Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio P3r]
| |
Liedeken.
BATAVIA Blome schoon,
Te recht meucht ghy Godt louen,
Met ghedicht en soeten thoon,
Dat hy u vry van bouen,
Heeft ghemaeck, verlicht en verciert,
V Vryheyt met goe Raden,
Dat die heel wel is ghemaniert,
Deur de Nassausche Daden.
| |
Refereyn.
ALso Batavia gesproten is uyt Conincklijcke bloet,
Van Batho der Catten Conincx soon, goet wijs en vroom geacht:
So verclaren d'Historiographj datten ooc een seer goet,
Aerdich, getrou volck is, een clouck en strijdtbaer geslacht,
Waer deurt vermeerdert is, en sulcken naem heeft voortgebracht,
Datse als vermaerde helden tot een groot volck sijn vercooren:
Op welck deuchd'lijck werck d'ou Romeynen niet hebben gedacht,
Maer in onecht vande Nonne Ilia synde ghebooren:
En door Tiranny groot geworden als ongeacht te vooren,
Hebben voort alle gewelt, moort, en overlast bestaen:
Selfs hun nabueren overweldicht, en vernielt in thooren,
d'Welck de Bataviers in geenen tijden oyt hebben gedaen:
Maer selfs voor de Roomsche Keysers veel landen helpen grijpen aen,
Daerom machmen van hun wel seggen sonder yemants vercleynen,
Alsulcke Bataviers overtreffen d'oude Romeynen.
| |
Liedeken.Denckt al heeft het veel ghecost,
En veel Bloet is vergoten,
Dat ghy nu vry en verlost,
Leeft naer u selfs Exploten,
Daer anders Rust, Geldt, Goedt en Bloet,
Stont in des Vyants handen,
Hier voor heeft men uyt Noot met moet,
Gestreden als vaillanden.
| |
[Folio P3v]
| |
Refereyn.T'is waer dat de Bataviers voor tijts als oock nu uyt noot,
Hun hebben becrijcht, die teghen heur Vaderlant zijn opghecomen,
Maer noyt niemant onrecht gedaen, om hun seluen te maken groot:
Oft uyt pracht, maer hebben de wapenen wel bedwongen aengenomen:
Iegens hun die Godts Woort, oft heur Overheyt wilden ontvromen,
Oft wanneermen hun Privilegien wilde maecken onvry:
Hier tegens hebbens' als Helden hun ghestelt sonder schromen,
Ghelijckse noch heden, daer voor waghen lijf en leuen bly:
Iae goet en bloet op setten, en dat lieuer verliesen daer by,
Dan int minste heur Eedt, Naem en Faem te Coriomperen:
Oft hun Religij en Vryheyt te verlaten, daer voor sy
Tot den lesten man willen strijden, om d'Inquisitij te weren:
Sonder nochtans als d'ou Romeynen ghewelt t'useren,
Maer hun beschermende cloeck toe sien, voor de vileynen:
Al sulcke Bataviers overtreffen d'oude Romeynen.
| |
Liedeken.Soo dat niet anders te doen,
Nu rest den Ondersaten,
Dan haer danckbaer neerstich spoen,
Teghen alle Lants Staten,
En de eerstelijck hier aensien,
MAVRITIVS vroomheeden,
Oock Cornets, Capiteyns, mits dien,
Hun Eere wilt verbreeden.
| |
Refereyn.Alsulcke Bataviers en heur Regeerders all' t'samen,
Die hun als de Nassausche Helden quijten in heuren stant:
Deur ghetrou cloeckmoedicheyt, en hun niet en schamen,
Des Euangeliums, der Overheyt, en t'ghemeyn nut van t'lant,
Sulcke Bataviers overtreffen, naer mijn cleyn verstant,
d'Oude Romeynen, diens Wit noch Ooghen merck noyt en was,
Dan op eenen yd'len roem, niet om d'oprechtheyt te vordren, want
Hun hoop was noyt dan tot hoocheyt geneycht, om also ras,
Steden, Landen en Schat te crijghen, of sulcken ydelen bras,
Daer deur sy triumpheren mochten, naer de Roomsche Glorie,
Maer dit soecken d'oprechte Bataviers niet in sulcken das,
Dan wel tot t'ghemeyn welvaren streckt heur Memorie,
Tot de vryheyt haers ghemoets en een Christlicke Victorie,
Waer in dat vaillant zijn ons Batavische Capiteynen,
Al sulcke Bataviers overtreffen d'oude Romeynen.
| |
[Folio P4r]
| |
Liedeken.Soudmen t'Lof der Bataviers,
En Triumphen vertellen,
Men behoefde veel Papiers,
Om voor Ooghen te stellen,
Doch men aensiet wel met bescheyt,
Hoe sy hebben gaen vellen,
Heur stuck, en hun Eere verbreyt,
Dat nu ons om Pays gaet quellen.
| |
Refereyn.Prince. Dat zijn d'oude Romeynen welck in tijden Romuly waren,
En die daer naer onder hun Coninghen zijn opgeresen:
Die voor onder den Borghemeesters leefden langhe Iaren,
Welcx begin men in TYTO LIVIO mach lesen:
Vuyt Boosdaders, Maechden schenders, Tyrannen en mits desen,
Van alle Natien gehaet en ghescholden, doch dit is waer,
Als de Regiering den Borghemeesters was toe ghewesen,
Worter wel goede Policie onder hun gehouden ,maer
By ander Volcken bedreuen sy Roof en Tyrannie, daer
De Bataviers noyt toegeneycht oft gesint geweest zijn,
Noch oyt gheoeffent, dit bewijsen hun daden openbaer,
Maer wel om een Christelijck Ciuil leuen te leyden fijn,
Ten dienst haerder nabuyren en euen naesten in noot en pijn:
Geensins toestaende die t'Vaderlant schenden of ontreynen,
Alsulcke Bataviers overtreffen d'oude Romeynen.
| |
Liedeken.Prince.
Prince lof moet u gheschieden,
En dijn vroom Capiteynen,
Die haer haer altijt vromer bien,
Dan de oude Romeynen,
De welcke wel veel feyten meer,
Yd'lijck hebben bedreuen,
Maer onse saecke die streckt weer,
Om in vryheyt te leuen.
Noyt meerder vreucht. Niemant sonder Vyant. |
|