Den Redenrijke constliefhebbers stichtelicke recreatie

[fol. R4v]

Schiedam int particulier. Liedeken

Op de Wijse: Alst begint.

Refereyn.

O Batavie schoon // suyuer Blome vercoren,
Te recht meucht ghy wel // Godt louen bouen al:
En oock met soeten thoon // hun lof singhen te voren,
Die u Vryheyt snel // hebben behoet voor val:
Want doen dit u schoon dal // was in perijckel swaer,
Vervult met groot ghetal // uwer Vyanden daer,
Heeft Godt deur zijn genaden // u Staten wijs beraden,
Dat sy u grote schaden // deur de Nassousche Daden,
Wel hebben behoet een paer.

Liedeken.

NAdien Batauia is ghesproten,
Vuyt Coninclicker Stamme en eerlick Geslacht,
Wesende goet vroom Volck, sonder verstoten,
Die altijt hebben naer deucht en eeren getracht,
Die soo voorsichtigh in hun heeft ghwracht,
Dat sy zijn vermeerdert als vrome helden,
En sulcken loffelicken naem hebben voort ghebracht,
Dat veele met vrede by haer verselden,
Sonder dat sy die met wreetheyt quelden,
Ofte Tyrannie tegens yemande bedreuen,
Dus wy Bataviers met recht sonder schelden,
Onse daden bouen d'oude Romeynsche, in dit leuen,
Moghen lof, prijs ende alle eere geuen,
En van hun seggen te recht, sonder yemants vercleynen:
Alsulcke Bataviers overtreffen d'oude Romeynen.

Refereyn.

Al is hier om seer veel // Sweet ende Bloet vergoten,

Oock Volck heeft ghecost // ja selfs veel Gelt en Goet:
Denckt wat een schoon Iuweel // ghy daervoor hebt genoten,
Dat hy nu verlost // leeft na u selfs ghemoet,
Daer anders goet en Bloet // voor stont int s'Vyants hant:
En noch gheen ruste goet // en hadt gehadt int lant,
Hier voor heefmen ghestreden // met wapen en gebeden,
Als op den dagh van heden // om u t'houden in vreden,
Voor dijn machtighen Vyant.

[fol. S1r]

Refereyn.

Omine alhier ons ouertreffen te beweeren:

Soo dient in desen claerlicken ghenoteert:
Hoe Romulus tot Romen ginck sondeeren,
Een schoonen Tempel, om ghepeupuleert,
Te worden, hy alle die hun hadden gheabuseert,
Met moorden, rouen, ende andere saecken van ghewichte:
Van alle t'selue daer heeft gheabsolueert,
Daer door d'inwoonders worden int ghetal soo dichte:
Dat sy Oorlogh teghens haer ghebuyren oprichte:
En prospereeren met Tyrannie groot,
Ende als moordadighe veelen deden swichte,
Daer de Bataviers lieuer souden hebben gaen bieden t'hoot:
Omme hun ghebuyren voor aenstoot,
Te bevryden van soodanighe vileynen:
Alsulcke Bataviers overtreffen d'oude Romeynen.

Liedeken.

Wat rester nu te doen // den trouwen Ondersaten,

Niet dan dat sy haest // met danckbaerheyt ontfaen:
T'gheen heur Regeerders coen // en alle des lants Staten,
Nu hebben by naest // dertich Iaren ghedaen:
Hier inne siet eer staen // MAVRITIVS vroom feyt,
En die hem by ghestaen // hebben met macht bereyt,
Grauen en Heeren t'samen // Cornels, en oock by namen,
Capiteyns sonder blamen // Soldaten naert betamen,
Lof Prijs en Eere verbreyt.

Refereyn.

Alsulcke Bataviers die onmoordadich,

Met voorsienighen Raet haer soucken te defenderen:
Door de Nassausche helden ghenadich,
Die hun altijt Cloeckmoedich Presenteeren:
En hun niet en schamen, des Euangeliums leeren,
Door de ghemeene Lantsaten te verconden,
Ofte oock Iustitie te administreren,
Ouertreffen d'oude Romeynen naer mijn vermonden:
Die niet dan op ydelheyt t'allen stonden,
Ende na hoocheyt en Glorie waren haeckende:
En ghenade en bermherticheyt hielden verbonden,
Het welcke by Bataviers zijn versaeckende:
Ende naer een ongheveynsde vrede zijn waeckende,
Des niet teghenstaende wy uyt noot ons moeten beheynen:
Alsulcke Bataviers overtreffen d'oude Romeynen.

[fol. S1v]

Liedeken.

Soudemen der Bataviers,, Trijumphen al vertellen,

Sy en mochten niet // int cortt' worden gheseyt:
Maer hoefden veel pampiers // om voor ooghen te stellen,
Doch op datmen siet // heur daden met bescheyt,
S'hebbent soo wijt verbreyt // en heur stuck soo ghevelt,
Datmen ons nu wel vleyt // en Pays te maken quelt:
Maer t'dient noch dus gebleuen // om naer Godts Woort te leven,
En niet te zijn verdreuen // met Wijf en Kint daer neuen,
Overvallen met Ghewelt.

Refereyn.

Prince.

De Batavische helden moetmen prijsen,

Ouer heur cloucke vroome daden reen:
Die sy noch in corte Iaren hebben gaen bewijsen,
Daer van comt Godt de eere alleen:
Sonder dat sy Tyranniseerden ofte gheween,
Deden, haer ouerwonnen maer terstont ghenaden:
Daer de Romeynen in plaetse van dien niet anders en deen,
Dano Rouen, Moorden, ende een yeghelick verraden,
En met heuren Tyrannighen aert versaden,
Om also te Triumpheren naer de Roomsche Glorij:
Maer dit loopt verde, buyten de Batavische paden,
Naer dien die niet en soecken dan tot een Memorij,
Te behouden, de vrijheyt des gemoets ende een Christelicke Victorij,
Daer in dat Vailliant zijn ons Batavische Capiteynen,
Alsulcke Bataviers overtreffen d'oude Romeynen.

Liedeken.

Prince.

Prince Lof moet gheschien // u en dijn Capiteynen,

Die daer cloucker veel // hebben ghestreden aen:
Danmen wel can bedien // vande Oude Romeynen,
Die welcke ten deel // meer Feyts hebben ghedaen:
Maer dit moetmen verstaen, heur daet was ydel meest,
Oft om Hoocheyt t'ontfaen // maer ons saec die streckt eest,
Om tot Vryheyt te comen, te leuen sonder schromen:
Naer Gods wil als den vromen // datm' ons niet sou verdomen
Ten Vier oft Swaert, datmen vreest.

Nieupoort, den Ionghen.