Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio O2v]
| |
Liedeken.
ONtwaeckt ghy Batavieren,
Al die u Vaderslant bemint,
Treckt onder s'Leeuws Banieren,
Want den Standaert, is nu onwint,
Ghy zijt bekint,
Dit wel versint,
Op s'werlts int,
Alsoo met vint,
Door CESAREM beschreuen,
Dat hy certeyn // bouen Romeyn,
Altijdt waert hoogh verheuen.
| |
Refereyn.
OM dat in hondert Eylanden so PLINIVS beschrijft,
Gheen cloecker in Wapen waren als Batavieren,
Iae IVLIVS CESAR selfs in zijn redenen drijft,
Dat sy den Romeynen passeerden door haer bestieren,
In POMPEIVS tijden quamen sy te Romen plaisieren,
En vraechden int Senaet oft onder de menschen sterflick,
Haer in cloeckheyt yemant te bouen ginck, oft in manieren,
Want den Romeynen conden haer niet zijn bederflick,
De Stadt Damiaten was Keyser FREDERICH verwerflick,
Door der Batavieren hulp sy de ketenen braken,
Met een Schip daer onder ghemaeckt was een saghe kerflick,
Waer van men de Memorien tot Haerlem can smaken,
GAIVS Caliquia had Bataviers voor alle saken,
Tot zijn lief knechten sonder vercleynen,
Alsulcke Bataviers overtreffen d'oude Romeynen.
| |
Liedeken.T'is noch wel in Memorij,
Wat Feyten dat ghy hebt ghedaen,
Oost, West, creecht ghy Victorij,
Soo de Cronijcken doen vermaen,
Wat Keyser plaen,
Ghy mocht by staen,
Hebben ontfaen,
Door u seer saen,
Den Prijs tot allen stonden,
POMPEIVS vroet // t'selue goet // doet,
Nae TACITVS oorconden.
| |
[Folio O3r]
| |
Refereyn.
Keyser VITTELLIVS, CLAUDIUS, OTTO, en GALBA,
Hebben wel ondersocht der Batavieren Courage,
Oock doen sy den Romeynen sloegen uyt Batavia,
Met veel vrome Feyten, t'haerde Auontage,
t'Welck te verwonderen is, voor elcx Personage,
Dat sy conden wederstaen so vele Potentaten,
Gelijck ons nu veel Princen doen oultrage
Maer Godt comt den zijnen altijt te baten,
Exempel aen Leyden, doen sy in benoutheyt saten,
En van BALDEVS rontsom waren beleyt,
Dat sy Honden, Catten, en ander ghedierten aten,
Noch toonden sy haer slincke armen, en hebben geseyt,
Die willen wy eten, teghen u is t'anderen bereyt,
Om vechten, eer wy vallen onder u O vileynen,
Alsulcke Bataviers overtreffen d'oude Romeynen.
| |
Liedeken.Hierom moet ick Lauderen,
De Bataviersche Helden coen,
Want men sach haer floreren,
Met den Prins van Oraengen doen,
Haerlem deed' bloen,
Menich Spaens f'oen,
Naer Leyden groen,
Sachmen haer spoen,
Maer t'Water quam op handen,
Sy moesten claer // oock van Alcmaer,
En al met groter schanden.
| |
Refereyn.
Godt die hoorden tot Leyden het Kermen en suchten,
En sy baden als die van Niniue nacht en dach,
Door den watervloet deed hy BALDEVS vluchten,
Die van Haerlem deden oock so menighen slach,
Met stormen en uytvallen sonder verdracht,
So dat sy wel veertich duysent, haerder vyanden,
Door Godts cracht vernielden, alsomen wel sach,
Daer sy op betrouden, maer niet op s'menschen handen,
Gelijck de Romeynen deen, waer door sy tot schanden,
Met de Heydenen quamen, ick segt voorwaer,
Ontrent t'seuentich mannen, cloeck als den vailianden,
Sachmen de stercke Stadt Breda innemen claer,
Met so weynich bloet storten, is dit geschiet eenpaer,
Door getrouwe Helden ende vrome Capiteynen.
Alsulcke Bataviers overtreffen d'oude Romeynen.
| |
[Folio O3v]
| |
Liedeken.Wy hebben alst mach blijcken,
MAVRITS tot een cloeck Vorst vailliant,
Helden die niet beswijcken,
So wel te Water als te Lant.
En zijn constant,
Seer triumphant,
Waer door plaisant,
Sy abondant,
Sullen de Croon ontfanghen,
So blijft den Hof,, tot Godes lof,
Met t'Slot altijt behanghen,
| |
Refereyn.Prince. Soude onsen Prins MAVRITIVS niet overtreffen,
d'Oude Romeynen, door zijn daden, ick segh Ouy,
Als Coninck DAVID mogen wy hem wel verheffen,
Met zijn vroom Capiteynen en Batavieren bly,
Het heeft ghebleecken aen Zutpheen, Deventer vry,
Geertruydenberch, Nimmegen neempt, op Groeninghen merck,
Den slach te Turnhout, stelt niet aen d'een sy,
Terstont creech Nassouwen oock een cloecke Berck,
Daer hy in stelden acht Steden en Sloten sterck,
Maer hy badt dat hem wilde helpen stueren,
Den oppersten Stuerman, die in s'Hemels perck,
En op der Aerden macht heeft te volpueren,
Den welcken wy aenroepen tot allen ueren,
Op dat wy onbevleckt blyuen vanden onreynen,
Al sulcke Bataviers overtreffen d'oude Romeynen.
| |
Liedeken.Prince. Looft Godt voor zijn weldaden,
Die hy dagelicx geeft met vlijt,
Ons Schepen wel gheladen,
Brengen van Oost en West profijt,
Den Lantman blijt,
Zijn Coren snijt,
Oock t'Vee subijt,
Groeyt nu ter tijt,
Om ons Lichaem te spijsen,
Eert God met vreucht // in Reyn geneucht,
Wilt hem danckbaerlick prijsen.
REYN GENVECHT. Laet den Aert goet zijn.
|
|