Het prieel der gheestelicker melodiie

☞ Een ander,

Op de voorgaende wijse.

AL lijd’ ick druck en swaer ghequel,
Al is mijn lijden noch soo fel,
Rebel wil ick niet wesen:
Want Godt is goet,
Sijn oordeel moet
Altijdt worden gepresen.

[p. 195]

 

Al wordt ghy nu bespot, versmaet,

 

Begheckt, beklapt, verdruckt, behaet,

 

Hoet gaet weest wel te vreden:

 

Maeckt gheen ghekrijt,

 

Verduldich zijt,

 

‘Twert al tot salicheden.

 

 

 

Al slaet v Godt in ghelt, in goet,

 

In naem, in faem, in vleesch, in bloet,

 

Houdt moet in v vijf sinnen:

 

Den Heer’ verbeydt,

 

Lief volcht naer leydt,

 

‘tKomt al uyt rechter minnen.

 

 

 

Behoudt inwendich stercken moet,

 

In lief, in leet, in suer, in soet,

 

In hebben, en te deruen:

 

Houdt dese leer,

 

In sucht, in seer,

 

In leuen, en in steruen.

 

 

 

Gheen quader dinck als eyghen wil,

 

‘Tmaeckt tusschen ons, en Godt geschil,

 

‘Tbelet sijn soet invloeyen!

 

Den will’ versaeckt,

 

En Godt ghesmaeckt,

 

Dat doet de deuchden groeyen.