|
| |
| |
| |
Noch vijf naewercken suldy vinden hier by gevoecht ras,
Die gheen Prijs conden winnen, om dat de Chaert niet vernoecht was.
Waer in ons daden bouen de Romeynschen zijn te prysen.
| |
| |
| |
Hamborch int pariculier,
Refereyn.
DEr oude Romeynen oorspronck van haer Republycke,
Hadde geen loflick fondament elck moet belyen,
Dan eenen aenvanck van Raeu Barbaren en diergelycke,
Die niet en wisten van haer eygen naebueren te bestryen,
En maeckten vyantschap aen alle syen,
Sonder yemant te verschonen aen Lijf, goet, Steden, of Landen,
Sonder oorsaeck gingen sy den vreetsamen wreedelick beryen,
En deden haer oorloch aen, met roof, moorden en branden,
Door haer wreetheyt maeckten veel Natien tot schanden,
Daer door haer raeu seyten waren by alle menschen bekent,
Dan alsmen den oorspronck sou nemen voor handen,
Vande Bataviers en haer Loijael recht fondament,
Die welcke saten en rusten als Schapen onder dat wrede Serpent,
HYDRA, daer de Poeten wonderlick af schryuen,
Die den Batviers door schalckheyt hadde geerne gheschent,
Met verraet van SYNISTER personen en valsche Missiuen,
Om haer door bedroch wredelick te ontlyuen,
So heeft Godt de Bataviers op gerust, om zijne mogentheyt te bewysen,
Door haer hant wiens daden noch dagelicx beclyven,
Int constantich wederstaen der tyrannen gewelt, dat grotelicx is te prysen.
Soudemen vertellen der Romeynen daden vanden Voorstanders en Princen,
Die sy int stryen wonderlick hebben bedreuen,
Int Conquesteren van Landen, Steden, en Prouincien,
Daer sy goetwillich om gewaecht hebben haer goet en leuen,
Allene om de Republycke van Rome verheuen,
Te vermeerderen in haer pompeuse Authoriteyt,
Niet dat sy die geconquesteerde Landen en Luyden hebben gegeuen,
Beter Gouvernement dan sy te voren hadden in haer eenvoudicheyt,
Want ter contrarie wert by Mylenus clachten uytgeleyt,
Dat sy selue tyrannich hebben ghegouverneert,
Maer int stuck vanden Bataviers wort meer eere toe geseyt,
Dat die allene de Tyrannie volstandigh hebben geresisteert,
Want NERO staet hier door perplexten wel half geturbeert,
Waer door haer cloecke daden bouen den goude blincken,
Want den groten Levyathan is van zijn Authoriteyt gecasseert,
Soo dat hy cleen macht heeft Godts Volck vorder te krincken,
Zijn dit niet wonderdaden diemen in alle Cronycken sal gedincken.
Waer door datmen siet Gods segen dagelicx meer op den Bataviers rysen
Door dien sy op God sien, die haer alle weldaet can schincken,
Int constantich wederstaen der tyrannen gewelt, dat grootlicx is te prysen.
| |
| |
Het Roomsche Senaet dat die heele werelt woude Incorporeren,
Hadde geen kennisse van haren schepper ende Heere voorwaer,
En noch veel min van haer salicheyt, dits weert te noteren,
Dan hieldent by t'gheluck ende veel velt goden hier en daer,
Daer teghen hebben de Bataviers het Euangelium van haer salicheyt claer,
Oock zijn metten geest Gods verlicht tot eenen Segel delicaet,
Die haer versekert van d'eewighe leuen eenpaer,
d'Welck den prijs is, daer sy om vechten vroech en laet,
Daer voren oock haer lijf en goet te pande staet,
Waerom dat GODT door haer handen zijn mogentheyt thoont,
Int verlossen vande belegeerde Stad LEYDEN was geen menschelicke daet,
Maer alleen Godts werck die den ootmoedighen croont,
En werckt door de ongeachte menschen daer hy altijt by woont,
Gelijck by de Victorie voor Bergen oock heeft gebleken,
Mede int vangen van Bossu die niet en was verschoont,
Dit zijn alle cloecke daden die den Romeynen hebben ouerstreken,
Daer de vyanden geen gewelt en helpt noch listige treken,
Want inden cleenen bewijst GODT zijn cracht tot haer verjolijsen,
Daerom moeten die Bataviers by Gedeons strijtbaer volc zijn vergeleken
Int constantich wederstaen der tyrannen gewelt, dat grootlicx is te prysen.
Alle Potentaten, Coningen, Vorsten, Ruyters en Knechten,
Zijn verwondert in dit volstandich wederstaen der tyrannen gewelt,
Gelijc SAVL was int voornemen van DAVID die Goliath dorste bevechten,
Een cleen persoon tegen al sulck een goot geweldich helt,
Daer heel Israel voor beefde, dien heeft DAVID sonder wapen gevelt,
dWelc een figure der Bataviers daden is, weerdich te stellen in gedachten,
Dat sulc cleen volc den groten Cresus die midden inden goutbergen is ghestelt,
Doen hem verliefen, dien hoochvermeten Room, ja bringen hem tot clachten,
Oock mede t'seuenhoofdige beest, wien alle Coninghen ondeworpen hebben haer machten,
Beeft wanneer dat hoort vanden daden der Bataviers vermanen,
Want den Pylaer die den Sodomytschen Tempel droech door zijn eygen crachten,
Fayliert den voet en staet selue op onseker banen,
Want den vinger godts ondert de Bataviers, die Edel Courtisanen,
Salomons goutmijnen die van haer op diuersche plaetsen zijn gevonden,
Dees daden passeren niet alleen de Romeynen, maer ooc den Persianen,
Also datmen sal hooren van allen Potentaten haer lof vermonden,
Oock by alle Natien op des werelts ronden,
Den jonghen tot een exempel, en den ouden grijsen,
Tot een wonderdaet, om dat GODT den Bataviers sulcke cloeckhz heeft toegesonden,
Int constantich wederstaen der tyrannen gewelt, dat grootlix is te prysen.
A.T.
|
|
Auteursrechtvrij