Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio D4r]
| |
Refereyn.
DIe Met minnen versamen, wensch ick vrede inden HEER,
Met goede solutie op de vaegh elck voor-gheschreuen,
Die dus is luydende soo ick versta nae haer begheer,
Hoe sal den Leerling recht oordelen van syns Leeraers leer?
Dits een saeck die menich onverstandigh mensch doet beuen,
Want die eerst begint te leren, can gheen recht Oordeel geuen,
Ten sy dat hy kennisse heeft vande leere ontfaen,
En dat hy vercreghen heeft de vrese Godts verheuen
So heeft hy t'beginsel om in wijsheden voort te gaen,
T'is peryculeus nu ter tijdt sulck Oordeel aen te slaen,
Met recht mocht CHRISTUS elck wel waerschouwen voor t'afscheyen,
Hen te wachten voor valsche Propheten die nu opstaen,
Woluen in Schaeps habijten die menich mensch doen scheyen
Van t'waere geloof, elck siet toe, laet u niet verleyen,
Weest voorsichtigh als Serpenten na CHRISTI begheren,
Onnosel als Duyfkens, so wil hy u bereyen,
Door Leeraers die hy stelt, wilt haer leer wel obserueren,
Met voorsichthe kennis inde vrese des HEREN.
Christus (van wien alle leering vloet) zijn Vader dus eert,
Seggende tot haer die hem niet en willen gelouen,
Mijn leer is mijn niet, maer die mijn sent, heeftse mijn gheleert,
So yemant dan des seluen wille te doen begheert,
Die sal dees leer kennen, of sy is wt GODT hier bouen,
Dan of ick van mijn seluen spreeckt, wiltet aldus proeuen,
Wie van hem selfen spreeckt die soeckt zijn eyghen eer altijdt,
Maer wie dien, die hem gesonden heeft soeckt te louen,
Die is waerachtigh en sonder bedroch, haet of nijt,
O crachtigh soudt der aerden die van GODT geroepen zijt
Tot het Leer-ampt, behout u cracht die ghy hebt ontfangen,
Ghy zijt het licht der Werelt, laet u licht lichten met vlijt
Voor alle menschen, dat sy uwen Vader aenhanghen,
Louen en prijsen als sy mercken u goede ganghen,
En achtent gheen Here sy (maer wonder) u gheneren,
Dan der rasender werelt heeft daer na gheen verlangen,
Maer die een voncxken siet, can s'Leeraers leer recht gonderen,
Met voorsichtighe kennis inde vrese des HEREN.
| |
[Folio D4v]
| |
Die GODT yet vreest, handelt niet haest sonder kennis of raet,
Maer wt schuldighe plicht zijns Godtsdienst sal hy de saecken,
Van t' gheen hem gheleert werdt wel overweghen vroech of laet,
Met de Heylighe Schrift en t'leuen CHRISTI, in dien hyt vaet,
So niet, hy bidt en clopt tt GODT om t'verstandt te smaecken,
De Vrese Godts naersticht om tot perfectie te raecken,
Maer den vreselosen hem tot gheen onderwysing gheeft,
Die staet op hemseluen goede lering gaet hy laecken,
Seer pertydich veroordeelt hy al wat de leer aencleeft,
Maer den eenvoudighen leerling leert so lang als hy leeft,
Door soeckt en proeft alle ding, t'goede gaet hy bewaren,
Soot accordeert met GODT en t'woort dat hy gesproken heeft,
Het welck is Gheest en Leuen door t'gheloofs verclaren,
Erghert aen gheen persoons outheyt of jonckheyt van Iaren,
Al sandt die Heer MATTHEVS vanden thol slecht van cleren,
Maer neemt acht of hy de Leer godts reyn comt openbaren,
Dan of hy valsch leert, een goet leerling salt judiceren,
Met voorsichtighe kennis inde vrese des Heren.
Prince.
Gheen nootsakelicker dinck als de leer der Salicheydt,
Daerom heeft GODT zijn Dienaers dit selue inghesproken,
Door zijn gheest om voort te leeren met naerstighen arbeyt,
Om dat elck diet ghelooft niet meer souden werden verleydt,
Door s'duyuels list die met schoon samblant ons comt bestoken,
Als een Enghel des lichts hier dient voor al t'ondersoken,
So IOHANNES seyt: alle gheesten of sy wt GODT zijn,
Te weten prouen haer leer (die als leeraers vercloken)
Ist dat dadelick blijckt dat CHRISTVS IESVS (verstaet mijn)
In het vleesch ghecomen is, dats in of door haer spreeckt fijn,
Diens leere is wt GODT, dits een recht oordeel om gronden,
Oock schrijft ons PAVLVS tot den Hebreen met straffen schijn,
Dewyl ghy een beprouinghe soeckt tot dese stonden
Van CHRISTO, die in mijn spreeckt, en die mijn heeft gesonden,
Welcke in u niet cranck en is, maer crachtich doort leeren,
Dats CHRISTVS door mijn overtuyght u, t'wort in u vonden,
Elck leerling sal dus zijns leeraers leer proberen,
Met voorsichtighe kennis in de vrese des Heren.
Troost maeckt Iolijt. |
|