Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio M3v]
| |
Refereyn.
De Christenen daden zijn grotelycx te prijsen,
Dat sal ick bewijsen // want sy gaen de Romeynen te bouen,
CHRISTVS haren oppersten Capiteyn niet om verjolijsen,
Daermen daeglicx veel cloecke daden siet uyt rijsen,
En met eerbiedinge wy hem daer voor louen
Maer d'oude Romeynen slachten den grouen,
Die niet dan om een tijtelicke eer deden haeren arbeyt,
Want sy doch Heydensche menschen waren verschouen,
Doch goede Policien waren onder hen wel bereyt,
Om dat haer goede Faem soude werden naegeseyt,
d'Welck eenen tijdt lanck souden blyuen in Memorie,
De Christenen is oock van den beginne strijt voor geleyt,
Maer die strijden om een eeuwighe Glorie,
Ende door godts Genade vercrijghen sy haer Victorie,
Waer van sy Godt alleen moeten de eer // geuen,
Maer ondersoect en door leeft wel d'oude Historie,
Dat de Romeynen alleen op haer sterckheyt seer // leuen,
Daerom zijn de daden der Christenen meer // verheuen,
Dan de Romeynen, want sy by ons daden cleen // zijn,
Om dat ons daden door t'geloof met CHRISTO een,, zijn.
Daerom zijn ons daden veel wijder vermaert,
Om dat sy door t'geloof Godt aengenaem // zijn,
En dat sy uyt liefden met godt zijn ghepaert,
Daerom sal door haer een eewich lof werden verclaert,
Den welcken voor godt en den menschen sal eersaem // zijn,
So dat door t'gelooue t'herte des crijgs-knechts sal bequaem // zijn,
Ten strijde, en tot cloeckmoedicheyt hy hem daer door stelt,
Al ist dat het lichaem inden strijdt sal met groter praem // zijn,
En met de doot ter aerden oock wert neder gevelt,
Nochtans een goet crijgs-helt hem daer niet mede en quelt,
Wetende dat hy hier naemaels sal werden gecroont,
De cloecke daden der Romeynen moeten oock zijn vertelt,
Want sy en hebben haer leuen oock geensins verschoont,
d'Een voor d'ander, so ons op veel plaetsen wert vertoont,
Maer dit was al om een tijtelicke Faem te laten naer,
En niet om d'eewige daer CHRISTVS ons mede loont,
Die in den strijdt sonder respijt Godts eer aensien eenpaer,
Die sullen altijt Godt op haer syde hebben, dat is claer,
Daerom gaen ons daden haer te bouen al gemeen // fijn,
Om dat ons daden toor t'geloof met CHRISTO een,, zijn.
| |
[Folio M4r]
| |
De Romeynen onderhielden haer wetten sonder versaken,
En hadden op haer Regieringe altijdt goede acht,
Het welcke hoochlicken is te prijsen en niet te laken,
Waer door men haer tot overwinninge sach geraken,
Om dat sy al te samen leefden in groote eendracht,
En d'eerlijcxste werden tot regieringhe ghebracht,
Die beminders der rechtveerdicheyt waren gepresen,
Die Capiteynen die regierden met grote macht,
En wrochten heerlicke daden so ghy meucht lesen,
Met voorraet beslichten sy oock haer saken mits desen,
Waer door sy oock haer Victorie meest vercreghen,
Om dat sy by haer wetten bleuen onbegresen,
Hoe wel de Victorie in Godts hande nochtans is gelegen,
So can sy door onachtsaemheyt wel blyuen achterwegen,
Maer de Romeynen ontsaghen vrienden noch maghen,
Het moester al om lyden hoe seer sy waren versleghen,
Maer die Christenen moeten haer seluen so niet dragen,
Maer in t'gemoet met barmherticheyt zijn gheslaghen,
Ick segh dat de Romeynen sulcke gans geen // zijn,
Om dat ons daden door t'gheloof met CHRISTO een,, zijn.
Prince.
Lof opperste Prins en Capiteyn CHRISTVS abondant,
Die u seluen begeeft altijdt voor inden strijt,
Voor die gene die in u ghelouen, want
Ghy d'Ouerheyt oock regeert met uwen geest vol van verstant,
En uwen Engel stelt ghy oock op haer sijde verblijt,
Op dat haer d'eewighe lof magh na volghen sonder respijt,
Die tot inder eewicheyt toe sal verclyuen,
Maer den lof der Romeynen in s'werelts crijt,
Die sal maer tijdelick in ghedachtenisse blyuen,
Want het moet al met den steruende mensche verdryuen,
Al dat sy tot haerder eyghen eere willen doen,
Al waert schoon dat oock den mensche hem liet ontlyuen,
Om een tijdelicke Faem, wilt dit wel bevroen,
Soo en can hem dat nochtans tot het eewige niet voen,
Ghelijck als de Christenen wilt hier op letten,
Die haer tot de eewighe Faem doch altijts spoen,
Waer door Godt haren vyant jaecht in hare netten,
Soo dat hyse gants ter neder ruct en laet verpletten,
Hierom der Romeynen daden by ons niet so reen // zijn,
Om dat ons daden door t'geloof met CHRISTO een,, zijn.
Uierich int hopen. |
|