Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio G2v]
| |
Refereyn.
ONs opperste Leeraer CHRISTVS abondant,
Die ons zijn leere daghelicx inplant,
En wil oock dat wy oprechtelick daerna leuen,
Zijne leere doch volmaeckt is in allen, want
Diese met neersticheyt ondersoeckt, die comt tot verstant,
Ghelijck zijne Apostelen, die hyse hadde gegeuen
Om te leeren, door de gantsche Werelt sonder sneuen,
In den eenighen waeren Soone, diet al heeft volbracht,
Hoe wel nochtans vele niet en worden ghedreuen
Tot den verstande, door haer onverstant, hier wel op acht,
Want sy ten rechten na Godts woort niet hebben ghetracht,
Om dat sy den oppersten Leeraer hebben versteken,
Daerom sy oock so in onverstant laghen versmacht,
Dat sy van zijn leering gheen recht Oordeel consten spreken,
Maer een recht Leerling die moet zijn herte breken,
Om te ondersoecken met neersticheyt seer,
'tWoort godts, wert by een recht Oordeel vergeleken,
Door rechte kennisse van t'woord godts, en des Leeraers leer.
Door de kennisse des woorts sal hy een recht Oordeel vermonden,
Want CHRISTVS heeft se seluer tot de Schriftuire ghesonden,
Segghende: Die zijnt, die van my openbaren,
Ghy meent daer in te hebben tot allen stonden,
Het eewich leuen, daer ghy nochtans legt ghebonden,
In s'Wets banden tot uwer beswaren,
Doort ondersoeck der Schrift werden sy ervaren,
Dat sy bekenden CHRISTVS leeringe oprecht te wesen,
Daer van sy oock werden bevonden trouwe Dienaren,
So dat CHRISTVS leere door haer grootelicx is ghepresen,
Wy arme crancke zijn oock daer door genesen,
Doort vloeyende Woort godts, twelck ons leuendich maeckt.
Als wy ons seluen daer na recht aenstellen by desen,
So sal t'rechte Woort in ons wel worden gesmaeckt,
En een recht Oordeel sal ghegeuen worden onghelaeckt,
Als wy daer na trachten soo lancx, soo meer,
Alle valsche leere sullen oock werden versaeckt,
Door rechte kennisse van t'woort godts, en des Leeraers leer.
| |
[Folio G3r]
| |
Doort ondersoecken salmen rechte kennisse ontfangen,
Van dat rechte woort godts, met groter verlanghen,
Ende des Leeraers leer of sy zijn accorderende,
Ghelijck die van Berreen deden sonder verstranghen,
Die doort ondersoecken der Schrift hebben aenghehangen
d'Apostelen, en waren haer daer toe veruerende,
Want t'recht verstandt waren sy daer van begerende,
Om een rechte vonnisse daer van de wysen,
De leering der Apostelen waren sy proberende,
Met der heylige Schrift oft syse consten prijsen,
Voor de rechte ware leere, niet om verjolijsen,
Waer doormen haer tot de rechte kennisse comen sach,
Daermen dagelijcx versterckinghe des geloofs sach wt rijsen,
En ontfinghen de Leering der Apostelen sonder verdrach,
Met vreuchden, en namen daer in aen van dach tot dach,
Laet ons oock Godt aensien, en versaken ons eyghen eer,
Soo sullen wy recht oordelen sonder gheclach,
Door rechte kennisse van t'woort godts, en des Leeraers leer.
Prince.
Lof wordt onsen oppersten Leeraer CHRISTVS toegheseyt,
Die ons zijnen oprechte leer vanden beginne heeft bereyt,
De welcke doch is bevonden suyuer en warachtich,
Door de gantsche werelt is sy nu verbreyt,
En wordt ons daeglicx gheleert met neerstigheyt,
Door zijne Dienaren met macht seer crachtich,
Op dat wy mede moghen comen eendrachtich,
In zijn Heerlickheyt die hy haer wil schencken,
Die zijn leer beleuen met herten aendachtich,
Haer boosheden en sal hy oock niet meer gedencken,
Een haijr van haren hooft en sal oock niemant crencken,
Die zijnen wille doen na zijn behaghen,
Al ist dat valsche Leeraerts ons oock wencken,
Daer canmen geen goet recht Oordeel van draghen,
Maer sullen altijdt tot rechte Leeraers om raet vraghen,
Om soo tot kennisse te gheraken tot elcker keer,
Soo salmen recht oordelen sonder versaghen,
Door rechte kennisse van t'woort godts, en des Leeraers leer.
Uierich int hopen. |
|