Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio O4r]
| |
Liedeken.
AL sulcken Capiteyn,
Wert t'Lof, Prijs, Eer ghegeuen,
Die zijn beloften reyn,
Betracht met lijf en leuen,
En zijnen Heer verheuen,
Ghetrouw blijft als een Batavier,
Nae Crijghs manier,
Werdt hy ghecroont, al met den Lauerier.
| |
Refereyn.
MEn leeft en seyt veel vande Romeynen oudt,
Dat haer Velt-Heeren, Collonellen en Capiteynen stout,
Wet-houders, Raden en Burgers hebben geweest.
So te Water als te Lant vrymoedig onverflout,
Vroom, stout, mandadig ende subtijl van Geest,
Elck in zijn beroeping, so wel de minst als de meest,
Om haer Vaders-lant met lof en eer te vermeren,
Maer alsmen let op de Bataviers onbevreest,
Hoe vailliant vroom en stout sy haer verweren,
Wanneer hun vyant haer slagh comt presenteren,
Ellick schijnt een Leeuw selder dan yemant oyt sagh,
Om haer Vaders-lant te beschermen, en t'woort des Heren,
En niet om s'werelts Eer, Waerom men wel seggen magh,
Tot haerder Eer en Lof, sonder (haer) te vercleynen,
Al sulcke Bataviers overtreffen d'oude Romeynen.
| |
Liedeken.Zijn Mannelick ghemoet,
Sal geen vyanden vresen,
Alsmen Schermutssing doet,
Wil hy de eerste wesen,
Als een vroom helt gepresen,
Toont hy hem dan stout onvervaert,
Recht na den aert,
Der Batavieren vroom dadelijc vermaert.
| |
[Folio O4v]
| |
Refereyn.Waer heeftmen oyt ghesien, gelesen ofte gehoort,
Van sulleken Romeyn als mijn Heer van Duyuen-voort,
Een Admiral bekent onder de Batavieren,
Die van begin dees crijgh tot noch toe heeft ghespoort,
Ridderlick en vroom met crijghs ghebruycx manieren,
Godts woort end' Vaderlandt rondsom in dees Quartieren,
Als een goet patriot Christelijck voor te staen,
Waer door hem toe behoort den Crans der Lauerieren,
End' t'Cleed der vromme daden dagelicx om te slaen,
t'Is ellick een bekent al wat hy heeft gedaen,
Al worder niet gheseyt, hoe en waer sy zijn gheschiet,
t'Sal blijcken claer genoegh in d'onsterflicke blaen,
Voor ons na-comelinghen dier noch afweten niet,
Maer na wel singhen bly, om zijn eer te verreynen,
Alsulcke Bataviers overtreffen d'oude Romeynen.
| |
Liedeken.Wanneer hy gaet ten slagh,
Met Ruyters en Voet-knechten,
So doedt hy zijn beclagh,
En seyt: Sa wilt nu vechten,
Om t'ghewelt te beslechten,
Dat voor u staet al hier int velt,
Met Oorden gestelt,
Sal ick voor treen als een Bataviers Helt.
| |
Refereyn.Als de Bataviersche Stat Rotterdam werde ghequelt,
Met moordadighe dreygementen van t'Spaensch ghewelt,
Om de Stadt in vier hoecken an brant te steken,
So quam den Offecier Gerrit Marsch als een vroom helt,
Met een Pongiart bloot voor den Spangniart stoutel spreken,
Seggende: Dewyl ick uwe boosheyd niet en can wreken,
Do door steeck my terstond, op dat ick niet en anschouw,
T'Verdriet en d'ellend die door u Tyrants treken,
Hier ouer comen sal, menigh onnosel Man en Vrouw,
Soumen door desen manlicken bedreuen daedt trouw,
Sulck een, niet een voorstander behoren te heten,
Van t'Vader-lant, en setten hem alsmen wel doen souw,
Een Prins die hem sulcx te doen niet en sou duruen vermeten,
Daerom segh ick al waert my verboon op sware peynen,
Alsulcke Bataviers overtreffen d'oude Romeynen.
| |
Liedeken.Wort hy dan vast beleyt,
Rondt om van de vyanden,
Niet haest is hy bereyt,
Om te ruymen met schanden,
| |
[Folio P1r]
| |
Maer reyt vallant zijn Handen,
Als een vroom Batavier ghetrouw,
Zijn Heer en Vrouw,
Al totter doot eerlick doen blijcken souw.
| |
Refereyn.Prince. Onsen Princelijcken Prins Graef MAVRITIVS ghenaemt,
Die ter Werelt wijdt vroomdadig is befaemt,
Waer door die Vyanden voor zijn Banieren schromen,
Oock een Bataviers Heldt stoutmoetdig onbeschaemt,
Vuyt den Keyserlicken Stam, tot onser baat ghecomen,
De Edele Staten, die haer oock als den vromen,
Ridderlicken quijten, als Bataviers vermaert,
Burghemeesters, Regierders, m'en canse al niet nomen,
Die den Triumph-Wagen te besitten wel zijn waert,
Maer door de spleetbecte Pen, die clapachtigh is van aert,
En met de waerheyt wel can straffen de loogen,
Sullen haer daden wel worden geopenbaert,
En waerachtigh blijcken voor alle mans ooghen,
Die alsdan sullen roepen binnen des Werelts pleynen,
Al sulcke Bataviers overtreffen d'oude Romeynen.
| |
Liedeken.Prince.
Princen dees Helden vroom,
Zijn lofbaer te ghelijcken,
Door daden boven room,
Die sy ghetrouw doen blijcken,
Sonder t'velt te beswijcken,
By Bataviers na mijn vermaen,
Die lofbaer staen,
In de Cronijck, die net en sal vergaen,
Dueren vervvint |
|