Het prieel der gheestelicker melodiie

[p. 122]

☞ Een ander,

Op de wijse: Alsoo’t beghint.

DEuote herten wilt vreuchden rapen,
Aensiet hoe schoon is des hemels schijn:
Siet doch, van niet heeft hy’t al gheschapen:
Denckt dan hoe schoon moet den Schepper zijn.

Siet, etc.

Aensiet de kruyden seer groene spruyten,

Die daer ghenesen sieckt’ ende pijn:
Aensiet haer schoonheyt, en haer virtuyten:
Denckt dan hoe schoon moet den Schepper zijn.

Aensiet, etc.

[p. 123]

 

Aensiet de Lelien wijt ontloken,

 

Thymis, Lauender, Roosemarijn:

 

Aensiet die Rooskens vol soete roken:

 

Denckt dan hoe schoon moet den Schepper zijn.

 

Aensiet, etc.

 

Siet al die blomkens met goet verstande,

 

Der siecken zijn zy een medecijn:

 

Siet haer koleuren menigherhande:

 

Denckt dan hoe schoon moet den Schepper zijn.

 

Siet, etc.

 

Aensiet die boomen met al haer vruchten,

 

En die wijngaerden met haren wijn:

 

Aensiet die voghelkens inder luchten:

 

Denckt dan hoe schoon moet den Schepper zijn.

 

Aensiet, etc.

 

Siet die ghesteenten van grooter weerden,

 

Die klaerder blincken dan kristallijn:

 

Siet alle schoonheyt op deser eerden:

 

Denckt dan hoe schoon moet den Schepper zijn.

 

Siet, etc.

 

Siet ghy de menschen schoon van Lichame,

 

Fraey van fatsoen ende leden fijn,

 

Suyuer van aensicht, ooghen bequame,

 

Denckt dan hoe schoon moet den Schepper zijn.

 

Suyuer, etc.

 

Aensiet die Sonn’ ende Mane schoone

 

Aensiet die Sterren van klaren schijn:

 

Siet hoe sy blincken aen ‘shemels throone:

 

Denckt dan hoe schoon moet den Schepper zijn,

 

Siet, etc.

 

Hoort ghy hier konstich op d’Orghel spelen,

 

Op instrumenten musijck diuijn:

 

Hoort ghy ooch singhen met ׀ soete kelen:

 

Denckt hoe soet sal ’t inden hemel zijn.

 

Hoort, etc.

[p. 124]

 

Alle vreucht diemen hiet mach bedrijuen,

 

En mach maer dueren een korte termijn:

 

Maer sy sal inder eeuwichheyt blijuen,

 

Voor die by Godt inden hemel zijn.

 

Maer, etc.

 

Laet ons de werelt gheheel versaken,

 

Met al haer boosheyt nae Godts doctrijn:

 

Soo sullen wy inden hemel smaken

 

Hoe soet en schoone dat daer sal zijn.

 

Soe, etc.

 

Lof zy den Schepper der creaturen

 

Sie alle dinghen gheschapen heeft:

 

Glori’ zy hem nu en taller uren

 

Die’t onderhout ende voetsel gheeft.

 

Glori’, etc.