Pseudo-Bonaventura-Ludolfiaanse leven van Jesus

Hoe hi sijnre moeder openbaerde. Dat .xxxvij. capittel

Des Sonnendaghes quam onse Heer Ihesus totten grave mit groter menichte der enghelen harde vro ende nam weder aen sijn heilighe lichaem ende ghinc so uut den besloten grave ende verrees mit sijnre eyghenre craft ende daer wart groet aertbevinghe. Doe worden die hueders des graves vervaert ende vloghen ende vertelden den Joden wat daer gheschiet was. In der selver uren, als des morghens harde vroe, baden oorlof van Onser Vrouwen Maria Magdalena, Maria Jacobi ende Maria Salomee ende begonsten te gaen mitter salven totten grave.

Ende Onse Vrouwe bleef thuus in horen ghebede. Ende als Onse Vrouwe aldus bede ende suetelijc hoer tranen uut storte, soe quam thants onse Heer Ihesus in witten clederen, die een tuuch waren der glorien sijnre verrisenissen ende sijnre nuwicheit, mit enen claren aensicht, schoen ende gloriose ende hem verblidende. Ende Onse Vrouwe aenbede hem ende opstont mit tranen van bliscappen ende omhelsde hem. Daer na saten si te gader ende si sach hem aernstelike

[fol. 171r]

aen, sijn aensicht, sijn wonden der hande, der voeten ende der siden ende over al sijn lijf, ende vraghede hem of alle zericheit van hem ghegaen waer. Si stonden ende spraken mit groter blisscoppen te gader ende hadden een ghenoechlic ende minlike Paesschen. Daer vertelde hoer onse Heer, hoe dat hi sijn volc uut der hellen verlost hadde ende wat hi inden tiden, dat hi begraven was, ghedaen hadde. Sich hier nu een groet Paesschen. Van deser openbaringhe en vint men inden ewangelie niet, mar daer om heb icse gheset voer die ander, want het is goedertieren, dat men aldus ghelove, als men oec leset in eenre legenden van ons Heren verrisenisse.