Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio F4v]
| |
Refereyn.
GHelucksaligh is den mensch die leeft tot allen tijden,
Nae den woorde zijns Leeraers, die hem voor zijn gestelt,
Alsulcken can zijn siel vanden doot bevryden
Alle verdriet, alle pijn, Tribulatij en lyden,
Sal hem licht vallen om dragen, daer hy mee wert ghequelt,
Vyt genaden sal hy een uytvercoren werden getelt,
Die beloften zijns Leeraers sullen niet werden vergeten,
Hoe wel wy door den doot, totter doot waren gevelt,
Nochtans sullen wy in eewighe vruecht zijn geseten,
Den Croon sal wesen bereyt soo als die Propheten,
Hebben ghepropheteert, door Godts geest met begeer,
Om dat den mensch niet en sal dolen, hoort hy dit te weten:
Hoe den Leerling recht sal oordelen van zijns Leeraers leer?
Om Godts wegen recht te wandelen op ende neer,
Tot verquickinge zijns siels tot allen stonden,
Dus isser een oprecht Leeraer een eenich Heer,
Wiens leer men recht can oordelen alsment wel door gronden,
Dat zijn woorden sy recht sonder vleck of rimpel bevonden.
Hemel en aerde sal veel eerder vergaen,
Dan een tuttel van dees Leeraers woorden so wy lesen,
ABRAHAM, ISACK, DAVID, heeft hy beloften ghedaen,
Oock in alles volbrocht, sy synder op gestaen,
En zijn woorden voor oprecht gehouden en gepresen,
Haer saet is vermenichfuldight en hooch geresen,
Tot dat die volheyt des tijdts is gheopenbaert,
Doen is dat beloofde saet, dat Godtlick wesen,
Tot verlossing gecomen, voor ons menschen boos van aert,
Die beloften zijn volbrocht, die desen Leeraer heeft verclaert,
t' Saet der Vrouwen sal het Serpents cop vertreden,
Den Leerling can wel recht oordelen vry onvervaert,
Van sulcken Leeraers leer, die leert ons salicheden,
Tot vervulling is hy selfs gedaelt, uyt den Troon beneden,
Aennemende ons menschelicke natuer sonder die sonden,
Alle verdriet ghesmaeckt, int Ende den doot gheleden,
Dus oordeelt men recht van desen leeraer die aent cruys is gebonden,
Dat zijn woorden syn recht sonder vleck of rimpel bevonden.
| |
[Folio G1r]
| |
Wie sou van eenigh Leeraers leer recht Oordeel kunnen geuen,
Dan van desen Leeraers leer diet alles heeft volbrocht,
Sy Preecken al wel Godts woort, maer sy werden ghedreuen,
Tot eyghen vernuftheyt door hooverdij verheuen,
Daer dickwils van den Leerling weynich op wert gedocht,
Maer den rechten Leeraers leer heeft so wel ghewrocht,
Dat die cruepelen weder wandelden, en den blinden sagen,
T'Verloren Schaepken heeft hy in die wilde woesting ghesocht,
En zijn Lammeren geweijt nae zijns Vaders behaghen,
Die Leeraers haer by naest als woluen nu draghen,
Om die Wol en Melck soecken sy die Schaepen te weyen,
Elck roept hier is CHRISTVS by nachten en daghen,
Maer weet datmen hem alleen inden geest sullen verbeyen,
Ick ben den Wech, der Waerheyt is zijns Leerings uyt t'breyen,
Hy ist, die Oly en Wijn heeft ghegoten in ons wonden,
Hy is die leuende Fonteyn, soo hy leert in alle contreyen,
Canmen van desen Leeraers leer met recht Oordeel niet oorconden,
Dat zijn woorden syn recht sonder vleck of rimpel bevonden.
Prince.
Desen Princelicken Leeraer heeft met zijn leer ghepasseert,
Door Iudeen, Galileen, en t'ghehele Iootsche Landt,
En heeft elck een den oprechten Wech gheleert,
Noyt zijnse beschaemt die tot hem zijn ghekeert,
Maer sy vonden Spijs voor haer sielen aen elcken cant,
PETRVS sprack met woorden door een cloeck verstant,
Doen den HEER sprack: Of hy van hem wilde wijcken?
Neen, seyde PETRVS: V leering die ghy in plant,
Sijn woorden des eewighen Leuens, alsoo men siet blijcken,
Dus heeft hy zijn Iongeren gheleert al ghelijcken,
Datse op zijn Leering vast souden blyuen ghebout,
Sy waren Leerlingen men sachse noyt beswijcken,
Recht Oordeel te geuen van haer Leeraers leer menichfout,
Totter doot toe, die geopenbaert voor Ionck ende Out,
Al werden sy verdreuen, verjaecht als Honden,
Ontsiende vier noch swaert, op haer Leeraers leer betrout,
En getuygenis ghegeuen opentlick met volle monden,
Dat zijn woorden syn recht sonder vleck of rimpel bevonden.
Lieft bouen Al. |
|