Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio P1v]
| |
Liedeken.
COmt o Musa helpt ons alhier,
Verhalen t'Lof der Helden,
Die haer leuen reyn van manier,
Voor het Vaderlant stelden,
Om t'suyuer Woort en reyne Leer,
Door Godts goetheyt vercreghen,
Te beschermen dies Prijs en Eer,
Hun niet en laet verleghen.
| |
Refereyn.
DIe u Feyten O Batavia al souden verhalen,
Die ghy ten tijden der Romeynen hebt bedreuen,
In voorleden outheyt, de Pen sou hem falen,
Want haren naem hebt ghy hooch verheuen,
Door u grote cloeckheyt, als wy vinden beschreuen,
In veelderley Iesten tot een eewighe Memorie,
Maer als wy bemercken den tijdt daer wy nu in leuen,
En die verghelijcken by ons oude Historie,
Hoe treftighe daden, hoe verheuen in Glorie,
Sy waren nau te achten, t'gleijckent maer spele,
By die rots gheschiet zijn, in de Hollantsche Ciborie,
Door d'Edele Bataviers in menichte niet vele,
Haer crachten toonende tegent Tyrannich bevele,
Der Spaenscher Bloethonden die haer vryheyt wilde vercleynen,
Om Godts heylich Woort, dies ick niet en hele,
Alsulcke Bataviers overtreffen d'oude Romeynen.
| |
Liedeken.Bouen Romeynen hooch van pracht,
Is haren lof gheresen,
Wat daden oyt HANIBAL wracht,
Zijn cleyn hier by int wesen,
Want om lieft der Religie claer,
En s'Lants vryheyt eendrechtich,
Sachmen Triumph bedryuen haer,
Op d'Zuyder Zee seer machtich,
| |
[Folio P2r]
| |
Refereyn.Wie sou den Lof al moghen beschrijuen,
Die is verworuen inde Batavische Steden,
Wat sachmen menich vroom feyt uyt Haerlem bedrijuen,
Die om vryheyt der Conscientien alle noot leden,
Van Swaert, Honger, Vier, nochtans tegen den vyant streden,
Tot sy waren verteert door s'Hongers benouwen,
V Lof O Borgers moet ick hier oock verbreden,
Van Delft die uyt lieft trock sonder flouwen,
Om u Mebroeders t'ontsetten u latende door houwen,
Want een ghetrou hert can niet beswijcken // rat,
Al wilden de Tyrannen doen wonder brouwen,
Menende Batavia doen te ontlijcken // wat,
Maer Alcmaer toonde doen haer practijcken // bat,
Om Godts Woort te behouden niet om verreynen,
Latende om vryheyt der Conscientien blijcken // dat
Alsulcke Bataviers over treffen d'oude Romeynen.
| |
Liedeken.Voor Bergen t'Soom al op den stroom,
Is de daet wel ghebleecken,
Van de Capiteynen seer vroom,
Diesmen haer lof moet spreecken,
Door sulcke daet heeftmen gesien,
Batavia verblijden,
Want den vyant met schandt most vlien,
Godt helpt de brome strijden.
| |
Refereyn.Oprechtigh zijn de daden rechtvaerdich zijn de strijden,
Die de Bataviers tegen de Tyrannen vechten,
Want haer gherechtigheyt sy gaen bevrijden,
Om Godts Woort te behouden, en haer s'lants rechten,
In vroomheyt en koenheyt niet als den slechten,
Als bleeck an Leyden die niet ginck vertzaghen,
Daer den Spaenschen SENACHERIB zijn parck ginck hechten,
Maer sy als Bataviers hebben haer gaen waghen,
En hebben Hongher, Swaert en Peste verdraghen.
Om Godts Woort te behouden, d'Afgodery te weren,
En noch het meeste dat was bouen alle plaghen,
Wilden d'uytgheweken Borgers hun vant goe opset keren,
Met vleyende woorden seggende geen eeren,
Sult ghy behalen maer treuren en weynen,
Maer sy gauen sulck antwoort waer uyt wy noch vercleeren,
Al sulcke Bataviers overtreffen d'oude Romeynen.
| |
[Folio P2v]
| |
[...] Den Tryumph die SCHIPIO dee,
T'is niet te verghelijcken,
By die Boysot aldaer ter stee,
Voor den vyant de blijcken.
| |
Refereyn.Prince Ghy sondeert sprack een Princelick Batavier vande muijren,
Al u redenen op ons hongers eelende,
Als oft wy teghen BALDEVM niet souden duyren,
Om dat wy tot eeten van catten en Honden ons wenden,
Maer denckt ghy niet O ghy leyders der blenden,
Als ons meer ontbreect wy hebben twee armen,
Den slincker op eeten, eer wy om ghenaet tot u senden,
Den rechter noch houden om ons te bescharmen,
Wy strijden om Godt die sal ons ontfarmen,
O Cloeckmoedigh rappoort waerdigh eewighe dachten,
God heefts oock niet verlaten, maer verhoorde haer karmen,
Menich Batavier verweckende die wonder wrachte,
Niet door haer wijsheyt maer door Godts stercke crachten,
Een Hollantsche Zee makende daer vrome capiteynen,
Eewich lof verdienden, dit doet d'Olyfkens woort groot achten,
Al sulcke Bataviers overtreffen d'oude Romeynen.
| |
Liedeken.Prince. Ghy Princelicke helden cloeck,
Die om d'Religie steruen,
Vwen naem sal int's Leuens Boeck,
Eewich Tryumph verweruen,
Met recht moecht ghy verblijen wel,
Want ghy u parck moecht sluyten,
Battavia door dit vroom spel,
Datmen Vuyt lieft siet spruyten.
t'Spruyt Wt Lieft. Schout nijt altijdt. |
|