Den Redenrijke constliefhebbers stichtelicke recreatie

[fol. M1v]

Haerlem de Ionge Camer, Den Wyngaert-Ranck,

Refereyn.

ALle crachten en daden hoe vroom en cloeck vermaert,
Die daer zijn gheschiet en noch dagelicx op rijsen,
Tegen die vyanden bloet dorstigh en boos van aert,
Zijn loffelick te verhalen, en waerdich te prijsen,
Maer t'zijn vrome Campionen die eer bewijsen,
Den oppersten Godt, van haer overwinninge crachtigh,
Want veel hovaerdige Coningen daer af is te ijsen,
Schryuen die eer haer selfs toe, doer haer gewelt machtigh,
Veel Romeynsche Keysers waren daer in seer prachtigh,
Oock haer Ondersaten die met haer hebben gestreen,
Datse godt in haer Victorien quaelick waren ghedachtigh,
Sy roemden dat door haer vroomheyt, d'overwinning quaem alleen,
Maer waer door wy Bataviers mogen spreken met reen,
Waer in bouen die Romeynsche zijn te prijsen onse daden,
t'Comt niet door hovaerdy daerder veel nae treen,
Maer die vrome helden sullen haer wel anders beraden,
Als voorstanders vant Vaderslant, om te wederstaen den quaden,
Sullen sy t'swaert met Godts hulp nemen in die handen,
Dus zijn ons daden bouen haer te prijsen, wiet wil versmaden,
Dat wy Godt die macht toe schryuen, vande overwinning onser vyanden.

Ghedenct eens wat al godt met ons heeft gewrocht,

Sedert datmen t'jaer Acht-ent-sestich heeft gheschreuen,
Hoe den wreeden Duck d'Alue ons tyrannich heeft besocht,
En heeft veel vrome helden schandigh benomen het leuen,
Maer Godt heeft den Prins van Orangen verwrect en gegeuen,
Een manlick hart, so het bleeck doen ter tijdt,
Al deden ons de Tyran de Landen trueren en beuen,
Met GEDION zijn wy Bataviers dick getrocken ten strijt,
Dat onmogelick scheen, wie heeft ons bevrijt,
Anders dan Godt den Heer, diet al heeft in zijn gewelt,
Hoe werden die van Rotterdam van haer benijt,
Met een deerlicke moort hebben syse ghequelt,
Naerden, Oudewater, Schoonhouen, t'wert u vertelt,
Grote moorden daer gedaen sonder eenigh af laten,
Doen sy Haerlem door hongers noot hadden gevelt,
Hebben sy daer schandigh vermoort wel twee duysen Soldaten,
Iae door t'ghehele lant met haer bloedighe Placcaten,
Veel Christenen verworcht, in onse Nederlanden,
Dus zijn ons daden, te prijsen bouen die Romeynsche Staten,
Dat wy Godt die macht tot schryuen van d'overwinning onser vyanden.

[fol. M2r]

 

Noch wesende den Tyran euen dorstigh naet bloet,

 

Is met zijn heer-cracht naer Leyden getogen,

 

Meenende daer te verstueren als een Wolf verwoet,

 

Ons vrome Bataviers, maer hy vant hem bedrogen,

 

Naer Alcmaer is hy mee dul en verwoet gevlogen,

 

Maer Godt heeft al zijn quaet voornemen behoet,

 

Bossu meenden hem ter Zee als een groot Heer te verhogen,

 

Maer die vrome Bataviers hebben haer daer teghen geset,

 

Middelburch, Sirickzee, al waren sy besmet,

 

Van t'Spaensche gebroet, noch mosten sy ruymen die baen,

 

Waer ouer wy GODT loofden en volpresen zijn wet,

 

Om dat hy sulcken groten werck by ons hadden ghedaen,

 

Ghelijck GODT met DAVID is ten strijt gegaen,

 

Soo heeft hy metten Prins en Batavien geweest,

 

En noch dagelicx is, merct die Spaensche Armada aen,

 

Die met haer grote Schepen ons meenden te maken bevreest,

 

Sy zijn gans vernielt en verstroyt minst ende meest,

 

Dies Godt die macht wert gegheuen van alle verstanden,

 

Hier in zijn ons daden te prysen bouen die Romeynen onbedeest,

 

Dat wy Godt die macht toe schryuen van d'overwinning onser vyanden.

 

 

 

Prince.

 

 

 

Den Princelicken Godt die inder eewicheyt leeft,

 

Moetmen alleen die macht toe schryuen naet behoren,

 

Hy die ons Bataviers tot bescherm weder gegheuen heeft

 

MAVRITIVS van Nassouwe een Prince hooch gheboren,

 

Die zijn Victorien achtervolcht, en niet laet versmoren,

 

Soot in corte jaren nu wel is ghebleken,

 

Aenden Bergh dat den vyant in coop was toe gesworen,

 

Van die valsche verraders met haer bose treecken,

 

Voor Coeverden, Delf-siel, en is hy niet besweecken,

 

Oock Zutpheen, Nieumegen, en Deuenter vaillant,

 

Oock die Stad Groeningen, daermen veel af wist te spreecken,

 

Hy heeftse al bedwonghen door godts stercke handt,

 

Berck, Meurs, Grol, Oldenseel, heeft hy triumphant,

 

In corten stont, seer victorieuselick gecreghen,

 

Breefoort, Enscheden, Lingen, den vyant tot schandt,

 

Mostet al verlaten, al waren sy hem tegen,

 

Van welcke victory wy Bataviers niet hebben ghesweghen,

 

Maer Godts lof groot gemaeckt als costelijcke panden,

 

Dus hebben ons daden prys, bouen d'Romeynschen te deegen,

 

Dat wy Godt die macht toe schryuen van d'overwinning onser vyanden.

Lieft bouen al.