Het prieel der gheestelicker melodiie

[p. 270]

De la gloire de Paradis.

AV clair ruisseau de l’immortalité
Souuent mon ame a eu de boire enuie:
Et a cerché de ceste humanité
Rompre le las qui la tient asseruie.

Rompre, &.

Mesme si tot que quelque ennuy facheux

La vient saisir, elle entre en doleance,
Dequoy ne peut soudain voler aux cieux,
D’où elle a prins sa premiere renaissance.

D’où elle, &.

Où sont bastis tant de riches palais,

Si bien ornez & en tel equipage:
Qu’il ny à c’il qui ne les iugeast faicts
D’or, ou d’azur, ou d’vn plus riche ouurage.

D’or, &c.

[p. 271]

 

Dans ces beaux lieux y flaire si bon;

 

Du chaud d’esté l’on ne craint point l’iniure,

 

Ny de l’hyuer la facheuse saison

 

Ne faict sentir sa cuisante froidure.

 

Ne faict, &c.

 

Tousiours y rit le verdoyant printemps,

 

Tousiours y est la rose espanissante,

 

Le Lis y croist, le doux baume en tout temps,

 

Et le saffran de couleur iaunissante.

 

Et le, &c,

 

Les prez y sont à iamais verdoyans,

 

Incessament les belles fleurs boutonnent:

 

On voit de miel les ruisseaux ondoyans;

 

Bref en tout temps tous les biens y soisonnent.

 

Bref en, &c.

 

Le clair Soleil espand mesme clairté;

 

La Lune aussi rend son cours immuable.

 

O bien heureux celuy qui la cité

 

Peut contempler d’vn Dieu si admirable.

 

Peut, &c.

 

Qui ne prend garde à l’vn & l’autre temps;

 

Qui n’a soucy si la nuict est obscure:

 

Et ne s’astreint aux heures & momens

 

Luy duquel part vn iour qui sans fin dure.

 

Luy, &c.

 

En ces saincts lieux les élues reluisans,

 

(Qui ont icy souffert peine & detresse)

 

De ce grand bien dont ils sont iouissans,

 

Incessament menent ioye & liesse,

 

Incessament, &c.

 

Mon Dieu, qui es la gloire du vainceur,

 

Ie te supply, si tost que ceste vie

 

I’auray quicté, fai moy ceste faueur

 

Que soy admis en celle compagnie.

 

Que, &c.