Het prieel der gheestelicker melodiie


☞ Een ander, Op de wijse: Iesus soete memorie. O Felle doot die sult verslaen, Al dat hier leuen heeft ontfaen, Hoe bitter is ons v vermaen, Niemant en kan v kracht ontgaen. Hoe, etc. Ghy komt tot elcken in’t ghemeyn, Is’t rijck ist arm, ist groot, ist kleyn, Die leuen in des werelts pleyn Al ׀ zijn sy oock van sonden reyn. Die, etc. Ghy neemt ons soo haest als ghy meucht Al dat ons droeuich hert’ verheucht, Ghenucht, gheselschap, spel en vreucht, Al waer’t oock inde ionghe ieucht. Ghenucht, etc. Als ghy ons raeckt met uwen poot, Verschiet ons all’ ons bloede root: Dan wordet lichaem naeckt en bloot Begrauen inder aerden schoot. Soo, etc. T’goet dat wy langh’ hebben ghespaert
[pagina 149]
Met aerbeyt groot by een vergaert, Ontneemt ghy ons stout onuervaert, Dus wort ons herte seer beswaert Ontneemt, etc. Alleen die doen naer Christus sin, En wachten hen van quaet ghespin, Die suldy bringhen groot ghewin, Deur v gaen sy ten hemel in. Die, etc. Maer die nu quaet van leuen zijn, Tot dat haer komt ‘sleuens termijn, Die brenght ghy inder hellen pijn, Ghesloten van Godts soet aenschijn. Die, etc. Prince dit is den besten raet, Dat elckerlijck hem wacht van quaet, En stell’ in eenen goeden staet, Soo is de doot tot sijnder baet. En stell’, etc.