Den Redenrijke constliefhebbers stichtelicke recreatie

[fol. S2r]

Haga int particulier. Liedeken

Op de Wijse: van A le je Moy.

Liedeken.

LOf tonser baet // sy vroech en laet,
Capiteynen vol eeren // wellick met siet Passeeren,
De Zee seer quaet // en opstijnaet,
Die sietmen Triumpheren,, bouen Princen en Heeren,
Haer Mannelicke daet // bouen Romeynen gaet,
Men sachse Vaeren,, nae t'Noorden alsoo stout,
Om oepenijn te verclaren // zijn comen inde Coudt.

Refereyn.

WAer is nu ROMVLVS, SILVIVS Inuentj.

Die na Cenmensis en Vientes Dochters ginck poegen,
Ende Numa met al zijn Excelentij,
Siet waer blijft TVLLIVS HOSTILIVS cloec van vermogen,
En AVCVS MARCIVS laet hy nu zijn daden toghen,
Teghen ons Zee-uaert des Navigaetij,
In sulcke daden wy de Romeynen ongheloogen,
Seer varde te bouen treffen tot alder Spatij,
Dies men de Bataviers siet handelen met alle Natij,
En stoutelick ter Zee gaen sonder eenich schromen,
En Auentuerden tlijf sonder eenighe vaste Fondatij,
Trachtende nae Gout Siluer en Eer als den vromen,
Ick segghe sulcke Bataviers die dan ter zee comen,
Varende door de Weerelt om alle costelicke Greynen,
Alsulcke Bataviers overtreffen d'oude Romeynen.

Liedeken.

Och Beeren groot // soo swaer als loot,

Welcke sy daer vonden // die menschen verslonden,
Van gheuen noot // daer niemant vloot,
Tot dat sy seer wel conden // Noua Semblaes ronden,
Daer sien sy altemet // met het ijs vast beset,
Sy moesten blijuen // in Swinters coude claer,
Eer moet ickse toeschrijuen // want sy quaemen van daer.

[fol. S2v]

Refereyn.

Men siet de Bataviers by Zuyden de Lijnne reysen,

Daer haer spijs bederft van hetten deur de wilde Zeebaren,
Dies men Amsterdam en dees Stadts Bataviers niet sach deysen,
Tot dat sy door den Troepicos verby Boon Esperance waren,
Soo zijn sy tot Bantam in Iava inghevaren,
Alwaer sy Peper hebben ghecost tot haren profijt,
En creghen op ander plaetsen Gout niet om verclaren,
En zijn soo t'huys ghecomen nae drie Iaren tijt,
Comende uyt sieckt pijn, en arbeyt dit seker zijt.
Waer sachmen oyt oude Romeynen haer stellen,
In soo langhe duyrighe pijne met vliet,
End wat ghy van MARCVS CVRCIVS en AVRELIVS hoort vertellen,
Sy ginghen haer gheen Iaer maer qualick een dach quellen,
Ghelijck drie Iaer de Bataviers met haer Capiteynen,
Alsulcke Bataviers overtreffen d'oude Romeynen.

Liedeken.

Aent Zuyden Lant // zijn sy oock Parmant,

Fray niet te vercloucken // oock schepen heen getrocken,
Door heeten brant // met haer verstant,
Vonden sy met soucken // laua Maiors houcken,
Sy brochten daer van daen // veel specerijen aen,
Sijn met Victorij,, ghecomen in Hollant,
In eeuwighen Memorij,, Is haren naem gheplant,

[Refereyn.]

Waer heeftmen oyt Romeynen haer sien stellen

In soo langhe reys vol pijn en lijden,
Alsmen vande Bataviers hoort vertellen,
Die ghetoghen zijn aen den Aquinoctalis Noort zijden,
Passeren Tropicus Cancrij sonder mijden,
Seyllende alsoo bouen aent groen Lant,
En vonden Noua sembla doen waeren sy blijden,
Hopende openijn te vinden Elegant,
Dus haer het ijs besetten als berghen want,
Dat sy daer by nae een jaer hebben moeten blijuen,
Hier wies loeuer noch gras, maer het was al strant,
Sy meenden in Sita en Synna Gout te beclijuen,
Sy deden vrome daden in haer bedrijuen,
En raeckten noch met een schuyt uyt haer weynen,
Alsulcke Bataviers overtreffen d'oude Romeynen.

[Liedeken]

Romeynen niet // hier wel opsiet,

Hoe dat sy zijn verheuen // sulck hebben bedreuen,
Het is gheschiet // haer nu lof biet,
Door het vast aencleuen // zijn sy nu noch int leuen,

[fol. S3r]

Liedeken.

Lof so sy nu ghemeyn // een yder Capiteyn,
Die de Reuiers en // Contreyen weeten snel,
Alsuclke Bataviers,, haer ouertreffen wel.

Refereyn.

Prince.

Veel Princelicke Bataviers men in heet en cout,

Omt ghemeen Lants wel varen, door de Zee heeft sien strijcken,
Om te crijgen Silver en rooder Gout,
Om de Soldaten mee te betalen soot mach blijcken,
Haer Naem is vermaert door des werelts wijcken,
Daer noyt out Romeyn en was bekent,
Van Zuyden tot het Noorden in alle Coninckrijcken,
Van Oosten tot het Westen in ellicken endt,
Daer sy hebben gheweest by en ontrent,
Gaetmen haer naem als Hollanders prijsen,
Dus treffen sy bouen de Romeynen Excellent,
Die sulcke daden niet en connen bewijsen,
Soo veel ghedaen te hebben onthout om Verjolijsen,
Om daer met den vyandt te houden uyt ons Vaderlants pleynen,
Al sulcke Bataviers overtreffen d'oude Romeynen.

Liedeken.

Prince.

Prins tot profijt // dit seecker zijt,

Heeftmen dees vroom Lantsknechten,, dese daet sien uyt rechten
Door ons subijt // welvaert met vlijt,
Hebben ghestaen int vechten // en ginghen eer betrechten,
Met swaerden en met schilt // teghen veel menschen wilt,
Dus moetmen loouen Bataviers onbeswaert
d'Oude Romeynen bouen // van haer fraye Zeevaert.

Hebt lieft altijt.