|
| |
| |
| |
Noch vier Refereynen en Liedekens, die ter Liefden onbedwonghen,
Uande Const als Naewercken zijn ghepronuncieert en ghesonghen.
| |
| |
| |
Hamborch int Particulier. Liedeken
Op de Wijse: Laet ons met sanghe nu gaen verblijden.
Den Heer verblijden,, ghy Volck van Israel.
Liedeken.
O CALLIOPE helpt my dicteren
Den Lof narreren // van d'Edel Bataviers,
Die de Romeynen verre passeren,
Des sy Trijumpheren,, in alle d'uwiers,
Sy hebben ghewaecht als helden veel dangiers,
Teghen die Tyrannen // hun boghen ghespannen,
En hun overwonnen als vrome soldaniers.
| |
Refereyn.
GHelijk DAVID als een Schaep harder was veracht,
Bespot en belacht // vanden GOLIATH groot,
So waert ghy Bataviers oock tot spot ghebracht,
Bestreden onsacht // en ghedreycht metter doot,
Vande grootmachtighste Potentaet (ick seght u bloot)
Die in heel Europa mach zijn te vinden,
Ghy zijt oock wel belacht in uwen meesten noot,
Van uwe Nabuyren die souden zijn u Vrinden,
Al claechde ghy haer, als uwe beminden,
Sy en dorsten u niet by staen met hulp of raet,
Elck vreeste de Leeu, die bereyt was te verslinden,
Want zijn Tyrannie hadden eynde noch maet,
Maer die met DAVID hem op Godt alleen verlaet,
En niet op geld of wijsheyt der Capiteynen,
Alsulcke Bataviers overtreffen d'oude Romeynen.
| |
Liedeken.
Sy hebben betrouwt op Godt Almachtigh,
Wiens hant crachtigh // hun nu heeft ontslaen,
Van Tyrannie t'svyants onsachtigh,
Dat is waerachtigh // elck can mercken aen,
Noyt by Romeynen en was alsulcx ghedaen,
Sy om eyghen eere // streden t'elcken keere,
En niet om Godts Woordt in t'minst voor te staen.
| |
| |
| |
Refereyn.
Edel Blaeu ACOLEYKEN Met minnen versaemt,
Wy prijsen soot betaemt // der Romeynen daden,
Mennich treflick Potentaet hebben sy geschaemt,
Die hoch was betaemt // conden sy beschaden,
Sy hadden gheleerde, wijse, Mannen, tot Raden,
Die vant ghemeen Volck werden gherespecteert,
Met wat bevel de Hoop-Luyden werden beladen,
Sy hebben ghewilligh geobedieert,
Het Crijchs-volck heeft hem oock niet geexcuseert,
Te volghen dat de Hoop-Luyden haer gheboden,
Maer hoe veel Victori sy hebben geobtineert,
Sy schreuent al toe t'geluck, of den Afgoden,
Maer Bataviers schriuent niet toe den doden,
Maer den leuenden Godt tot haer selfs vercleynen.
Alsulcke Bataviers overtreffen d'oude Romeynen.
| |
Liedeken.
Maer dees Bataviers eerst altijt baden,
Om uyt den quaden // eens verlost te zijn,
Alsoo dat hun Godt dan stont in staden,
Met zijn daden // in corten Termijn,
Als heeft ghebleken aen die van Woerden sijn,
Die beleyt waern // van Tyransche scharen,
Maer werden verlost door Godts hulp divijn,
| |
Refereyn.
De Spangieaerts hebben haer op gelt verlaten,
Wat macht haer baten // wantet als Snee smelt.
Sy deden wel eerst vresen al die sy haten,
Om datse op veel straten // hadden groot ghewelt,
Maer Godt diet verdroot, heeft hem teghen haer gestelt,
Ende de Bataviers gemaeckt onverzaecht,
Al waren sy swack van Volck ende Gelt,
Sy hebbent met DAVID tegen GOLIATH ghewaecht,
De houaert des GOLIATHS heeft Godt mishaecht,
Soo dat Godt prijs vanden cleynen is bereyt,
Daer door hy verstroyt den Vyant die haer plaecht,
Ende heeft zijn grote macht ter neder gheleyt,
Bataviers die dat toeschrijuen Godts Majesteyt,
Haer belydende voor Godt als swacke onreynen,
Alsulcke Bataviers overtreffen d'oude Romeynen.
| |
Liedeken.
Men moet niet te min die hant aen houwen,
Aen t'Sploeghs getouwen // en doen t'best altijt,
Ghelijck die Helden in hun Landouwen,
Ionck metten ouwen // nu noch doen met vlijt,
| |
| |
Door sulck voorstaenders is t'lant gansch bevrijt,
Voor t'Spaus Placaten,, en Spaensche Soldaten,
Daer die al wech zijn is t'lant gebenedijt.
| |
Refereyn.
Prince.
Den PRINCE aller Princen, hooch in zijnen troon,
Kan een yghelijck loon // nae zijn werck toevoeghen,
Al ist dat s'werelts Princen groot-machtig en schoon,
Wel zijn ghewoon // haer niet te laten ghenoeghen,
Met haer Rijcken en Landen, maer altijdt poeghen,
Meer te Conquesteren als de Romeynen deden,
Godt canse temmen , datse niet en vermoeghen,
Haer Limiten (die haer Godt stelt) t'overtreden,
De Bataviers hebben met recht en reden,
De Wapenen moeten nemen in de hant,
Om Tyrannie te weren die sy leden,
En te conserueren de Vryheyt vant Vaderlant,
Die soo strijden datse hopen door Godts bystant,
Die Vyant uyt den Hollantschen Thuyn te heynen.
Alsulcke Bataviers overtreffen d'oude Romeynen.
| |
Liedeken.
Prince.
Princelijcke helden, waerdich om prijsen,
Door het bewijsen // van t'goet Regiment,
Godt laet u naemaels salich oprijsen,
En verjolijsen // in t'Hemels Conuent,
En daer aenschouwen CHRISTVM omnipotent,
Die alle Helden // aldaer sal vergelden,
Die zijn Woort hebben hier op d'aerde bekent.
A.T.
|
|
Auteursrechtvrij