,
Op dat u Partie, niet souden paerten met hoopen,
Vwe goeden en Patrimonien Triiumphant,
Nu de Helden // die haer bloot stelden // voor t'profijt van t'Lant,
Princen, ORANGIEN, de Heer van NOORTWIICK Edele,
BATENBVRCH, RIPHERT, RVYCHAVER, Ioos de NOOR Constant
GERRAERT de IONGHE, LOVYS BOISOD, wiens daet was veele,
Die haer noch voeghen, als dees int gheheele,
Met onsen NASSOVWEN vol trouwen teghens veel vileynen,
Alsulcke Bataviers overtreffen d'oude Romeynen.

Liedeken.

Prince.

Lof bouen Cordus leven,

Lof bouen SCIPIO,
Sy u Princen ghegheuen,
Lof bouen lof alsoo,
Ghy Cleophantus daden,
Aenvaet, vrienden Constant,
Mede des Crijchs ghewaden,
Voort volck int Vaders Lant.

Gods Wet is net.