Het prieel der gheestelicker melodiie
(1617)–Anoniem Het prieel der gheestelicker melodiie–
AuteursrechtvrijOp de vvijse: Alsoo’t beghint. | |
[pagina 146]
| |
BEpeynst v edel mensche,
Bepeynst v leuen wel:
Ten is niet t’uwen wensche,
Al waerdy noch soo snel,
Dat ghy hier langh’ soudt blijuen
Sonder pijn oft ghequel,
Al haddy duysent lijuen:
De doot en is gheen spel.
O doot, O doodt:
Ghy en spaert kleyn noch groot:
O doodt ay my!
Hoe bitter zijt ghy! Hoe bitter, etc.
Ghy Ionghers, en Ionckfrauwen,
Die daer draecht zijd’ en gout,
De doodt sal v doen flauwen,
Al zijdy noch sou stout:
Laet danssen ende springhen,
Laet al v ouerdaet:
| |
[pagina 147]
| |
En wilt toch niet volbringhen
S’vleesch, duyuels, werelts raet. O doodt, etc.
Al haddy Keysers rijcke,
Daer mede Sampsons kracht:
Al haddy desghelijcke
Al Cresus schadt en pracht,
Ten kan v al niet baten,
Al waerdy oock rebel,
Ghy moetet al verlaten
Onder des doots beuel. O doodt, etc.
Waer sijn de Maechden schoone,
Met haren ghelen haer,
Die hier spanden de kroone,
Om haer schoon aenschijn klaer:
Al van de wormen gheten
Sijn sy, ‘tis soo voorwaer:
Haer schoonheydt is versleten
Verwacht sulcks allegaer. O doodt, etc.
Waer zijn de Potentaten
Des werelts, met haer macht,
Die wijse Magistraten,
Hier voortijdts groot gheacht?
Niemant en is ghebleuen,
T’zy edel oft vileyn,
Die niet en heeft beseuen
Den strael des doots certeyn. O doodt, etc.
Waert dat wy wel bekenden,
Wat ons ghebeuren sal,
Als ons die doot sal schenden,
En brenghen in den val
Dat herte soude breken
Met groote bitterheyt,
Gheen tonghe can uytspreken,
Dus peyst op d’eeuwicheyt. O doodt, etc.
| |
[pagina 148]
| |
Ick bidd’ v al ghemeene,
Wilt vaten dit verstant,
Maeckt v van sonden reene,
Denckt op den uytersten pant
Die Godt v heeft ghegheuen,
Eer ghy die note kraeckt,
Die elcken mensch doet beuen,
Als sy het herte raeckt. O doot, etc.
|
|