Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio P4v]
| |
Liedeken.
DOen Antiochus ouer Israel bloedich,
Tyranneiseerde, so heeft dan,
Matathias vrymoedich,
Niet siende zijn cleen hoopken an,
Cloeck wederstaen desen Tyran,
Om vry te leuen goedich.
| |
Refereyn.
DOen de fell' Inquisitie regneerde wijt en breet,
End' dat so veel ontschuldighe de doot hebben gheleden,
Onder de Handen der bloetgierighe Tyrannen wreet,
Om t'beleuen der Euangelische Waerheyt ghereet,
So heefter menigh gheweest inde Batavische steden,
Ia veel onder den Adel die vol van Barmherticheden,
Sulck bedwanck ouer de Conscientie seer heeft mishaeght,
Om welcke saecke sy so veel t'samensprekinghe deden,
Na dat sy onder den anderen seer hadden beclaecht,
Datse haer eendrachtigh verbonden hebben onvertzaecht,
Te versoecken eenich versoeten hier in te beleuen,
Want medelijden verjoegh vreese sy hebbent ghewaecht,
Haer vrijmoedigh stellend, om deur ootmoedicheyt verheuen,
t'Overwinnen de wreede Tyrannissche Capiteynen,
Alsulcke Bataviers overtreffen d'oude Romeynen.
| |
Liedeken.Want hem heeft seer gejammert het verderuen,
Van Godts Wet hy en cont niet sien,
Maer woude lieuer steruen,
Dan hy die boosheyt souden lien,
So heeftmen nu oock sien gheschien,
Om vryheyt te verweruen.
| |
[Folio Q1r]
| |
Refereyn.Want d'oude Romeynen doen sy lijden moesten ghepijn,
Vande Tyrannen, so en hebben sy haer niet begeuen,
Deur ootmoedicheyt hare wreetheyt te versoeten fijn,
Maer hebben daerenteghen wederomme wreet duruen zijn,
Om de Tyrannen terstont met der doot te doen sneuen,
Ghelijck sy CAIVS CAESAR deur-staken, ende daer beneuen,
NERO verjaeghden die hem doode met zijn eygen hant,
DOMITIAEN sy doot-sloeghen oock als elck moeste beuen,
Onder COMMODVS Tyrannie vergift men hem toesant,
ALEXANDER vol strafheyt was van zijn Ruyters vermant,
End' MAXIMIVS vermoort, om zijn moorderie mispresen,
Maer dese Bataviers doende d'onnosel onderstant,
Sochten slechts, dat die Godts Woort beleefden, vry souden wesen,
Vuyt de handen van die haer daer an ginghen verontreynen,
Alsulcke Bataviers overtreffen d'oude Romeynen.
| |
Liedeken.Onsen Hooftman den Graue van Nassouwe,
Heeft onse slauernie ghedeert,
Als Capiteyn ghetrouwe,
Heeft hy daeromm' hem cloeck gheweert,
Elcx Conscienti heeft hy begheert,
Te zijn vry sonder rouwe.
| |
Refereyn.Dees Bataviers siende dat niet veel' en heeft gebaet,
t'Ghene sy tegen d'Inquisiti ootmoedich versochten,
Maer datter eenen quam die noch boser heeft versmaet,
Het vry-dom der Conscientie so hebben sy gevaet,
In de Handen t'Swaert, ende de Tyrannen stout bevochten,
Nochtans om haer te vernielen sy geensins niet en wrochten,
Maer sochten een vryheyt, dus Godt die niet en laet in noot,
Die op hem betrouwen beschicktet sodat sy gerochten,
Aen den Naussouschen Helt, haer tot eenen Capiteyn bloot,
Daer mede sy cloeckelick wederstonden den anstoot,
So dat haer daer deur terstondt sommighe Steden toevielen,
Daer in men met prijs end' lof Godts name maeckte groot,
Te cloecker wederstonden sy al die wilden vernielen,
De vryheyt der Conscientie gelijck bose vileynen,
Alsulcke Bataviers overtreffen d'oude Romeynen.
| |
Liedeken.Cloeck tot der doot heeft hy voor ons gestreden,
Nalatende dan t'Edel Bloet,
MAVRITS die volght zijn seden,
Als Vorst en Capiteyn seer goet,
Veel Batavische Hlden vroet,
Spoen met hem t'onser vreden.
| |
[Folio Q1v]
| |
Refereyn.Prince.
Als dese Bataviers met haren Prince goedertier,
Deur twederstaen der Tyrannen soo veel gheworden waren,
Dat sy haer gantsche lant bevrijt hadden uyt dangier,
Om al die d'euangelische Leere beminnen hier,
Te moeghen leven los van der Conscientien beswaren,
Soo en hebben de Tyrannen gheen, verraet willen sparen,
Tot dat sy hem ommeghebracht hadden meenende dan,
De Vryheyt der Conscientie terstont te doen wechvaren,
Maer de Bataviers en wilden daer gheensins scheeden van,
Ende namen zijnen Sone tot eenen Hooftman an,
Daer mede sy als vooren cloeckelick zijn blijven strijden,
Niet om vernielen maer om wederstaen elcken Tyran,
Dat de Godtvreesende vry souden leuen met verblijden,
Twelck Godt altijdt late ghedeuren, want in dese pleynen,
Alsulcke Bataviers overtreffen d'oude Romeynen.
| |
Liedeken.Prince. End' Godt belooft die strijden sonder sneuen,
Als Helden voor zijn waerheyt al,
Een Triumphe te gheven,
Daer veel meer vreucht gheschieden sal,
Dan oyt bedocht was in dit dal,
Dats hier naer t'eeuwich leven.
In Liefden ghetrouwe. Deursiet den gront. |
|