Pseudo-Bonaventura-Ludolfiaanse leven van Jesus

Des Saterdaghes voer Paesschen. Dat .xxxvi. capittel

Des morghens vroe vanden Saterdaghe so stonden inden huse Johannes beslotender doeren Onse Vrouwe mit horen ghesellinnen mit Johannes, ghepijnt ende rouwich, als vaderlose kinder, vol van droefheden ende ghedachten der pine der tribulacien des daghes van ghisteren. Si saten te gader ende ondersaghen hem elc op den anderen, so als die gheen pleghen, die mit bedructheden beswaert sijn. Daer na so quamen allenken

[fol. 169r]

die jongheren screyende. Ten lesten lieten si of van screyen ende begonsten te spreken van horen Heer ende berespeden hem selven, dat si hem so ghelaten hadden, ende vertelden te gader, wat hem onse Heer ghedaen hadde, nu die een, nu die ander. Sichse naerstelic aen ende doech mit hem, want si sijn in groten rouwe. Want wat wast te sien, dat die Vrouwe der werelt ende die princen der Heiligher Kerken ende alles volcs ende die leiders alles des godliken heers so ghevrest ende bedruct saten, besloten in enen cleynen huseken, ende niet en wisten wat doen anders dan te vertellen ende te sterken die een den anderen vanden woerden ende werken ons Heren? Onse Vrouwe, want si enen sekeren hope hadde vander verrisenisse hoers Soens, so stont si mit vreedsamer herten ende in hoer bleef alleen dat ghelove in desen Saterdach. Ende daer om is sonderlinghe die Saterdach hoer toe ghevoeghet. Si en mochte nochtan niet blide wesen om die ghedachten des doots hoers kints.

Ende als die avont quam, nader sonnen onderganc, dat gheoerloft was te werken, ghinghen Maria Magdalena ende die ander Marien copen duerbaer welrukende crude om salve te maken. Want den Saterdach most men

[fol. 169v]

vieren van allen werke, vander sonnen onderganc des Vridaghes totter sonnen onderganc des Saterdaghes. Sich hier dese wijfkens eernstelijc aen, hoe si mit droeven aensicht gaen na manier der weduwen ende der weesen ende coften die crude ende quamen weder ende bereiden hem die salve te maken. Sich hier hoe si trouwelike ende begheerlike arbeiden over dese salve om horen Heer mit screyden ende mit suchten, ende hoe si in desen werc alden nacht arbeiden, ende hoe Onse Vrouwe ende die apostelen dat aensien ende hem machschien helpen also veel als si mochten.

Hier is te melden wat onse Heer dede in desen daghe. Want althants als hi doot was, clam hi neder te hellen totten heilighen vaders ende was mit hem, ende doe waren si in glorien, want dat beschouwen Gods is volcomen glorie. Sich hier aernstelijc, hoe groet sijn goedertierenheit was, sine minne ende oetmoedicheit, dat hi selve totter hellen woude neder climmen. Want hi mochte enen enghel ghesent hebben totten vaders ende hebbense doen verlossen ende voer hem brenghen, als hi hadde ghewilt, hadde sijn minne ende oetmoedicheit dat ghehenghet. Mar hi voer selve ter hellen,

[fol. 170r]

die Heer alre creatueren, ende visentierde die heilighe vaders niet als sine knechten, mar als sijn vriende, ende was daer mit hem tot des Sonnendaghes inder dagheraet. Die heilighe vaders verbliden hem seer in sijnre coemst ende worden mit onsprekeliker vrouden vervult ende alle onsalicheit was doe verre van hem ende si quamen ende beden hem aen ende stonden op ende loveden hem in sanghe ende in onsprekeliker bliscap. Ende in desen love sanghe ende bliscap so waren si inden schoet Abrahams totter dagheraet toe des Sonnendaghes.

Hier was oec teghenwoerdich een grote menichte der enghelen, die mit hem verblideden ende Gode loefden. Doe namse onse Heer ende voerdse uutter hellen mit groter blisscopen. Ende mit groter glorien ghinc hi voer hem ende brochte si inden paradise der weelden. Ende als hi een wijlken mit hem al daer gheweest hadde ende oec mit Helyas ende Enoch, die hem bekenden ende hem aenbeden ende verbliden, so seide hi hem, dattet tijt waer, dat hi ghinghe ende verwecte ende nam weder aen sijn lichaem. Doe quamen si alle voert ende aenbeden hem ende baden hem dat hi schier weder quame, want si seer begheerden sinen gloriosen lichaem te sien. Dit

[fol. 170v]

moghestu dencken des Saterdaghes voer sijnre verrisenisse.