Het prieel der gheestelicker melodiie
(1617)–Anoniem Het prieel der gheestelicker melodiie–
Auteursrechtvrij
[pagina 196]
| |
[pagina 197]
| |
KOmt al tot my die’t Katholijck gheloof bemint,
Wilt v tot blijschap keeren,
En wilt met my vereeren
Den Salighen Ignatius Godts heylich vrient:
En siet gy niet rontsom sijn hooft die sonnen blincken?
Soo blinckten hy in’t leuen,
En was in deucht verheuen,
Wel aen laet onse stemmen klaer tot sijn lof klincken.
Lof, prijs, en eer den vveerdighen Ignatius,
Hy heeft ghesticht de Societeyt van Iesvs.
Maer bouen al soo zy v Iesu Christe lof,
Dat ghy in onse tijden,
En in ons meeste lijden
Ons hebt ghesonden hulpe van het hemelsche hof:
Och wat al boose secten daer, uyt duyuels nesten
Quamen in alle lande!
De werelt stont in brande,
Te Noorden en te Zuydewaert, in’t Oost en westen.
| |
[pagina 198]
| |
Lof, prijs, en eer den vveerdighen Ignatius,
Hy heeft ghesticht de Societeyt van Iesvs.
Luther een Apostaet seer quaet die quam voor al
Hy de de werelt danssen,
En kroonen haer met kranssen,
Door ’svleisch ghenuchte brocht hy menich mensch te val:
Caluijn den loosen, boosen vos, die quam oock kroken
Die oude suyuer leere:
Maer siet den Hoochsten Heere
Die heeftse door Ignatius den neck ghebroken.
Lof, prijs, en eer den vveerdighen Ignatius,
Hy heeft ghesticht de Societeyt van Iesvs.
Hy heeft verweckt Ignatius een Capiteyn
Om sathan te beuechten,
En alle sathans knechten:
Komt valeureusen Capiteyn, komt kloeck te pleyn:
Te Roomen ghy een oorden hebt gemaect bequame
Die alle gheusen haten
Bouen all’ ander Staten,
Het is een Compagnie goet van Iesus name.
Lof, prijs, en eer den vveerdighen Ignatius,
Hy heeft ghesticht de Societeyt van Iesvs.
O Salighen Ignatius, o Heylich man!
Konst ick v van deechs prijsen
Ick soude laten rijsen
En doen mijn stemm’ hooren, van hier tot in Iapan:
Ommers doch ons ghedachtich zijt, wilt voor ons bidden,
Wilt ons graci’ verweruen
Goet, Katholijck te steruen,
Want rontsom ons de boosen zijn, wy zijn int midden.
Lof, prijs, en eer den vveerdighen Ignatius,
Hy heeft ghesticht de Societeyt van Iesvs.
|
|
