Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio R3r]
| |
Liedeken.
VErjubileert al die t'welvaert beminnen.
Al van u Vaderlant,
Het welck cloeck en vailiant,
Deur noot den crijch men sach beginnen,
Doenmen Godts woort plaisant,
Leerde aen elcken cant,
Maer met moort en brant,
Die Spangiaerts seer bloetgierich,
Sochten, dat, te beletten vierich,
De Bataviers seer goedertierich,
Ghetrou aldaer men oock haer vant.
| |
Refereyn.
GHy Bataviers seer cloeck int strijden,
V daden zijn waerdich te verhaelen,
'tGheen ghy hebt bedreuen in corten tijden,
Alhier in onse Palen,
Te verdryuen uyt den Lande Spangiaerts en Walen,
Die quamen om ons te bederuen,
V Crychs-volck als vrome Helden al te malen,
Die om haer Vader-Lant willen leuen en steruen,
Wetende dat wy sullen beeruen,
Godes Rijck tot onsen loon,
Alle die om den Euangeli nu moeten sweruen,
Sullen hier namaels vercrijghen des leuens croon,
Die allen s'Lants welvaert soecken en Godts Eere schoon,
Lijf en Leuen niet en sparen als vrome Capiteynen,
Alsulcke Bataviers overtreffen d'oude Romeynen.
| |
Liedeken.Inden Briel men u sach ghy cloecke Helden,
Iaghen de Spaniaerts uyt,
Met menighen Schevuyt,
Met cleyn macht teghen haer ghewelden,
Men spaerde daer gheen cruyt,
Voor den Berch van Geertruyt,
Veel gheveecht den stuyt,
En op Turnhoutse Heyde,
Voor Alckmaer ende voor Leyde,
Voor Grol ende Goenninghe beyde
Creghen sy oock wat op haer huyt.
| |
[Folio R3v]
| |
Refereyn.Wat mocht de Romeynen haer Fame baten,
Dat sy soude na haer leuen Resideren,
Als sy, dat eewich is, moeten verlaten,
Al ginck HORATIVS COCLES hem dapper weren,
Als een die dapperlijck met wapenen conde generen,
t'Was al om verganckelicke samen,
Al ginck MARCVS CVRTIVS consenteren,
Inden put te springhen met zijn Paert te samen,
Wy Bataviers connense noch al beschamen,
Want wy crijghen een Fame tot inder eewicheyt,
Om dat wy om Godts Woort vechten na het beramen,
Waer door wy vercrijghen, so is gheseyt,
Eewighe Salichet door dit vroom feyt,
Ende segge oock noch tot haerder vercleynen,
Alsulcke Bataviers overtreffen d'oude Romeynen.
| |
Liedeken.De Spangiaerden Deventer ooc verlieten,
Graef MAVRITS met ghewelt,
Die heeft aldaer ghestelt,
t'Gheschut om de Stadt te beschieten,
De Spangiaerts soo ghequelt,
Voor Steenwijck in dat velt,
Met menich vroom Helt,
Gewonnen veel meer Steden,
Het welck onlangs is geleden,
Daerom is het oock meer als reden,
Dese Trijumphe sy vertelt.
| |
Refereyn.Was niet MARCVS SCHEVOLA eenen vromen Helt,
Die den Coninck meende te door steken,
Maer hy heeft just neder-ghevelt,
Den Rentmeester, soot is ghebleken,
Waer door den Vyant van Romen is gheweken,
Ende de Stadt oock daer door ontset,
t'En mocht al niet helpen, haer ginck veel ontbreken,
Om dattet verganckelick was ghewet,
Maer wy Bataviers trachten net,
Na een Victorie die eewigh mach duyren,
Om te comen in des Hemels percket,
Daerom campen wy tot allen uyren,
Ende trachten te bedrijuen alsulcke cuyren,
Daerom moet dese Regel noch verhaelt zijn als den reynen,
Alrulcke Bataviers overtreffen d'oude Romeynen.
| |
[Folio R4r]
| |
Liedeken.Als DAVID, die GOLIAT heeft verwonnen,
So werde daer ghehoort,
Dancksegging met accoort,
IVDITH heeft oock stout werck begonnen,
HOLOVERNVS verstoort,
Lach in zijn bloet versmoort,
Te verlossen voort,
Haer Volck met cloecke moeden
Also wil ons Godt als den goeden,
Deur zijn starcke Hant behoeden,
Alle die strijden om zijn Woort.
| |
Refereyn.Prince. Ghy Princen strijt vromelijc als MACHABEVS dede,
So moecht ghy de eewighe Crone vercrijghen,
Lijf en Leuen wagen om de gherechtichede,
Voor de Wet des Heeren vry uyt te stijghen,
Ende voor de Roomsche Afgoden niet te nijghen,
Maer Godt Almachtigh zijn Eere geuen,
Zijn Lof en Eere met te verswijghen,
So langhe wy op der aerden leuen,
Want die sullen salich zijn stater gheschreuen,
Die vol standigh blyuen totten ent,
Daerom isser niet veel aen bedreuen,
Al lyden de vromen hier wat torment,
Want wy om de gerechtigheyt vechten, is Godt bekent,
En verhale desen Regel als een alghemeynen,
Alsulcke Bataviers overtreffen d'oude Romeynen.
| |
Liedeken.Prince. Ghy Princen looft nu Godt van zijn weldaden,
Dien hy ons heeft betoont,
Hy is waerdich ghecroont,
Graef MAVRITS cloeck zijnder genaden,
Zijn Persoon niet verschoont,
Maer t'sal hem zijn gheloont,
Van die bouen woont,
Inden Hemel voorware,
Want Godts Woort suyuer ende clare,
Wert nu geleert int openbare,
En laet ons doch niet zijn ontroont.
P. Tanenburch. |
|