Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio T3r]
| |
Liedeken.
GHy Bataviers cloeckmoedigh en Excelent,
V Trijumphen die moetmen prijsen,
Alst wel is ghebleken, ons wel bekent,
Waer door men u Naem siet rijsen,
Hoe den Duc d'Alf den wreden Vyant,
Quam om te bederuen ons Vaderslant,
Maer onse moet sachmen niet vercleynen,
Dats u Lof ghy vrome Capiteynen.
| |
Refereyn.
O Ghy vrome Bataviers, Lof en Eer moetmen u geuen,
Ghy die neempt met Godts hulp die wapens in die hant,
Tegen u Vyanden wreet, die u wilden doen sneuen,
Strijt vroom, Godt sal u doen wel alle bystant,
Bevrijt als vrome Helden u Vaders-lant,
Denckt dat ghy een eewighe Faem sult verweruen,
Godt sal zijn volck niet verlaten, maer behoeden voor schant,
Alst wel is ghebleken binnen ons Batavische eruen,
Tis beter voor Godts Woort te strijden en te steruen,
Dan dat ghy moordadich van die Tyrannen wert vermoort,
Haer voornemen en is niet dan ons lant te bederuen,
Daerom hout cloecke wacht, eer sy u comen aen boort,
Neemt voor al Godt tot u hulp, bidt dat hy u verhoort,
En met u wil strijden, laet u moet niet vercleynen,
Alsulcke Bataviers overtreffen d'oude Romeynen.
| |
Liedeken.Den Prins van Orangien als een vroom Helt,
Sachmen noyt ons beswijcken,
Hy heeft hem teghen den Tyran ghestelt,
Oock ghy Bataviers van ghelijcken,
Geertruydenberch hebt ghy verrast,
Stoutelick beclommen met menich Gast,
Binnen den Briel ginckt ghy niet schromen,
Maer stoutmoedich inghenomen.
| |
[Folio T3v]
| |
Refereyn.Die Romeynen hebben wel cloeck en vroom ghestreden,
Maer op haer vroomheyt seer gheroemt dach ende nacht,
V Sietmen niet minder in vrome daden nae treden,
Waer door ghy als vrome Camp-vechters hoogh wert gheacht,
Maer schrijft d'Overwinning niet toe u cracht of macht,
Dan Godt hier bouen, die u vroom helpt strijen voorwaer,
Denckt dat ghy met GEDEON treckt tegen een groot gheslacht,
Al vechtende sult ghy u cloeckmoedigh verblyden daer,
O ghy vrome Bataviers het blijckt nu int openbaer,
Dat Godt voorseker voor ons die wake hout,
Die ons eertijts hebben gedaen alle verdriet en lyden swaer,
Werden van Godt en duer u cloecke daden benout,
Den Prins van Orangien heeft immers op den Heer betrout,
Godt heeft hem noyt verlaeten met zijn vrome Capiteyenen,
Alsuclke Bataviers overtreffen d'oude Romeynen.
| |
Liedeken.Den Vyant raesde als een Wolf verwoet,
Om t'gehele lant te verdouen,
Te Naerden verstort veel onnosel bloet,
Verbrant, gheplondert en gaen rouen,
Voor Haerlem gecomen onbevreest,
Hy meende t'hadden een Coltuyn gheweest,
Maer door die vrome Bataviers van binnen,
Const hy die met ghewelt niet winnen,
| |
Refereyn.Heeft den Spaenschen Vyant niet ghehadt in zijn ghewelt,
Gheheel Batavien, so alsmen claerlick weten,
En heeft die Gemeente seer deerlick gequelt,
Met haer felle Tyranni waer sy waren geseten,
Menich vroom helt vermoort, en schandigh doorghesmeten,
Tot dattet Godt uyt den hoghen Hemel verdroot,
Die heeft veel vrome Helden verwreckt, en niet vergeten,
Onse bedruckte herten, die in lyden saten groot,
Met Godts hulp aenvaten sy 't Swaert inden tijt van noot,
En hebben den Spaenschen Vyant uyt haer Lant doen wijcken,
Veel onnosel bloet beschermt en bevrijt vanden doot,
Sy lieten als vrome Bataviers haer cloecke daden blijcken,
Met den Edelen Prins die haer niet ginck beswijcken,
Want Godt was haer lulper, betrouden sy met herten reynen,
Alsulcke Bataviers overtreffen d'oude Romenen.
| |
Liedeken.Voor Leyden en Alcmaer stiet hy zijn hooft,
Die Bataviers sachmen cloeck strijden,
Bossu werden van zijn macht berooft,
| |
[Folio T4r]
| |
Godt loofden wy doen ter Tijden,
Die vrome Capiteynen cloeck,
Dreuen hem uyt den Batavischen hoeck,
Al hadt hy mennich duysent Soldaten,
Batavien most hy verlaten,
| |
Refereyn.Prince. Hoe wel sy bloetdorstich den Prins hebben omghebrocht,
Schandelick doorschoten als verraders vol van quaden,
Godt heeft ons wederom met een Ionghen helt bedocht,
MAVRITIVS van Nassouwe geboren door Godts genaden,
Die met Godts hulp gedaen heeft veel vrome daden,
Maer Godt schrijft hy die macht toe die hem in alles is ontrent,
Oock zijn vrome Bataviers die hem cloeckelick raeden,
Geuen Godt die Victorij en hem maer een Instrument.
Wie sou anders connen spreken van d'overwinning ons ekent,
Dan Godt is die Werck-man diet al laet gheschieden,
Ghy Bataviers cloeckmoedich van Godt u niet en went,
Sonder twijfel u Vyanden sullen wel voor u vlieden,
Schout overdaet, quaet, leeft nae Godts gebieden,
Eer sult ghy bevechten, bevesticht u Batavische pleyen,
Alsulcke Bataviers overtreffen d'oude Romeynen.
| |
Liedeken.Prince. Ons Godt die inder eewicheyt leeft,
Heeft MAVRITIVS Hooch gheboren,
Met Victorij begaeft, waer door dat sneeft,
Den Vyant vol haet en toren,
Hoe menighen Stadt heeft hy benout,
Bouen die Romeynen alsment aen schout.
Machmen u Lof en Prijs wel geuen,
Ghy Bataviers hooch verheuen.
Lieft bouen all. |
|